ନୂଆଦିଲ୍ଲୀ : ଟିମ୍ ଇଣ୍ଡିଆକୁ ୪ର୍ଥ ଟେଷ୍ଟରେ ବଡ଼ ଝଟକା ଳାଗିଛି । ଟିମର ଷ୍ଟାର ବ୍ୟାଟର ତଥା ଉପ ଅଧିନାୟକ ରିଷଭ ପନ୍ତ ଆହତ ଜନିତ ସମସ୍ୟା ଯୋଗୁଁ ବାକି ଥିବା ମ୍ୟାଚରେ ୱିକେଟ କିପିଂ କରିବେ ନାହିଁ । ପନ୍ତଙ୍କ ସ୍କାନ ରିପୋର୍ଟରେ ଏକ ଫ୍ରାକ୍ଚର ରହିଥିବା କୁହାଯାଉଛି । ତେଣୁ ପ୍ରାୟ ଛଅ ସପ୍ତାହ ପାଇଁ ପଡ଼ିଆ ବାହାରେ ରହିବେ । ଡାକ୍ତର ପନ୍ତଙ୍କୁ ପ୍ରାୟ ଦେଢ଼ ମାସ ବିଶ୍ରାମ ନେବାକୁ ପରାମର୍ଶ ଦେଇଛନ୍ତି ।
ମାଞ୍ଚେଷ୍ଟର ଟେଷ୍ଟ ମ୍ୟାଚର ୬୮ତମ ଓଭରର ଚତୁର୍ଥ ବଲରେ କ୍ରିସ୍ ଓକସଙ୍କ ବଲ ପନ୍ତଙ୍କ ଡାହାଣ ପାଦରେ ଲାଗିଥିଲା । ରିଭର୍ସ ସ୍ୱିପ୍ ଖେଳିବାକୁ ଚେଷ୍ଟା କରିଥିବା ବେଳେ ବଲଟି ସିଧାସଳଖ ତାଙ୍କ ପାଦରେ ବାଜିଥିଲା । ଟିମର ଫିଜିଓମାନେ ମଇଦାନକୁ ଆସି ରିଷଭଙ୍କ ଚିକିତ୍ସା କରିଥିଲେ ।
ପାଦରେ ଗୁରୁତର ସ୍ବେଲିଂ ଦେଖାଯାଇଥିବାରୁ ମେଡିକାଲ୍ ଟିମ୍ ଏକ ଆମ୍ବୁଲାନ୍ସ କାର୍ଟ ଆଣିଥିଲେ । ଏହା ସାହାଯ୍ୟରେ ରିଷଭଙ୍କୁ ମଇଦାନର ବାହାରକୁ ଅଣାଯାଇଥିଲା । ୩୭ ରନରେ ରିଟାୟାର୍ଡ ହର୍ଟ ହୋଇ ପନ୍ତ ମଇଦାନ ଛାଡ଼ିଥିଲେ । ପୂର୍ବରୁ ଲଡ୍ସ ଟେଷ୍ଟରେ ତାଙ୍କ ଆଙ୍ଗୁଠିରେ ଗଭୀର ଆଘାତ ଲାଗିଥିଲା । ଫଳରେ ସେ ୱିକେଟ କିପିଂରୁ ଦୂରେଇ ରହିଥିଲେ ।
ବିସିସିଆଇ X ରେ ପୋଷ୍ଟ କରିଛି କି, ଆହତ ହୋଇଥିବା ରିଷଭ ଇଂଲଣ୍ଡ ସିରିଜରେ ବାକି ଥିବା ମ୍ୟାଚରେ ୱିକେଟ କିପିଂ କରିବେ ନାହିଁ । ତାଙ୍କ ସ୍ଥାନରେ ଧ୍ରୁବ ଜୁରେଲ କିପିଂ କରିବେ । କିନ୍ତୁ ପନ୍ତ ଆବଶ୍ୟକୀୟ ସ୍ଥଳେ ବ୍ୟାଟିଂ କରିବାକୁ ଆସିବେ ।
