ପୁରୀ: ପୁରୀ ମୁନିସିପାଲିଟି ଅଞ୍ଚଳରେ କେବେ ବନ୍ୟା ହେଲା କେହି ଜାଣି ପାରିଲେନି। ବନ୍ୟାରେ କଣ ସବୁ କ୍ଷତିଗ୍ରସ୍ତ ହୋଇଛି ତା ବି କାହାକୁ ଜଣା ନାହିଁ। କିନ୍ତୁ ପୁରୀ ମୁନିସିପାଲିଟି ଅଞ୍ଚଳରେ ବନ୍ୟା ପରବର୍ତ୍ତୀ ପରିସ୍ଥିତିର ମୁକାବିଲା ଲାଗି ଅଙ୍ଗନାଡି କେନ୍ଦ୍ରରେ ଜରୁରୀ ଉପସ୍ଥିତ ରହିବା ପାଇଁ ପୁରୀ ମୁନିସିପାଲିଟି ଅଧୀନରେ ଥିବା ସମସ୍ତ ଅଙ୍ଗନବାଡି କର୍ମୀ ମାନଙ୍କୁ କଡା ନିର୍ଦ୍ଦେଶ ଜାରି କରିଛନ୍ତି ସମନ୍ଵିତ ଶିଶୁ ବିକାଶ ପ୍ରକଳ୍ପ ଅଧିକାରିଣୀ ବିନୋଦିନୀ ତ୍ରିପାଠୀ। ତାହା ପୁଣି କେବଳ ଅଗଷ୍ଟ ସାତ ତାରିଖ ଗୋଟିଏ ଦିନ ପାଇଁ। ମିଳିଥିବା ସୂଚନା ଅନୁସାରେ, ପୁରୀ ମୁନିସିପାଲଟି ସମନ୍ଵିତ ଶିଶୁ ବିକାଶ ପ୍ରକଳ୍ପ ଅଧିକାରିଣୀଙ୍କ ଚିଠି ନଂ. 1045/dt.06.08.2026 ରେ ପୁରୀ ମୁନିସିପାଲଟି ଅଧୀନରେ ଥିବା ସମସ୍ତ ଅଙ୍ଗନବାଡି କର୍ମୀ ତା. 07.08.2026 ରିଖରେ ଅଙ୍ଗନବାଡି କେନ୍ଦ୍ରରେ ଉପସ୍ଥିତ ରହି ଅଙ୍ଗନବାଡି କେନ୍ଦ୍ରର ସୁପରିଚାଳନା କରିବା ପାଇଁ କଡା ନିର୍ଦ୍ଦେଶ ଦେଇଥିବା ଜଣା ପଡିଛି। ବନ୍ୟା ପରବର୍ତ୍ତୀ ସ୍ଥିତିରେ ଶିଶୁ ଓ ମହିଳା ମାନଙ୍କର ଉପଯୁକ୍ତ ଯତ୍ନ ଏବଂ ସଚେତନତା ନିମନ୍ତେ ଉକ୍ତ ଦିନ ଟି ଉପସ୍ଥିତ ରହିବା ପାଇଁ ଉକ୍ତ ଚିଠିରେ ଦର୍ଶା ଯାଇଛି।
ଖାଲି ସେତିକି ନୂହେଁ ସମସ୍ତ ଅଙ୍ଗନବାଡି କେନ୍ଦ୍ର ପରିଦର୍ଶନ କରି ଅଙ୍ଗନବାଡି କର୍ମୀଙ୍କ ଉପସ୍ଥିତି ନେଇ ରିପୋର୍ଟ୍ ପ୍ରଦାନ କରିବାକୁ ସମସ୍ତ ମଣ୍ଡଳ ପରିଦର୍ଶିକା ମାନଙ୍କୁ ମଧ୍ୟ ନିର୍ଦ୍ଦେଶ ଦିଆଯାଇଛି। ଜିଲ୍ଲା ସମାଜ ମଙ୍ଗଳ ଅଧିକାରିଣୀ ଙ୍କ ପତ୍ର ସଂଖ୍ୟା 4056/ତା.04.08.2026 ନିର୍ଦ୍ଦେଶ ଅନୁଯାୟୀ ଏହି ପଦକ୍ଷେପ ନିଆଯାଇଛି ବୋଲି ଉକ୍ତ ଚିଠିରେ ଦର୍ଶା ଯାଇଛି। ଗୋଟିଏ ଦିନ ପୂର୍ବରୁ ହଠାତ୍ ଏମିତି କେଉଁ ଜରୁରୀ କାଳୀନ ସ୍ଥିତିରେ ଏବଂ ସେହି ନିର୍ଦ୍ଦିଷ୍ଟ ଗୋଟିଏ ଦିନ ଅଙ୍ଗନବାଡି କେନ୍ଦ୍ରରେ ଉପସ୍ଥିତ ରହିବା ପାଇଁ ଅଙ୍ଗନାଡି କର୍ମୀ ମାନଙ୍କୁ ନିର୍ଦ୍ଦେଶ ଦେବାକୁ ତତ୍ପର ହୋଇ ଉଠିଲେ ତାହା ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରୁଛି। ବିଶେଷ ସୂତ୍ରରୁ ଜଣାପଡିଛି କି, ଅଙ୍ଗନବାଡି କର୍ମୀ ମାନଙ୍କର ବିଭିନ୍ନ ଦାବୀ ପୂରଣ ନେଇ ଜିଲ୍ଲାପାଳ ଙ୍କ କାର୍ଯ୍ୟାଳୟ ସମ୍ମୁଖରେ ଉକ୍ତ ଦିନ ଶାନ୍ତିପୂର୍ଣ୍ଣ ଧାରଣା ଦେବା ପାଇଁ “ଅଲ ଓଡିଶା ଅଙ୍ଗନବାଡି ୱାର୍କର୍ସ ଆସୋସିଏସନ” ସଜବାଜ ହେଉଥିବାରୁ ତାହାକୁ ଭଣ୍ଡୁର କରିବା ଲାଗି ଏହା ଗୋଟିଏ ଚକ୍ରାନ୍ତ ବୋଲି ଆଲୋଚନା ହେଉଛି।
