ଓଡଗାଁ, 1/7 (ଆଦର୍ଶ ପଟ୍ଟନାୟକ ) ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକ ଓ ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ଥିବା 21 ନମ୍ବର ରାଜ୍ୟ ରାଜପଥ ଦରପଦା ଠାରୁ ଓଡ଼ଗାଁ ଶ୍ରୀରଘୁନାଥଜିଉ ମନ୍ଦିରକୁ ସଂଯୋଗ କରୁଥିବା 12 କିମି ପକ୍କା ସଡ଼କ ଅତ୍ୟନ୍ତ ବିପଦପୂର୍ଣ୍ଣ ରାସ୍ତାରେ ପରିଣତ ହେବା ସହିତ ମରଣ ଯନ୍ତା ପାଲଟିଛି | ପ୍ରାୟ ଦୁଇ ତିନି ବର୍ଷ ବ୍ୟବଧାନରେ ଦୁଇଟି ପର୍ଯ୍ୟାୟରେ ଦୁଇ ଯନ୍ତ୍ରୀଙ୍କ ତତ୍ୱାବଧାନରେ ଏହି ରାସ୍ତାକୁ ନବୀକରଣ କରାଯାଇଥିଲା | ଫଳରେ ଓଡଗାଁକୁ ପ୍ରଭୁ ଶ୍ରୀରଘୁନାଥଜିଉଙ୍କୁ ଦର୍ଶନ କରିବାକୁ ଦୈନିକ ଆସୁଥିବା ଶ୍ରଦ୍ଧାଳୁ ଗୁଗୁଲ ମ୍ୟାପରେ ସାହାଯ୍ୟରେ ଏବଂ ଅନେକ ବରିଷ୍ଠ କାର କିମ୍ବା 2 ଚକିଆ ଚାଳକ ଶତାଧିକ ରମ୍ବଲର ହମ୍ପସ ବଦଳରେ ଭାୟା ଶରଣକୂଳ ହୋଇ ନୟାଗଡ଼ କିମ୍ବା ଆଗକୁ ଯିବା ପରିବର୍ତ୍ତେ ଦରପଦା -ଓଡଗାଁ ରାସ୍ତାକୁ ପ୍ରଥମ ପସନ୍ଦ କରିଥାନ୍ତି | ହେଲେ ଗ୍ରାମ୍ୟ ଉନ୍ନୟନ ଢାଞ୍ଚା ବା ଅନୁଦାନ ଅନୁସାରେ ନିର୍ମାଣ ହୋଇଥିବା ଏହି ରାସ୍ତାରେ ସବୁ ପ୍ରକାର ଯାନବାହାନ ଚଳାଚଳ କରୁଥିବା ବେଳେ ଦିନ ରାତି ଏହି ରାସ୍ତାରେ ବେଆଇନ ଭାବେ ବାଲି ବୋଝଇ ହାଇୱା ଭଳି ଭାରି ଯାନ ନିର୍ଦ୍ୱନ୍ଦ୍ୱରେ ଯିବା ଆସିବା କରୁଥିବା କାରଣରୁ ଏହି ରାସ୍ତାର ଅନେକ ଜାଗାରେ ବିପଦ ପୁର୍ଣ ଭାବେ ଖାଲ ଖମା ସୃଷ୍ଟି ହେଲାଣି |
ଅନ୍ୟପକ୍ଷେ ଏହି ରାସ୍ତାର ନବୀକରଣ ପରେ ଏହାକୁ ମରାମତି କରିବାକୁ ଠିକାଦାରଙ୍କ 5 ବର୍ଷ ଚୁକ୍ତି ରହିଥିବା କୁହା ଯାଉଥିବା ବେଳେ ଏହାକୁ ମରାମତି କରିବାକୁ ଆଦୌ ବିଭାଗୀୟ ନିଷ୍ଠା ନଥିବା ଅଭିଯୋଗ ହେଉଛି | ବରଂ କେମିତି 5 ବର୍ଷ ଅବଧି ପରେ ପୁଣି ଏଜ ଫ୍ରେସ ଟେଣ୍ଡର କରିବାକୁ ବିଭାଗୀୟ ଚେଷ୍ଟା ରହିଥିବା ଆଲୋଚନା ହେଉଛି | ଏପରିକି ରାସ୍ତା ସାରା ଖାଲଖମା ବାଟୋଇଙ୍କୁ ଦୈନିକ ବିପଦରେ ପକାଉଥିବା ବେଳେ ରାସ୍ତାର ଉଭୟ ପାର୍ଶ୍ୱରେ ଥିବା ପୁରୁଣା ଚାକୁଣ୍ଡା ଗଛଡାଳ ଭାଙ୍ଗି ଅନେକ ସମୟରେ ଲୋକେ ଅଘୋଷିତ ରାସ୍ତା ଅବରୋଧର ସମ୍ମୁଖୀନ ହୁଅନ୍ତି | ସ୍ଥାନୀୟ ଲୋକଙ୍କ ଆଉ ଜାଳେଣୀ ଆବଶ୍ୟକ ହେଉନଥିବା କାରଣରୁ ରାସ୍ତାରେ ପଡ଼ିଥିବା କାଠ କୌଣସି ଲୋକଙ୍କ କାମରେ ଆସୁନଥିବାରୁ ଅନେକାଂଶରେ ସ୍ଥାନୀୟ ଦମକଳ ବାହିନୀ ଦ୍ୱାରା ରାସ୍ତା ଅବରୋଧ ହଟିଥାଏ | ହେଲେ ବିପଦପୂର୍ଣ୍ଣ ଅବସ୍ଥାରେ ଶତାଧିକ ଦରଭଙ୍ଗା ଚାକୁଣ୍ଡା ଡାଳ ଅଦ୍ୟାବଧି ଖଣ୍ଡା ସଦୃଶ ରାସ୍ତା ଉପରେ ଗଛରେ ଲଟକି ରହିଛି | କେତେବେଳେ ହେଲେ ରାସ୍ତାରେ ଯାଉଥିବା ଆରୋହୀଙ୍କ ଉପରେ ସାମାନ୍ୟ ପବନ ବହିଲେ ମୁଣ୍ଡ ଉପରେ କିମ୍ବା ଯାନବାହାନ ଉପରେ ପଡି ମୁଣ୍ଡ ନେବା ସମ୍ଭବନା ସୃଷ୍ଟି ହୋଇଥିବା ଶିକ୍ଷାବିତ୍ ଚିତ୍ତରଞ୍ଜନ ତ୍ରିପାଠୀ ଆଶଙ୍କା ପ୍ରକାଶ କରିଛନ୍ତି | ଏ ସମ୍ପର୍କରେ ଓଡ଼ଗାଁ ଆରଡ଼ି ସେକ୍ସନ ଦାୟିତ୍ୱରେ ଥିବା ରଣପୁର ସହକାରୀ ନିର୍ବାହୀ ଯନ୍ତ୍ରୀ ଦିଲୀପ କୁମାର ବରାଡ଼ଙ୍କ ଦୃଷ୍ଟି ଆକର୍ଷଣ କରିବାରେ ରାସ୍ତା ପୁନଃ ନିର୍ମାଣ ନିମନ୍ତେ ଫ୍ରେସ ଟେଣ୍ଡର ପ୍ରକ୍ରିୟା ଆରମ୍ଭ ହୋଇଥିବା ସୂଚନା ଦେଇଥିବା ବେଳେ ଲଟକିଥିବା ଡାଳ କାଟି ସଫା ନିମନ୍ତେ ଖୁବ ଶୀଘ୍ର ବିଭାଗୀୟ ଉଦ୍ୟମ କରିବାକୁ ପ୍ରତିଶୃତି ଦେଇଛନ୍ତି | ହେଲେ ଲୋକଙ୍କ ମୁଣ୍ଡ ଉପରେ ଝୁଲୁଥିବା ଶତାଧିକ ଖଣ୍ଡା ସଦୃଶ ଡାଳ କାଟିବା ଓ ଲୋକଙ୍କୁ ଆକସ୍ମିକ ମୃତ୍ୟୁ ମୁଖରୁ ରକ୍ଷା କରିବାକୁ ବିଭାଗ କେତେ ତତ୍ପର ଫଳେନ ପରିଚୟତେ ଅର୍ଥାତ ସମୟକୁ ଅପେକ୍ଷା ରହିବ |
