ଭୁବନେଶ୍ୱର : ଓଡ଼ିଶାରେ ପ୍ରଚଳିତ ହେଉଥିବା ବିଜେଡି ସରକାରଙ୍କ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା (ବିଏସ୍କେୱାଇ)ର ଅବଧି ଆସନ୍ତା ସେପ୍ଟେମ୍ବର ୧୦ ତାରିଖ ପର୍ଯ୍ୟନ୍ତ । ଏହାପରେ ବିଏସ୍କେୱାଇ ବଦଳରେ ଲୋକଙ୍କୁ ଗୋପବନ୍ଧୁ ଜନ ଆରୋଗ୍ୟ ଯୋଜନା ମାଧ୍ୟମରେ ସ୍ୱାସ୍ଥ୍ୟ ସୁବିଧା ମିଳିବ । ତେବେ ବିଏସ୍କେୱାଇରେ ଯେତିକି ସୁବିଧା ମିଳୁଛି ଗୋପବନ୍ଧୁ ଜନ ଆରୋଗ୍ୟ ଯୋଜନାରେ ସମାନ ପ୍ରକାରର ସୁବିଧା ରହିବ ବୋଲି ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ସୂଚନା ଦେଇଛନ୍ତି । ସେ କହିଛନ୍ତି ଯେ ବ୍ୟୟମଞ୍ଜୁରୀ ବିଲ ପାସ୍ ହେଲା ପରେ ନୂଆ କାର୍ଡର ପ୍ରକ୍ରିୟା ଆରମ୍ଭ ହେବ । ଏହାସହ ବିଏସକେୱାଇ କାର୍ଡର ରୂପରେଖ ବଦଳିଯିବ । ବିଏସକେୱାଇ କାର୍ଡ ଏଯାଏଁ ଚାଲୁ ରହିଛି । ସମସ୍ତଙ୍କୁ ଗୋପବନ୍ଧୁ ଜନ ଆରୋଗ୍ୟ କାର୍ଡ ମିଳିବ । ସେପ୍ଟେ୍ର ୧୦ରେ ଆପ୍ରୋପିଏସନ୍ ବିଲ୍ ପାସ୍ ହେବ, ତା ପରେ ପର୍ଯ୍ୟାୟ କ୍ରମେ ଗୋପବନ୍ଧୁ ଆରୋଗ୍ୟ ଯୋଜନା ଲାଗୁହେବ । ପରବର୍ତ୍ତୀ ସମୟରେ ଯୋଜନା ଆସିଲେ ତାହା ଲାଗୁହେବ, ଏବେ ବିଏସକେୱାଇ ଯେମିତି ଚାଲିବା କଥା ଚାଲିବ ବୋଲି ମୁକେଶ ମହାଲିଙ୍ଗ କହିଛନ୍ତି । ରାଜ୍ୟରେ ୩ କୋଟି ୫୬ ଲକ୍ଷ ବିଏସକେୱାଇ କାର୍ଡଧାରୀ ଅଛନ୍ତି । ୯୫୦୯ ହସ୍ପିଟାଲରେ ମାଗଣା ଚିକିତ୍ସା ଯୋଗାଇ ଦିଆଯାଉଛି । ସେଥିରୁ ୮ ହଜାର ୫୩୦ ସରକାରୀ ଓ ୯୭୯ ଘରୋଇ ହସ୍ପିଟାଲ ଅନୁବନ୍ଧିତ ଅଛନ୍ତି । ୨୦୧୮ ଅଗଷ୍ଟ ୧୫ରେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଆରମ୍ଭ କରିଥିଲେ ପୂର୍ବତନ ବିଜେଡି ସରକାର । