ନୂଆଦିଲ୍ଲୀ: ହର୍ମୁଜ ପ୍ରଣାଳୀ ଖୋଲିବାକୁ ଇରାନର ସର୍ତ୍ତ । ଆମେରିକା ପକ୍ଷରୁ ଯୁଦ୍ଧବିରତି ଘୋଷଣା ହେବା ପରେ ଇରାନର ‘ଉଚ୍ଚସ୍ତରୀୟ ଜାତୀୟ ସୁରକ୍ଷା ପରିଷଦ’ ଏହାକୁ ଗ୍ରହଣ କରିଛି । ଇରାନର ବୈଦେଶିକ ମନ୍ତ୍ରୀ ଆବାସ ଆରାଗଚି କହିଛନ୍ତି ଯେ, ଯଦି ଆମେରିକା ଏବଂ ଇସ୍ରାଏଲ୍ ଇରାନ ଉପରେ ଆକ୍ରମଣ ବନ୍ଦ କରନ୍ତି, ତେବେ ଇରାନର ସେନା ମଧ୍ୟ ସେମାନଙ୍କର ପ୍ରତିରକ୍ଷା ଅପରେସନ୍ ବନ୍ଦ ରଖିବ । ଇରାନ ଆଗାମୀ ଦୁଇ ସପ୍ତାହ ପାଇଁ ‘ହରମୁଜ ପ୍ରଣାଳୀ’ ଦେଇ ଜାହାଜ ଚଳାଚଳକୁ ଅନୁମତି ଦେବ । କିନ୍ତୁ ଏଥିପାଇଁ ତେଲବାହୀ ଜାହାଜଗୁଡ଼ିକୁ ଇରାନ ସେନା ସହ ସମନ୍ୱୟ ରଖିବାକୁ ପଡ଼ିବ। ତେବେ କିଛି ବୈଷୟିକ ସମସ୍ୟା ଯୋଗୁଁ ଏହି ପ୍ରକ୍ରିୟା ଧୀରେ ଧୀରେ ଆରମ୍ଭ ହେବ।
ଇରାନ ଏକ ‘୧୦-ପଏଣ୍ଟ’ ଶାନ୍ତି ପ୍ରସ୍ତାବ ଦେଇଛି, ଯାହାକୁ ଆମେରିକା ଆଲୋଚନା ପାଇଁ ଆଧାର ଭାବେ ଗ୍ରହଣ କରିଛି । ଏହି ପ୍ରସ୍ତାବ ଉପରେ ଆସନ୍ତା ଶୁକ୍ରବାର ଇସଲାମାବାଦରେ ବିସ୍ତୃତ ଆଲୋଚନା ହେବ । ଇରାନ ପକ୍ଷରୁ ପାକିସ୍ତାନର ପ୍ରଧାନମନ୍ତ୍ରୀ ଏବଂ ସେନାମୁଖ୍ୟଙ୍କୁ ଧନ୍ୟବାଦ ଦିଆଯାଇଛି, ଯେଉଁମାନେ ଏହି ଯୁଦ୍ଧ ରୋକିବା ପାଇଁ ମଧ୍ୟସ୍ଥତା କରିଥିଲେ । ଇରାନ ସ୍ପଷ୍ଟ କରିଛି ଯେ ଏହା କେବଳ ଏକ ଅସ୍ଥାୟୀ ବିରତି । ଯଦି ଆମେରିକା ସେମାନଙ୍କ ଉପରୁ ଆର୍ଥିକ କଟକଣା ନ ହଟାଏ କିମ୍ବା ସେନା ପ୍ରତ୍ୟାହାର ନକରେ, ତେବେ ପରିସ୍ଥିତି ପୁଣି ବଦଳିପାରେ । ଇରାନ ଏହି ୧୪ ଦିନିଆ ସମୟକୁ ନିଜର ଶକ୍ତି ପ୍ରଦର୍ଶନ ଏବଂ କୂଟନୈତିକ ସୁଯୋଗ ଭାବେ ଦେଖୁଛି । ସେମାନଙ୍କର ମୁଖ୍ୟ ଦାବି ହେଉଛି ସମ୍ପୂର୍ଣ୍ଣ ସୁରକ୍ଷା ଏବଂ କଟକଣାରୁ ମୁକ୍ତି ।
