ବିଜେପି ସରକାର ଅହଙ୍କାରରେ ଫାଟି ପଡ଼ୁଛି : ତାରା

ଭୁବନେଶ୍ୱର: ଭୁବନେଶ୍ବର: ଆଡ଼ପ ପହଣ୍ଡି ବେଳେ ବଡ଼ ଠାକୁର ବଳଭଦ୍ର ପଡିଯିବା ଜଗନ୍ନାଥ ପ୍ରେମୀଙ୍କ ଭାବାବେଗକୁ ଗଭୀର ଆଘାତ ଦେଇଛି । ବିଶ୍ବର ସମସ୍ତ ଜଗନ୍ନାଥପ୍ରେମୀ ମର୍ମାହତ, ଦୁଃଖିତ ଏବଂ ଲଜ୍ଜିତ । ଘଟଣାକୁ ନେଇ ଉପମୁଖ୍ୟମନ୍ତ୍ରୀ ଏବଂ ଆଇନମନ୍ତ୍ରୀ ଦେଇଥିବା ମନ୍ତବ୍ୟକୁ ଦାୟିତ୍ବହୀନ କହି ତୀବ୍ର ନିନ୍ଦା କରିଛି ବିରୋଧୀ  କଂଗ୍ରେସ ।  ବରିଷ୍ଠ କଂଗ୍ରେସ ବିଧାୟକ ତାରା ବାହିନୀପତି କହିଛନ୍ତି, “ବଡ଼ ଠାକୁର ଖସି ପଡ଼ିବା ଘଟଣା ସାଧାରଣ ନୁହେଁ । ଯିଏ ଏହାକୁ ସାଧାରଣ ବୋଲି କହୁଛନ୍ତି, ତାଙ୍କର ଗର୍ବ ଅହଙ୍କାର ବଢ଼ି ଗଲାଣି । ବିଜେପି ସରକାର ଅହଙ୍କାରରେ ଫାଟି ପଡ଼ୁଛି । ଏହା କେବଳ ନିନ୍ଦନୀୟ ଘଟଣା ନୁହେଁ, ସାରା ରାଜ୍ୟ ପାଇଁ ଏକ ଅଶୁଭ ସଙ୍କେତ । ଆଗକୁ କଣ ଯେ ହେବ କିଛି ଅନୁମାନ କରିହେଉନି । ଏହାର ତଦନ୍ତ ହେଉ । ହାଇକୋର୍ଟର ଜଣେ କାର୍ୟ୍ୟରତ ବିଚାରପତିଙ୍କ ତତ୍ବାବଧାନରେ ତଦନ୍ତ ହେଉ । କେତେଜଣ ସେବାୟତ ରଥରେ ରହିବା ଆବଶ୍ୟକ ରହିଛି, କେତେଜଣ ରହିଥିଲେ, କଣ ପାଇଁ ଏଭଳି ଅଘଟଣ ଘଟିଲା, ସେସବୁର ତଦନ୍ତ ହେଉ ।” ତେବେ ମହାପ୍ରଭୁଙ୍କ ରଥଯାତ୍ରାରେ ଏଭଳି ମନମୁଖୀ କାର୍ୟ୍ୟକଳାପ ଆମେ ବିଧାନସଭାରେ ମଧ୍ୟ ଉଠାଇବୁ ବୋଲି କହିଛନ୍ତି ତାରା ।