କଟକ: ବର୍ଷା ହେଲେ ରାସ୍ତାରେ ପଙ୍କ ଓ କାଦୁଅ, ବର୍ଷା ନହେଲେ ଧୂଳିର ପ୍ରକୋପ। ଏଭଳି ଅବସ୍ଥା ଦେଇ ଗତି କରୁଛି କଟକର ସେମିନାରୀ ଛକ ମାଛ ମାର୍କେଟ ରାସ୍ତା। ରାସ୍ତାର ଦୁରବସ୍ଥା ଯୋଗୁଁ ଏହି ବାଟ ଦେଇ ଯାତାୟାତ କରୁଥିବା ଲୋକଙ୍କ ଦୁର୍ଦ୍ଦଶା ବଢ଼ିଯାଇଛି। ବର୍ଷା ପରେ ରାସ୍ତାରେ ଜମି ରହୁଥିବା କାଦୁଅ ଓ ପଙ୍କ ଯୋଗୁଁ ଚାଲିବା ମଧ୍ୟ କଷ୍ଟକର ହୋଇପଡ଼ୁଛି। ଏହି ମାଛ ମାର୍କେଟକୁ ପ୍ରତିଦିନ ବହୁ ଲୋକଙ୍କ ଯାତାୟାତ ଲାଗି ରହୁଥିବାବେଳେ ରାସ୍ତାର ଏଭଳି ସ୍ଥିତି ସମସ୍ତଙ୍କ ପାଇଁ ସମସ୍ୟା ସୃଷ୍ଟି କରୁଛି। କାଦୁଅ ଓ ପଙ୍କ ଭର୍ତ୍ତି ରାସ୍ତାରେ ଗାଡ଼ିମୋଟର ଚଳାଚଳ କରିବା ସହଜ ହେଉନାହିଁ।
ଅନ୍ୟପକ୍ଷରେ, ରାସ୍ତା ଶୁଖିଗଲେ ଧୂଳି ଉଡ଼ିବା ଆଶଙ୍କା ମଧ୍ୟ ରହୁଛି। ଫଳରେ ସ୍ଥାନୀୟ ବ୍ୟବସାୟୀ ଓ ପଥଚାରୀମାନେ ନାନା ଅସୁବିଧା ଭୋଗୁଛନ୍ତି। ସହରର ଏକ ବ୍ୟସ୍ତବହୁଳ ଅଞ୍ଚଳରେ ଏଭଳି ରାସ୍ତାର ଅବସ୍ଥା ରହିବା ନିଶ୍ଚିତ ଭାବେ ଚିନ୍ତାଜନକ। ତେଣୁ ରାସ୍ତାର ତୁରନ୍ତ ମରାମତି ସହ ଉପଯୁକ୍ତ ଜଳ ନିଷ୍କାସନ ବ୍ୟବସ୍ଥା କରିବା ଆବଶ୍ୟକ। ଏ ଦିଗରେ ସମ୍ପୃକ୍ତ କର୍ତ୍ତୃପକ୍ଷ ଦୃଷ୍ଟି ଦେଇ ଲୋକଙ୍କ ଦୀର୍ଘଦିନର ସମସ୍ୟାର ସମାଧାନ କରିବାକୁ ଗୋପବନ୍ଧୁ ବିହାର କମିଟି ସମ୍ପାଦକ ଡକ୍ଟର ପ୍ରବୀଣ ବରାଳ ଓ ଅଂଚଳବାସୀମାନେ ଦାବି କରିଛନ୍ତି।
