କୋଲକାତା: ତୃଣ ମୂଳ କଂଗ୍ରେସ ସାଧାରଣ ସମ୍ପାଦକ ତଥା ଡାୟମଣ୍ଡ ହାର୍ବରରୁ ଲୋକସଭା ସାଂସଦ ଅଭିଷେକ ବାନାର୍ଜୀଙ୍କୁ କୋଲକାତା ପୋଲିସ ରବିବାର ନୂଆ ନୋଟିସ୍ ଜାରି କରିଛି। ଏଥିରେ ତାଙ୍କୁ ୧୨ ଅକ୍ଟୋବର ସୋମବାର ପଚରା ଉଚରା ପାଇଁ ହାଜର ହେବାକୁ କୁହାଯାଇଛି। ଏହି ମାମଲା ଅଗଷ୍ଟ ୨୭ ତାରିଖରେ ସେଣ୍ଟ୍ରାଲ କୋଲକାତାର କ୍ୟାମାକ ଷ୍ଟ୍ରିଟ୍ ସ୍ଥିତ ତାଙ୍କ କାର୍ଯ୍ୟାଳୟରେ ପାର୍ଟି କାର୍ଯ୍ୟକର୍ତ୍ତା, ପୋଲିସ କର୍ମଚାରୀ ଓ କୋଲକାତା ନଗର ନିଗମ (କେଏମସି) କର୍ମଚାରୀଙ୍କ ମଧ୍ୟରେ ହୋଇଥିବା ଝଗଡ଼ା ସମ୍ପର୍କିତ।
କେଏମସି କର୍ମଚାରୀ ପୋଲିସ ସହିତ ଅଭିଷେକ ବାନାର୍ଜୀଙ୍କ କାର୍ଯ୍ୟାଳୟରେ ଲାଗିଥିବା କଥିତ ଅବୈଧ ହୋର୍ଡିଂ ହଟାଇବାକୁ ପହଞ୍ଚିଥିଲେ। ତେବେ ଏହାକୁ ନେଇ ସେଠାରେ ଉତ୍ତେଜନା ପ୍ରକାଶ ପାଇବା ସହିତ ଝଗଡ଼ା ଭଳି ପରିସ୍ଥିତି ଉପୁଜିଥିଲା। ତାଜା ନୋଟିସ୍ ରେ ଅଭିଷେକଙ୍କୁ ସେକ୍ସପିୟର ସାରଣୀ ପୋଲିସ ଷ୍ଟେସନକୁ ପଚରା ଉଚରା ନିମନ୍ତେ ଆସିବାକୁ କୁହାଯାଇଛି। କାରଣ କ୍ୟାମାକ୍ ଷ୍ଟ୍ରିଟ୍ ସ୍ଥିତ ତାଙ୍କ କାର୍ଯ୍ୟାଳୟ ଏହି ପୋଲିସ ଥାନା ଅଞ୍ଚଳରେ ଆସୁଛି। ରବିବାର ମଧ୍ୟାହ୍ନରେ ସେକ୍ସପିୟର ସାରଣୀ ପୋଲିସର ଏକ ଟିମ ଦକ୍ଷିଣ କୋଲକାତାର କାଲିଘାଟସ୍ଥିତ ଅଭିଷେକଙ୍କ ଘରକୁ ଆସି ନୋଟିସ୍ ଦେଇଯାଇଛି।
ଏହା ପୂର୍ବରୁ ଅକ୍ଟୋବର ୮ ତାରିଖ ଦିନ ମଧ୍ୟ ପଚରା ଉଚରା ପାଇଁ ଅଭିଷେକଙ୍କୁ ନୋଟିସ୍ ଦିଆଯାଇଥିଲା। ତେବେ ଅଭିଷେକ ସେତେବେଳେ ନୂଆ ଦିଲ୍ଲୀରେ ଥିଲେ ଏଣୁ ପୋଲିସ ନୋଟିସ୍ ଦେଇ ନ ପାରି ଫେରି ଯାଇଥିଲା। ସୂତ୍ର ଅନୁସାରେ କେଏମସି ପକ୍ଷରୁ ତୃଣ ମୂଳ କଂଗ୍ରେସର କେତେକ ନେତାଙ୍କ ବିରୋଧରେ ରୁଜୁ ଅଭିଯୋଗ ଆଧାରରେ ଏଫଆଇଆର ହୋଇଥିବା ବେଳେ ନୂଆ ନୋଟିସ୍ ଜାରି ହୋଇଛି। ଏହି ମାମଲାରେ ଅଭିଷେକ ବାନାର୍ଜୀଙ୍କ ନାମ ମଧ୍ୟ ରହିଛି। ଏହା ପୂର୍ବରୁ ପୋଲିସ ମାମଲାରେ ଅଭିଷେକଙ୍କୁ ଦୀର୍ଘ ୬ ଘଣ୍ଟା କାଳ ପଚରା ଉଚରା କରିଥିଲା।
ଏ ନେଇ ସେକ୍ସପିୟର ସାରଣୀ ଥାନାରେ ରୁଜୁ ୩ଟି ଏତଲାରେ ତୃଣ ମୂଳ କଂଗ୍ରେସ ନେତା ଓ କାର୍ଯ୍ୟକର୍ତ୍ତାଙ୍କ ବିରୋଧରେ ଡ୍ୟୁଟିରେ ଥିବା ପୋଲିସ କର୍ମଚାରୀଙ୍କୁ ମାରପିଟ କରିବା, ଏଥିରେ ଜଣେ ମହିଳା ପୋଲିସ କର୍ମଚାରୀଙ୍କ ମର୍ଯ୍ୟଦା ଭଙ୍ଗ କରିବାକୁ ଉଦ୍ୟମ କରିବା ଆଦି ଅଭିଯୋଗ ରହିଛି। ୩ଟିରୁ ୨ଟି ଏତଲାରେ ଅଭିଷେକ ବାନାର୍ଜୀ, ଡେରେକ୍ ଓ’ବ୍ରାୟନ, ହୁମାୟୁନ କବିର ଏବଂ ବୈଶ୍ୱାନର ଚାଟାର୍ଜୀଙ୍କ ନାମ ରହିଛି। ଏହା ଛଡା ମାମଲାରେ ଏ ପର୍ଯ୍ୟନ୍ତ ପୋଲିସ ୧୪ ଜଣଙ୍କୁ ଗିରଫ କରିଛି।
