ନୂଆଦିଲ୍ଲୀ: ଆପଲର ସହ-ପ୍ରତିଷ୍ଠାତା ଷ୍ଟିଭ ଜବ୍ସଙ୍କ ପତ୍ନୀ ଲରେନ ପାୱେଲ ଜବ୍ସ ସମ୍ପ୍ରତି ମହାକୁମ୍ଭରେ ଯୋଗଦେବା ପାଇଁ ପ୍ରୟାଗରାଜ ଆସିଥିଲେ। ସ୍ବାସ୍ଥ୍ୟଗତ କାରଣରୁ ପ୍ରଥମ ଦିନରେ ସେ ସଙ୍ଗମରେ ବୁଡ଼ ପକାଇପାରି ନ ଥିଲେ ମଧ୍ୟ, ଲରେନଙ୍କ ପ୍ରୟାଗରାଜ ଗସ୍ତ ଆକର୍ଷଣର କେନ୍ଦ୍ର ହୋଇ ରହିଥିଲା। କୁମ୍ଭରେ ତାଙ୍କର ଆଧ୍ୟାତ୍ମିକ ଅଭିଜ୍ଞତା ପରେ ସେ ଖବର ଶିରୋନାମାରେ ଥିଲେ, କିନ୍ତୁ ପ୍ରୟାଗରାଜ ଗସ୍ତ ସହିତ ଆଉ ଏକ ରେକର୍ଡ ଭାଙ୍ଗି ଯାଇଛି। ଲରେନ ପାୱେଲ ଜବ୍ସ ଭୁଟାନ ଏୟାରୱେଜ ବିମାନରେ ପ୍ରୟାଗରାଜ ଆସିଥିଲେ ଏବଂ ସେହି ବିମାନରେ ଭୁଟାନ ଫେରି ଯାଇଥିଲେ। ଏହା ୯୩ ବର୍ଷ ମଧ୍ୟରେ ପ୍ରୟାଗରାଜକୁ ପ୍ରଥମ ଅନ୍ତର୍ଜାତୀୟ ବିମାନ ଯାତ୍ରା ଥିଲା, ଯାହା ପ୍ରୟାଗରାଜ ବିମାନବନ୍ଦର ପାଇଁ ଏକ ଐତିହାସିକ ମୁହୂର୍ତ୍ତ ଥିଲା। ୧୯୩୨ ପରଠାରୁ ଏଠାରୁ କୌଣସି ଅନ୍ତର୍ଜାତୀୟ ବିମାନ ଚଳାଚଳ କରିନାହିଁ। ୧୯୧୧ ମସିହାରେ ହେନରୀ ପିକେଟ ଭାରତରେ ଘରୋଇ ବାଣିଜି୍ୟକ ବିମାନ ଚଳାଚଳ ଆରମ୍ଭ କରିଥିଲେ। ସେ ଆହ୍ଲାବାଦ (ବର୍ତ୍ତମାନ ପ୍ରୟାଗରାଜ) ରୁ ନୈନି ପର୍ଯ୍ୟନ୍ତ ଏକ ପୋଷ୍ଟାଲ ବିମାନ ପରିଚାଳନା କରୁଥିଲେ। ଏହା ପରେ, ୧୯୩୧ ମସିହାରେ ଆହ୍ଲାବାଦ ବିମାନବନ୍ଦର ପ୍ରତିଷ୍ଠିତ ହୋଇଥିଲା, ଯାହା ଭାରତର ପ୍ରଥମ ବିମାନବନ୍ଦର ମଧ୍ୟରୁ ଗୋଟିଏ ହୋଇଗଲା, ଯେଉଁଠାରୁ ୧୯୩୨ ପର୍ଯ୍ୟନ୍ତ ଲଣ୍ଡନକୁ ବିମାନ ଚଳାଚଳ କରୁଥିଲା। ୧୯୭୪ ମସିହା ଫେବୃଆରୀ ୨ ତାରିଖରେ ଷ୍ଟିଭ ଜବ୍ସ ତାଙ୍କ ବନ୍ଧୁ ଟିମ ବ୍ରାଉନଙ୍କୁ ଏକ ଚିଠି ଲେଖିଥିଲେ। ଏହି ଚିଠିରେ ସେ କୁମ୍ଭରେ ଅଂଶଗ୍ରହଣ କରିବାକୁ ତାଙ୍କର ଇଚ୍ଛା ପ୍ରକାଶ କରିଥିଲେ। ଚିଠିରେ ସେ ଲେଖିଥିଲେ, ମୁଁ ଏପ୍ରିଲରେ ଆରମ୍ଭ ହେଉଥିବା କୁମ୍ଭମେଳା ପାଇଁ ଭାରତ ଯିବାକୁ ଚାହୁଁଛି। ମୁଁ ମାର୍ଚ୍ଚ ମାସରେ କେବେ ଯିବି, ଏ ପର୍ଯ୍ୟନ୍ତ ନିଷ୍ପତ୍ତି ହୋଇନାହିଁ। ଷ୍ଟିଭ ଜବ୍ସଙ୍କ ଏହି ଚିଠି ହିନ୍ଦୁ ଦର୍ଶନ ଏବଂ ଆଧ୍ୟାତ୍ମିକତା ସହିତ ତାଙ୍କର ଗଭୀର ସମ୍ପର୍କକୁ ପ୍ରତିଫଳିତ କରେ। ଷ୍ଟିଭ ଜବ୍ସଙ୍କ ଏହି ଚିଠିଟି ନିକଟରେ ପ୍ରାୟ ୪.୩୨ କୋଟି ଟଙ୍କାରେ ନିଲାମ ହୋଇଥିଲା। କେବଳ କୁମ୍ଭ ନୁହେଁ, ଷ୍ଟିଭ ଜବସଙ୍କ ଆଧ୍ୟାତ୍ମିକ ଯାତ୍ରାରେ ଉତ୍ତରାଖଣ୍ଡର ନିମ କାରୋଲି ବାବାଙ୍କ ଆଶ୍ରମ ମଧ୍ୟ ଅନ୍ତର୍ଭୁକ୍ତ ଥିଲା। ଏହିଠାରେ ବାବା ନିମ କାରୋଲିଙ୍କ ଶିକ୍ଷା ଷ୍ଟିଭ ଜବସଙ୍କୁ ଗଭୀର ଭାବରେ ଆକର୍ଷିତ କରିଥିଲା।
ମହାକୁମ୍ଭରେ ଆପଲର ସହ-ପ୍ରତିଷ୍ଠାତାଙ୍କ ସ୍ତ୍ରୀ ଭାଙ୍ଗିଲେ ୯୩ ବର୍ଷ ପୁରୁଣା ରେକର୍ଡ