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ଗତ ୫ବର୍ଷ ମଧ୍ୟରେ ଖର୍ଚ୍ଚ ୭୬ ଗୁଣରୁ ଅଧିକ ବୃଦ୍ଧି ପାଇଛି । ୨୦୧୯ ମସିହାରେ ଆରମ୍ଭ ହୋଇଥିବା ଏହି ଯୋଜନାରେ ସେହି ଆର୍ôଥକ ବର୍ଷରେ ୪୧ କୋଟିରୁ ଅଧିକ ଅର୍ଥ ବ୍ୟୟ ହୋଇଥିବାବେଳେ ୨୦୨୩-୨୪ ବର୍ଷରେ ତାହା ୩୨୦୪ କୋଟି ଟଙ୍କାକୁ ଟପିଯାଇଛି । ଏହି ଯୋଜନାରେ ୨୦୧୯-୨୦ ବର୍ଷରେ ୪୧,୨୨,୧୪,୭୩୦ ଟଙ୍କା ବ୍ୟୟ ହୋଇଥିଲା । ଏହା ପରବର୍ଷ ଅର୍ଥାତ୍ ୨୦୨୦-୨୧ ବର୍ଷରେ ଏହା ୭୯ କୋଟି ୪୨ଲକ୍ଷ ଟଙ୍କାକୁ ଟପିଯାଇଥିଲା । ସେହିଭଳି ଏହି ଯୋଜନାର ବ୍ୟୟଭାର ୨୦୨୧-୨୨ ବର୍ଷରେ ୩୮୦ କୋଟି ଟଙ୍କା ଥିଲା । ରୋଗୀମାନଙ୍କ ଚିକିତ୍ସା ବାବଦରେ ୩୮୦,୫୭,୬୫,୪୪୫ ଟଙ୍କା ବ୍ୟୟ ହୋଇଥିଲା । ୨୦୨୨-୨୩ ବର୍ଷରେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ଖର୍ଚ୍ଚ ୧୯୦୭ କୋଟି ଟଙ୍କାକୁ ଟପିଥିବାବେଳେ ୨୦୨୩-୨୪ ବର୍ଷରେ ଏହା ୩୨୦୪ କୋଟି ୫୮ ଲକ୍ଷ ଟଙ୍କାକୁ ଅତିକ୍ରମ କରିଯାଇଛି । ଚଳିତବର୍ଷ ଆର୍ଥକ ବର୍ଷର ପ୍ରଥମ ତିନିମାସ ଅର୍ଥାତ୍ ଜୁନ୍ ଶେଷସୁଦ୍ଧା ଏ ବାବଦରେ ୯୭୧ କୋଟି ୧୮ଲକ୍ଷ ଟଙ୍କାରୁ ଅଧିକ ବ୍ୟୟହୋଇ ସାରିଲାଣି । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ରାଜ୍ୟ ସରକାର ପ୍ରଥମେ ପ୍ରତ୍ୟେକ ବ୍ୟକ୍ତିଙ୍କ ପାଇଁ ୫ ଲକ୍ଷ ଟଙ୍କାର ସ୍ୱାସ୍ଥ୍ୟସେବା ଯୋଗାଉଥିବାବେଳେ ପରବର୍ତ୍ତୀ ସମୟରେ ପୁରୁଷଙ୍କ ପାଇଁ ୫ ଲକ୍ଷ ଓ ମହିଳାଙ୍କ ପାଇଁ ଏହାକୁ ୭ଲକ୍ଷ ଟଙ୍କାକୁ ବୃଦ୍ଧି କରିଥିଲେ । ଏହାପରେ ମହିଳାଙ୍କ କ୍ଷେତ୍ରରେ ୧୦ଲକ୍ଷ ଟଙ୍କାକୁ ବୃଦ୍ଧି ପାଇଥିଲା । ଏହି ଯୋଜନାରେ ଲୋକେ ରାଜ୍ୟ ଭିତରେ ଓ ରାଜ୍ୟ ବାହାରେ ଥିବା ଅନେକ ଘରୋଇ ଡାକ୍ତରଖାନାରେ ଚିକିତ୍ସାସେବା ପାଇପାରୁଛନ୍ତି । ଏଥିପାଇଁ ରାଜ୍ୟ ସରକାର ବିଭିନ୍ନ ଘରୋଇ ଡାକ୍ତରଖାନା ସହିତ ଚୁକ୍ତିବଦ୍ଧ ହୋଇଛନ୍ତି ।
ସେପ୍ଟେମ୍ବର ୧୦ପର୍ଯ୍ୟନ୍ତ ଜାରି ରହିବ ବିଏସ୍କେୱାଇ
