ଓଡଗାଁ, 27/4 (ଆଦର୍ଶ କୁମାର ପଟ୍ଟନାୟକ): ନୟାଗଡ଼ ଜିଲ୍ଲା ଓଡ଼ଗାଁ ଏନ ଏ ସିରେ ରକ୍ତଦାନ ନିମନ୍ତେ ଉଦାହରଣ ସୃଷ୍ଟି କରିଥିବା ଜୀବନ ଧାରା ସେବା ଟ୍ରଷ୍ଟ ଆନୁକୂଲ୍ୟରେ ପ୍ରଥମ ପ୍ରତିଷ୍ଠା ଦିବସ ପାଳନ ଅବସରରେ ଗ୍ରୀଷ୍ମ କାଳୀନ ରକ୍ତଦାନ ଶିବିର ରବିବାର ସ୍ଥାନୀୟ ରାମ ସାଗର କଲ୍ୟାଣ ମଣ୍ଡପ ଠାରେ ଅନୁଷ୍ଠିତ ହୋଇଥିଲା । ଟ୍ରଷ୍ଟ ସଦସ୍ୟମାନେ ସ୍ଥାପନ ଦିନଠାରୁ ଠାରୁ ଏକ ବର୍ଷ ଧରି ନିରବଛିନ୍ନ ଭାବେ ଅବିଭକ୍ତ ପୁରୀ, ଗଞ୍ଜାମ, ନୟାଗଡ଼ ଓ ଖୋର୍ଦ୍ଧା ଜିଲ୍ଲାର ବିଭିନ୍ନ ଡାକ୍ତରଖାନାରେ ରୋଗୀ ମାନଙ୍କୁ ଆବଶ୍ୟକ ସମୟରେ ନିୟମିତ ଭାବେ ଜରୁରୀ ସମୟରେ ରକ୍ତଦାନ କରି ଆସୁଥିବା ଜଣାଯାଇଛି | ନୟାଗଡ଼ ଜିଲ୍ଲାରେ ଶତାଧିକ ଥାଲସେମିଆ ଏବଂ ସିକେଲସେଲ ରୋଗୀ ନିୟମିତ ରକ୍ତ ଗ୍ରହଣ କରୁଥିବା ବେଳେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ହେତୁ ରକ୍ତ ସଂଗ୍ରହ ପ୍ରକ୍ରିୟାରେ ବାଧା ଉପୁଜିଥିଲା ।
ଏପରିସ୍ଥଳେ ପାଗର ପ୍ରତିକୂଳ ପରିସ୍ଥିତି ସତ୍ୱେ ଜୀବନ ଧାରା ସେବା ଟ୍ରଷ୍ଟର ସମସ୍ତ କାର୍ଯ୍ୟକର୍ତ୍ତା,ସଭ୍ୟ ଏବଂ ଜିଲ୍ଲା ବ୍ଲଡ଼ ବ୍ୟାଙ୍କର ମିଳିତ ଉଦ୍ୟମରେ ଅନୁଷ୍ଠିତ ରକ୍ତଦାନ ଶିବିରରେ 47 ୟୁନିଟ ରକ୍ତ ସଂଗୃହିତ ହୋଇଥିଲା । ଓଡଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିକାରୀ ଡାକ୍ତର ନୀଳାଞ୍ଜନ ଦାସଙ୍କ ପ୍ରତ୍ୟକ୍ଷ ତତ୍ତ୍ୱବଧାନରେ ବ୍ଲଡ଼ ବ୍ୟାଙ୍କର ସମସ୍ତ ଟିମ ରକ୍ତ ସଂଗ୍ରହରେ ସହଯୋଗ କରିଥିଲେ । କାର୍ଯ୍ୟକ୍ରମର ପ୍ରାରମ୍ଭରେ ପହଲଗାଁରେ ପ୍ରାଣ ହରାଇଥିବା ପର୍ଯ୍ୟଟକଙ୍କ ଆତ୍ମାର ସଦଗତି ନିମନ୍ତେ 2 ମିନିଟ ନୀରବ ପ୍ରାର୍ଥନା କରାଯାଇଥିଲା| ଏହି କାର୍ଯ୍ୟକ୍ରମରେ ବ୍ଲକ ଅଧ୍ୟକ୍ଷ ଲୋକନାଥ ସାହୁ, ସାମ୍ୱାଦିକ ସଂଘ ସଭାପତି ଅଶୋକ କୁମାର ମହାପାତ୍ର, ବରିଷ୍ଠ ସାମ୍ୱାଦିକ ସାରସ ମିଶ୍ରଙ୍କ ସହିତ ବୁଦ୍ଧିଜୀବୀମାନେ କାର୍ଯ୍ୟକ୍ରମରେ ଯୋଗଦେଇ ରକ୍ତଦାତା ମାନଙ୍କୁ ଉତ୍ସାହିତ କରିଥିଲେ| ଟ୍ରଷ୍ଟର ମୁଖ୍ୟ ସୁଶାନ୍ତ କୁମାର ସାହୁ କାର୍ଯ୍ୟକ୍ରମ ପରିଚାଳନା କରିଥିଲା ବେଳେ ଚନ୍ଦନ ପାତ୍ର,ସୁନୀଲ କୁମାର ଭଟ, ଗଜେନ୍ଦ୍ର, ଶ୍ରୀକାନ୍ତ ସାହୁଙ୍କ ସମେତ ସଦସ୍ୟ ମାନେ ସହଯୋଗ କରିଥିଲେ ।
