ନୂଆଦିଲ୍ଲୀ: ୨୦୨୪ ଲୋକସଭା ନିର୍ବାଚନ ଘୋଷଣା ହେବାର ଠିକ୍ ପୂର୍ବରୁ କେନ୍ଦ୍ର ସରକାର ନାଗରିକତ୍ୱ ସଂଶୋଧନ ଅଧିନିୟମ (CAA) କାର୍ଯ୍ୟକାରୀ କରିଛନ୍ତି। ଆଜି ସରକାର ଏ ସମ୍ପର୍କରେ ବିଜ୍ଞପ୍ତି ଜାରି କରିଛନ୍ତି। ଡିସେମ୍ବର ୨୦୧୯ ରେ CAA ସଂସଦ ଦ୍ୱାରା ଅନୁମୋଦିତ ହୋଇଥିଲା। ଚାରି ବର୍ଷ ପରେ ଏହାକୁ କାର୍ଯ୍ୟକାରୀ କରାଯାଇଛି। CAA ନିୟମାବଳୀ ଜାରି ହେବା ପରେ ବର୍ତ୍ତମାନ ପାକିସ୍ତାନ, ଆଫଗାନିସ୍ତାନ, ବାଂଲାଦେଶରୁ ଆସିଥିବା ହିନ୍ଦୁ ଏବଂ ଶିଖମାନେ ନାଗରିକତ୍ୱ ପାଇବେ।ଗୃହ ମନ୍ତ୍ରଣାଳୟ ଏକ ବିବୃତ୍ତି ଜାରି କରି କହିଛି ଯେ, ଆବେଦନଗୁଡ଼ିକ ସମ୍ପୂର୍ଣ୍ଣ ରୂପେ ଅନଲାଇନ୍ ମୋଡରେ ଦାଖଲ ହେବ, ଯେଉଁଥି ପାଇଁ ଏକ ୱେବ୍ ପୋର୍ଟାଲ୍ ଉପଲବ୍ଧ କରାଯାଇଛି। ନାଗରିକତ୍ୱ ସଂଶୋଧନ ଅଧିନିୟମ (CAA) ଅନୁଯାୟୀ, ଡିସେମ୍ବର ୩୧, ୨୦୧୪ ପୂର୍ବରୁ ଭାରତରେ ସ୍ଥିର ହୋଇଥିବା ବାଂଲାଦେଶ, ପାକିସ୍ଥାନ ଏବଂ ଆଫଗାନିସ୍ତାନର ହିନ୍ଦୁ, ଶିଖ, ଜୈନ, ବୌଦ୍ଧ, ପାର୍ସି ଏବଂ ଖ୍ରୀଷ୍ଟିଆନଙ୍କ ସମେତ ନିର୍ଯାତନାର ସମ୍ମୁଖୀନ ହୋଇଥିବା ଅଣ-ମୁସଲମାନ ପ୍ରବାସୀ ଭାରତୀୟଙ୍କୁ ଭାରତୀୟ ନାଗରିକତ୍ୱ ପ୍ରଦାନ କରାଯିବ। ୨୦୧୯ ରେ ଏହା ସଂସଦ ଦ୍ଵାରା ପାରିତ ହୋଇଥିଲା। ଏହା ମଧ୍ୟ ରାଷ୍ଟ୍ରପତିଙ୍କ ଅନୁମୋଦନ ଲାଭ କରିଛି। ଏହି ବିଲ୍ ଭାରତର କୌଣସି ସଂଖ୍ୟାଲଘୁଙ୍କ ବିରୁଦ୍ଧରେ ନୁହେଁ ଏବଂ ପ୍ରତ୍ୟେକ ଭାରତୀୟ ନାଗରିକଙ୍କ ଅଧିକାର ସମାନ ଭାବରେ ସୁରକ୍ଷିତ ରହିବ। ତେବେ ଦେଶରେ କାର୍ଯ୍ୟକାରୀ ହୋଇଥିବା ନାଗରିକତା (ସଂଶୋଧନ) ବିଲ୍ ୨୦୧୯ (CAA) କୁ ବିରୋଧ କରି ବିଧାନସଭାରେ ୬ ଟି ରାଜ୍ୟରୁ ଏକ ସଂକଳ୍ପ ପାରିତ ହୋଇଛି। ଏଥିମଧ୍ୟରେ ମୁଖ୍ୟତଃ କେରଳ ବିଧାନସଭା, ପଞ୍ଜାବ ବିଧାନସଭା, ରାଜସ୍ଥାନ ବିଧାନସଭା, ପଶ୍ଚିମବଙ୍ଗ ବିଧାନସଭା, ପୁଡୁଚେରୀ ବିଧାନସଭା ଏବଂ ତେଲେଙ୍ଗାନା ବିଧାନସଭା ଅନ୍ତର୍ଭୁକ୍ତ।
