ରଣପୁର, ୨୨/୧୦ : ରାଷ୍ଟ୍ରୀୟ ଶିକ୍ଷକ ଅନୁସନ୍ଧାନ ଓ ପ୍ରଶିକ୍ଷଣ ପରିଷଦ (NCERT) ନିରନ୍ତର ଭାବରେ ଗୁଣାତ୍ମକ ଶିକ୍ଷା ନିମନ୍ତେ ବିଭିନ୍ନ କ୍ଷେତ୍ରରେ କାର୍ଯ୍ୟ କରି ଆସୁଅଛି | ଜାତୀୟ ଶିକ୍ଷାନୀତି ୨୦୨୦ ର ଲକ୍ଷ୍ୟକୁ ସୁଦୃଢ କରିବା ପାଇଁ ଶିକ୍ଷକ ଶିକ୍ଷା ବିଭାଗ (DTE) ଦେଶର ବିଭିନ୍ନ ରାଜ୍ୟର ସ୍କୁଲଗୁଡିକର ଅନୁଭବ ଆଧାରିତ ଶିକ୍ଷା ସମ୍ପର୍କିତ ଗବେଷଣା କାର୍ଯ୍ୟ କରୁଛି | ଏହି ଅଧ୍ୟୟନ ଅନୁଯାୟୀ ମାଧ୍ୟମିକ ସ୍ତର ଶ୍ରେଣୀ ( ଷଷ୍ଠ ରୁ ଅଷ୍ଟମ) ର ୨୫ଟି ସ୍କୁଲ ଚୟନ ହେବା ସହିତ ଓଡ଼ିଶାର କନ୍ଧମାଳ, ବୌଦ୍ଧ, ନୟାଗଡ, ପୁରୀ ଓ ଖୋର୍ଦ୍ଧା ଜିଲ୍ଲାକୁ ଚିହ୍ନଟ କରାଯାଇଛି | ନୟାଗଡ ଜିଲ୍ଲାର ତଥ୍ୟ ସଂଗ୍ରହ କାର୍ଯ୍ୟରେ ସହଯୋଗ ପାଇଁ TE & SCERT ଓଡିଶା ତରଫରୁ ନୟାଗଡ ଜିଲ୍ଲା ଶିକ୍ଷକ ପ୍ରଶିକ୍ଷଣ ଓ ଶିକ୍ଷା ପ୍ରତିଷ୍ଠାନ ତରଫରୁ ଶିକ୍ଷକ ପ୍ରଶିକ୍ଷକ ବଟକୃଷ୍ଣ ସାହୁ ଓ ଅନିନ୍ଦିତା ପ୍ରିୟଦର୍ଶିନୀଙ୍କୁ ଚୟନ କରିଛନ୍ତି | ଏହି ତଥ୍ୟ ସଂଗ୍ରହ କାର୍ଯ୍ୟ ପାଇଁ ଜିଲ୍ଲାରୁ ୫ଟି ବିଦ୍ୟାଳୟକୁ ମନୋନୀତ କରାଯାଇଅଛି |
ଏହି କାର୍ଯ୍ୟଟି ଚଳିତ ଅକ୍ଟୋବର ୧୩ ତାରିଖ ଠାରୁ ଆରମ୍ଭ ହୋଇ ୧୭ ତାରିଖ ପର୍ଯ୍ୟନ୍ତ ଚାଲିଥିଲା | ବାମନ ଅବକାଶ ସରକାରୀ ଉଚ୍ଚ ବିଦ୍ୟାଳୟ, ଇଟାମାଟି, ପି.ଏମ.ଶ୍ରୀ. ସୋଲପଟା ଉଚ୍ଚ ବିଦ୍ୟାଳୟ, ଗୋବିନ୍ଦପୁର ଭାଗିରଥି ସରକାରୀ ଉଚ୍ଚ ବିଦ୍ୟାଳୟ, ନୟାଗଡ କେନ୍ଦ୍ରୀୟ ବିଦ୍ୟାଳୟ ଓ ନୟାଗଡ ଜବାହର ନବୋଦୟ ବିଦ୍ୟାଳୟ ନାମକ ପାଞ୍ଚଟି ବିଦ୍ୟାଳୟକୁ ଏହି କାର୍ଯ୍ୟକ୍ରମ ନିମନ୍ତେ ମନୋନୀତ କରାଯାଇଛି | ଏଥି ମଧ୍ୟରୁ ନୟାଗଡ ଜବାହର ନବୋଦୟ ବିଦ୍ୟାଳୟରେ ଆସନ୍ତା ଅକ୍ଟୋବର ୨୮ ତାରିଖ ଦିନ ତଥ୍ୟ ସଂଗ୍ରହ କରିବା ପାଇଁ ଦିନ ଧାର୍ଯ୍ୟ କରାଯାଇଅଛି | ଏହା ବ୍ୟତୀତ ଉପରୋକ୍ତ ୪ଟି ବିଦ୍ୟାଳୟରୁ ସୁଚାରୁରୂପେ ପ୍ରଧାନଶିକ୍ଷକ ମାନଙ୍କ ସହଯୋଗରେ କାର୍ଯ୍ୟକ୍ରମ ସମପନ୍ନ କରାଯାଇଛି | ଏହି କାର୍ଯ୍ୟରେ ସହାୟତା କରିବା ନିମନ୍ତେ ନୂଆଦିଲ୍ଲୀ ଆସୋସିଏଟ ପ୍ରଫେସର ଡ଼. ଭାବଗ୍ରାହୀ ପ୍ରଧାନ ମଧ୍ୟ ଉପସ୍ଥିତ ଥିଲେ | ଏହା NCERT ର ଏକ ସକାରାତ୍ମକ ପ୍ରୟାସ, ଯାହା ଶିକ୍ଷାକୁ ଅଧିକ ଗୁଣାତ୍ମକ ଓ ଅଭିଜ୍ଞତା ମୂଳକ ଗବେଷଣାତ୍ମକ ଓ ବାସ୍ତବତା କାର୍ଯ୍ୟକୁ ଆଗେଇ ନେବା ସହିତ ଶିକ୍ଷାନୀତି କୁ ଦୃଢ଼ିଭୂତ କରିବ ବୋଲି ଜିଲ୍ଲା ଶିକ୍ଷକ ପ୍ରଶିକ୍ଷଣ ଓ ଶିକ୍ଷା ପ୍ରତିଷ୍ଠାନର ଅଧ୍ୟକ୍ଷ ଡ଼. ବିଜୟ କୁମାର ତ୍ରିପାଠୀ ମତ ଦେଇଛନ୍ତି |
