ପୁରୀ(ଭିଓଭି): ଦୀର୍ଘ ୬ ବର୍ଷର ପ୍ରତୀକ୍ଷାର ଅନ୍ତ ଘଟାଇ ଶେଷରେ ଭକ୍ତ ମାନଙ୍କ ପାଇଁ ଖୋଲିଛି ଶ୍ରୀଗୁଣ୍ଡିଚା ମନ୍ଦିର । ଆନନ୍ଦ ମନରେ ମହାପ୍ରଭୁଙ୍କ ଜନ୍ମବେଦୀ ଦର୍ଶନ କରିବାର ସୌଭାଗ୍ୟ ଲାଭ କରିଛନ୍ତି ଶ୍ରଦ୍ଧାଳୁ । ୨୦୨୦ ମସିହାରେ କୋଭିଡ ଯୋଗୁଁ ଶ୍ରୀଗୁଣ୍ଡିଚା ମନ୍ଦିର ମଧ୍ୟକୁ ପ୍ରବେଶ ବନ୍ଦ କରାଯାଇଥିଲା ଏବଂ ପରବର୍ତୀ ସମୟରେ ଶ୍ରୀଗୁଣ୍ଡିଚା ମନ୍ଦିର ମରାମତି ନିମନ୍ତେ ବନ୍ଦ ରହିଥିଲା । ଏବେ ମରାମତି କାମ ସଂପୂର୍ଣ୍ଣ ହେବା ପରେ ଶ୍ରୀମନ୍ଦିର ପରିଚାଳନା ନିଷ୍ପତି ମୁତାବକ ଗତ ସେପ୍ଟେମ୍ବର ୩୦ ତାରିଖ ଠାରୁ ସର୍ବସାଧାରଣଙ୍କ ନିମନ୍ତେ ଶ୍ରୀଗୁଣ୍ଡିଚା ମନ୍ଦିର ଦ୍ୱାର ଉନ୍ମୁକ୍ତ କରି ଦିଆଯାଇଛି । ପୂର୍ବ ନିଷ୍ପତି ମୁତାବକ ସକାଳ ୭ଟା୪୫ମିନିଟ୍ ସମୟରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ ନଡ଼ିଆ ବାଡ଼େଇ ଦର୍ଶନର ଶୁଭାରମ୍ଭ କରିଥିଲେ । ପ୍ରଥମ ୫ ଜଣ ଭକ୍ତଙ୍କୁ ଶ୍ରୀମନ୍ଦିର ବାନା ପରିଧାନ କରାଇ ସ୍ୱାଗତ କରାଯାଇଥିଲା ଏବଂ ସମସ୍ତ ଶ୍ରଦ୍ଧାଳୁ ଧାଡ଼ିରେ ମନ୍ଦିର ମଧ୍ୟକୁ ପ୍ରବେଶ କରିଥିଲେ ।
ଶ୍ରୀଗୁଣ୍ଡିଚା ମନ୍ଦିର ବାହାରେ ଟିକେଟ୍ କାଉଣ୍ଟର ସମେତ ଯୋତା ଷ୍ଟାଣ୍ଡ ଆଦି କରାଯାଇଥିବା ବେଳେ ମନ୍ଦିର ମଧ୍ୟରେ ପାନୀୟ ଜଳ ଆଦିର ବ୍ୟବସ୍ଥା କରାଯାଇଛି । ନାଟ ମଣ୍ଡପକୁ ବାତାନୁକୁଳିତ କରାଯାଇଛି । ମନ୍ଦିର ମଧ୍ୟରେ ତିନି ରଥର ତିନୋଟି ଚକ ସ୍ଥାପନ କରାଯାଇଛି । ଦିବ୍ୟାଙ୍ଗ ଶ୍ରଦ୍ଧାଳୁମାନଙ୍କ ପାଇଁ ସ୍ୱତନ୍ତ୍ର ର୍ୟାମ୍ପ ବ୍ୟବସ୍ଥା କରାଯାଇଛି । ପ୍ରବେଶ ଶୁଳ୍କ ଜଣପିଛା ୧୦ଟଙ୍କା ରଖା ଯାଇଥିବା ବେଳେ ୫ବର୍ଷରୁ କମ୍, ୮୦ ବର୍ଷରୁ ଉର୍ଦ୍ଧ୍ୱ ଏବଂ ଦିବ୍ୟାଙ୍କ ଶ୍ରଦ୍ଧାଳୁ ମାନଙ୍କ ପାଇଁ କୌଣସି ଶୁଳ୍କ ଲାଗିବ ନାହିଁ ବୋଲି ବିଜ୍ଞାପନ ଫଳକରେ ପ୍ରଦର୍ଶିତ ହୋଇଛି । ପ୍ରଥମ ତିନି ଦିନ ସମସ୍ତ ଭକ୍ତ ମାନେ ବିନା ଶୁଳ୍କରେ ଦର୍ଶନ କରିବାର ସୁବିଧା ପାଇଥିଲେ ।
ପ୍ରତିକ୍ରିୟାରେ ଆରକ୍ଷୀ ଅଧିକ୍ଷକ ପ୍ରତୀକ ସିଂ କହିଛନ୍ତି, ଶ୍ରୀଗୁଣ୍ଡିଚା ମନ୍ଦିରର ସୁରକ୍ଷା କଡ଼ା କଡ଼ି କରାଯାଇଛି । ପ୍ରବେଶ ଦ୍ୱାରରେ ଏବଂ ମନ୍ଦିର ଭିତରେ ସିସିଟିଭି ଲଗାଯାଇଛି । ପ୍ରବେଶ ଦ୍ୱାରରେ ମେଟାଲ ଡିଟେକ୍ଟର ଲଗାଯାଇଛି ଏବଂ ମନ୍ଦିର ଭିତରେ ବ୍ୟାପ ପୋଲିସ୍ ମୁତୟନ କରାଯାଇଛି । ମନ୍ଦିର ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଖୋଲା ରହିବ କିନ୍ତୁ ନଭେମ୍ବର ରୁ ଫେବୃଆରି ପର୍ଯ୍ୟନ୍ତ ସନ୍ଧ୍ୟା ୫ଟାରେ ମନ୍ଦିର ଦର୍ଶନ ବନ୍ଦ ହେବ । ସେହିପରି ସ୍ନାନ ପୂର୍ଣ୍ଣିମାରୁ ନୀଳାଦ୍ରି ବିଜେ ପର୍ଯ୍ୟନ୍ତ ଏହି ଦର୍ଶନ ବନ୍ଦ ରହିବ । ଭକ୍ତ ମାନେ ନିରାପଦରେ ଏବଂ ଶାନ୍ତି ଶୃଙ୍ଖଳାର ସହିତ କିପରି ଦର୍ଶନ କରିପାରିବେ ସେଥିପାଇଁ ସମସ୍ତ ବ୍ୟବସ୍ଥା କରାଯାଇଛି ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଡା. ଅରବିନ୍ଦ ପାଢ଼ୀ ପ୍ରକାଶ କରିଛନ୍ତି ।
