ପୁରୀ ସମୁଦ୍ର ବେଳାଭୂମିରେ ଫସି ରହିଛି ଆନ୍ଧ୍ରପ୍ରଦେଶର ମାଛ ଧରା ଡଙ୍ଗା

ପୁରୀ (ଭିଓଭି): ଗଭୀର ସମୁଦ୍ରକୁ ମାଛ ଧରିବାକୁ ଯାଇଥିବା ବେଳେ ଖରାପ ପାଗ ସାଙ୍ଗକୁ ମାଛଧରା ବୋଟ୍ ଟିର ଇଞ୍ଜିନ ଅଚଳ ହୋଇଯିବାରୁ 10 ଜଣ ମାଛ ଧରାଳୀଙ୍କୁ ନେଇ ଯାଇଥିବା ଆନ୍ଧ୍ରପ୍ରଦେଶ ର ଉକ୍ତ ଡଙ୍ଗାଟି ଗଭୀର ସମୁଦ୍ର ରେ ଭାସି ଭାସି ଆସି ପୁରୀ ସମୁଦ୍ର କୂଳରୁ ପ୍ରାୟ ତିନି କିଲୋମିଟର ଦୂରରେ ଦିଗହରା ହୋଇ ଭାସୁଥିଲା। ଖବର ପାଇ କୋଷ୍ଟଗାର୍ଡ ଏବଂ କିଛି ସ୍ଥାନୀୟ ମାଛ ଧରା ଡଙ୍ଗା ସହାୟତାରେ ପୁରୀ ମାରାଇନ୍ ପୋଲିସ ସମସ୍ତ ଦଶଜଣ ମାଛ ଧରାଳିଙ୍କ ସମେତ ଉକ୍ତ ଡଙ୍ଗା ଟିକୁ ସୁରକ୍ଷିତ ଭାବେ ଉଦ୍ଧାର କରି ପୁରୀ ସମୁଦ୍ର କୂଳକୁ ଆଣି ସମସ୍ତ ମାଛ ଧରାଳିଙ୍କୁ ସେମାନଙ୍କ ଘରକୁ ଫେରି ଯିବାର ବ୍ୟବସ୍ଥା କରିଛନ୍ତି।

ସୂଚନା ମୁତାବକ ସମସ୍ତ ଦଶ ଜଣ ଯାକ ମାଛ ଧରାଳି ଆନ୍ଧ୍ରପ୍ରଦେଶ ର ବିଜୟନଗରମ୍ ଜିଲ୍ଲା ଅନ୍ତର୍ଗତ ଚିନ୍ତାପଲ୍ଲୀ ଗ୍ରାମର ବାସିନ୍ଦା। ସେମାନେ IND-AP-V5-MM-872 ନମ୍ବର ଡଙ୍ଗା ରେ ମାଛ ଧରିବାକୁ ଯାଇଥିଲେ। ବର୍ତ୍ତମାନ ଉକ୍ତ ଡଙ୍ଗାଟି ପୁରୀ ସମୁଦ୍ର କୂଳରେ ପେଣ୍ଠକଟା ଠାରେ ରହିଛି। ଖୁବ୍ ଶୀଘ୍ର ତାହାର ଇଞ୍ଜିନ ମରାମତି କରାଯାଇ ଡଙ୍ଗାଟିକୁ ଫେରାଇ ନିଆଯିବ ବୋଲି ଡଙ୍ଗାଟିର ମାଲିକ ପ୍ରକାଶ କରିଛନ୍ତି।