ନୂଆଦିଲ୍ଲୀ: ନୂଆବର୍ଷରେ ଚାଷୀଙ୍କ ପାଇଁ ଖୁସି ଖବର । ଚାଷୀଙ୍କୁ ଅତିରିକ୍ତ ସବସିଡି ସହ ପିଏମ ଫସଲ ବୀମା ଆବଣ୍ଟନ ରାଶି ବଢାଇଲେ କେନ୍ଦ୍ର ସରକାର । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ହୋଇଥିବା କ୍ୟାବିନେଟ୍ ବୈଠକରେ ଏହି ନିଷ୍ପତ୍ତିରେ ମୋହର ବାଜିଛି । ପିଏମ ଫସଲ ବୀମା ଆବଣ୍ଟନକୁ ୬୯, ୫୧୫ କୋଟିକୁ ବୃଦ୍ଧି କରାଯାଇଥିବା ନେଇ ସୂଚନା ଦେଇଛନ୍ତି କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କୃଷି ଓ କୃଷକଙ୍କ ବିକାଶ ଲକ୍ଷ୍ୟ ନେଇ ଅନେକ ଯୋଜନା କରିଛନ୍ତି । ଏଥିରେ ବୀମା ଏକ ପ୍ରମୁଖ ଯୋଜନା ଭାବେ ଅନ୍ତର୍ଭୁକ୍ତ । ଏହାଦ୍ବାରା ୪ କୋଟି ଚାଷୀଙ୍କୁ ଲାଭ ମିଳିବ । ଫସଲ ବୀମା ଯୋଜନାର ଲାଭ ଛୋଟ ଚାଷୀଙ୍କୁ ମଧ୍ୟ ମିଳିବ । ଫସଲ ବୀମା ଯୋଜନା ନୂଆ ସ୍ତରରେ ଚାଷୀଙ୍କୁ ଦିଆଯିବ । ଏହି ଯୋଜନା ଯୋଗୁଁ ଚାଷୀଙ୍କ ଅବସ୍ଥାରେ ସୁଧାର ଆସିବ । ୟୁପିଏ ସରକାରଙ୍କ ଏହି ସ୍କିମ ଚାଷୀଙ୍କ ପାଇଁ ଠିକ୍ ଭାବେ କାମ କରୁନାହିଁ । ତେଣୁ ଫସଲ ବୀମା ଯୋଜନାକୁ ସରଳ କରିବାକୁ ଏହାର ନିୟମ ଏବଂ ନିୟମାବଳୀରେ ସଂଶୋଧନ କରାଯିବ । ଶସ୍ତା ମୂଲ୍ୟରେ ଏବଂ ସହଜ ନିୟମ ଅନୁଯାୟୀ ଫସଲ ବୀମାଭୁକ୍ତ ହେବା ପାଇଁ ବ୍ୟବସ୍ଥା କରାଯିବ । ସେହିପରି ଡିଏପି ସାର ଉତ୍ପାଦନ କରୁଥିବା କମ୍ପାନିଗୁଡିକ ପାଇଁ ସରକାର ଏକ ସ୍ୱତନ୍ତ୍ର ପ୍ୟାକେଜ୍ ଅନୁମୋଦନ କରିଛନ୍ତି । ସବସିଡି ବ୍ୟତୀତ ସରକାର କମ୍ପାନିମାନଙ୍କୁ ଆର୍ଥିକ ସହାୟତା ମଧ୍ୟ ପ୍ରଦାନ କରିବେ । ଡିଏପି ସାରକୁ ୧୩୫୦ ଟଙ୍କାରେ ଦେବାକୁ ନିଷ୍ପତ୍ତି ହୋଇଛି । ଯାହାର ଦାମ୍ ୩୦୦୦ ଟଙ୍କା ଥିଲା । ଏଥିପାଇଁ ୩୮୫୦ କୋଟି ଟଙ୍କାର ସବସିଡି ଦିଆଯିବ । ଏଥିସହ ଅନ୍ୟ ସବୁ କ୍ଷେତ୍ରରେ ମଧ୍ୟ କୃଷକଙ୍କୁ ଅତିରିକ୍ତ ସବସିଡି ଦେବାକୁ କ୍ୟାବିନେଟ ନିଷ୍ପତ୍ତି ନେଇଛି । ୩୧ ଡିସେମ୍ବର ୨୦୨୫ ପର୍ଯ୍ୟନ୍ତ ସରକାର ଏହି ପ୍ୟାକେଜକୁ ଅନୁମୋଦନ କରିଛନ୍ତି । ସୂଚନାଯୋଗ୍ୟ, ଭାରତ ମୋଟ ଡିଏପିର ଏକ ବଡ଼ ଅଂଶ ଆମଦାନି କରେ । ଆମଦାନୀ ମୁଖ୍ୟତଃ ଚୀନ୍, ସାଉଦି ଆରବ ଏବଂ ମରୋକୋ ଭଳି ଦେଶରୁ କରାଯାଇଥାଏ । ଅନ୍ତର୍ଜାତୀୟ ବଜାରରେ କଞ୍ଚାମାଲର ମୂଲ୍ୟ ବୃଦ୍ଧି ଯୋଗୁ ଡିଏପିର ମୂଲ୍ୟ ବୃଦ୍ଧି ହୋଇଥାଏ । ଏଭଳି ପରିସ୍ଥିତିରେ ଚାଷୀଙ୍କୁ ଆଶ୍ବସ୍ତି ଯୋଗାଇବା ପାଇଁ ସରକାର ସବସିଡି ପ୍ରଦାନ କରୁଛନ୍ତି ।
ବଢିଲା ପିଏମ ଫସଲ ବୀମା ଆବଣ୍ଟନ ରାଶି, ଡିଏପିରେ ମିଳିବ ସବସିଡି
