ଭୁବନେଶ୍ୱର : ଆଗକୁ ମୋଟରଯାନ କାଗଜପତ୍ର ଯାଞ୍ଚକୁ ବ୍ୟାପକ କରିବାକୁ ଯାଉଛି ରାଜ୍ୟ ପରିବହନ ପ୍ରାଧିକରଣ । ବେଆଇନ ଭାବେ କୌଣସି ଗାଡ଼ି ଚାଲୁଥିଲେ ମୋଟର ଯାନ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସ୍ୱତନ୍ତ୍ର ଦଳ ଗଠନ କରି ସାରା ରାଜ୍ୟରେ ଏନଫୋର୍ସମେଣ୍ଟ କରାଯିବ । ତେବେ ମୋଟର ଯାନ ଶୁଳ୍କ କ୍ଷେତ୍ରରେ ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ପୂର୍ବରୁ ଘୋଷଣା କରାଯାଇଥିବା ରିହାତି ବ୍ୟବସ୍ଥା ଏବେ ମଧ୍ୟ ଜାରି ରହିଛି । ଫଳରେ ଶୁଳ୍କ ପୈଠ କରି ନ ଥିବା ଗାଡ଼ି ମାଲିକମାନେ ବକେୟା ଶୁଳ୍କ ଏକକାଳୀନ ପୈଠ କରି ଜୋରିମାନା ରାଶି ସଂପୂର୍ଣ୍ଣ ଛାଡ଼ର ଲାଭ ନେବାକୁ ରାଜ୍ୟ ପରିବହନ ପ୍ରାଧିକରଣ ପକ୍ଷରୁ କୁହାଯାଇଛି । ଆଇନ ଅନୁଯାୟୀ ଶୁଳ୍କ ପୈଠ ନ କରି ଗାଡ଼ି ଚଲାଉଥିବା ମାଲିକଙ୍କ ବିରୋଧରେ ପରବର୍ତ୍ତୀ ପଦକ୍ଷେପ ସଂପର୍କରେ ଏସଟିଏର ବରିଷ୍ଠ ଅଧିକାରୀ ଓ ଆରଟିଓମାନଙ୍କ ସହ ଆଲୋଚନା କରିଛନ୍ତି ରାଜ୍ୟ ପରିବହନ କମିସନର ଅମିତାଭ ଠାକୁର । କାର୍ଯ୍ୟାନୁଷ୍ଠାନ ପୂର୍ବରୁ ବିଭାଗର ଜୋରିମାନା କ୍ଷମା ନିଷ୍ପତ୍ତି କିଭଳି ଅଧିକରୁ ଅଧିକ ଗାଡ଼ି ମାଲିକଙ୍କ ପାଖରେ ପହଞ୍ଚି ପାରିବ ଏବଂ ସେମାନେ ଏହାର ଲାଭ ନେଇପାରିବେ ସେ ଦିଗରେ ପଦକ୍ଷେପ ନେବାକୁ ପରାମର୍ଶ ଦେଇଛନ୍ତି କମିସନର । ଏ ଦିଗରେ ସଚେତନତା ସୃଷ୍ଟି ସହ ଗାଡ଼ି ମାଲିକଙ୍କୁ ତଥ୍ୟ ସଂପର୍କରେ ସଂପୂର୍ଣ୍ଣ ସହାୟତା ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି । ପ୍ରକାଶିତ ରିହାତି ଯୋଜନା ଅନୁଯାୟୀ ବାଣିଜ୍ୟଭିତ୍ତିକ ଗାଡ଼ି କ୍ଷେତ୍ରରେ ୩୧ ମାର୍ଚ୍ଚ ୨୦୨୨ ପର୍ଯ୍ୟନ୍ତ ଖିଲାପକାରୀମାନେ ଏହି ଯୋଜନାର ଲାଭ ନେଇପାରିବେ । ଏହି ଯୋଜନା ଅନୁଯାୟୀ ବକେୟା ଥିବା ସମସ୍ତ କରକୁ ଏକକାଳୀନ ପୈଠ କରିବାକୁ ହେବ । କର ପୈଠରେ ବିଳମ୍ବ ଯୋଗୁଁ ଲାଗୁ ହୋଇଥିବା ଜରିମାନା ରାଶି ଛାଡ଼ କରିଦିଆଯିବ । ଏହାସହ ସ୍କ୍ରାପ୍ ସୁବିଧା ନେବାକୁ ଚାହୁଁଥିବା ଗାଡ଼ି ମାଲିକଙ୍କ ପାଇଁ ମଧ୍ୟ ଏହି ରିହାତି ସୁବିଧା ରହିଛି । ୧ ଏପ୍ରିଲ ୧୯୯୨ରୁ ୩୧ ମାର୍ଚ୍ଚ ୨୦୨୦ ପର୍ଯ୍ୟନ୍ତ କର ବାକି ରଖିଥିବା ଗାଡ଼ି କ୍ଷେତ୍ରରେ କେବଳ ଜୋରିମାନାରେ ଛାଡ଼ ନୁହେଁ, ଶୁଳ୍କ ରାଶିରେ ମଧ୍ୟ ୫୦ ପ୍ରତିଶତ ପର୍ଯ୍ୟନ୍ତ ଛାଡ଼ର ସୁଯୋଗ ରହିଛି । ଏହା ସହ ୧ ଏପ୍ରିଲ ୧୯୯୨ ପୂର୍ବରୁ ବାକି ଥିବା ଗାଡ଼ି ପାଇଁ ଶତପ୍ରତିଶତ ସମସ୍ତ ରାଶି ଛାଡ଼ କରିବାର ଘୋଷଣା କରାଯାଇଛି । ଫଳରେ ସେମାନେ ବିନା କୌଣସି ରାଶି ପୈଠ ନକରି ସରକାରୀ ଭାବେ ଗାଡ଼ି ସ୍କ୍ରାପ୍ ସୁବିଧା ନେଇପାରିବେ । ଏହାସହ ଯଦି ଆପଣ ପୂର୍ବରୁ ଆରଟିଓଙ୍କ ଅନୁମତି ବିନା ଗାଡ଼ି ସ୍କ୍ରାପ୍ କରିଦେଇଛନ୍ତି ତେବେ ମଧ୍ୟ ଏହି ସୁବିଧାର ଲାଭ ନେଇପାରିବେ । ତେବେ ଟ୍ରାକ୍ଟର, କୃଷିଭିତ୍ତିକ ଟ୍ରାକ୍ଟର, ଟ୍ରଲର, ତିନି ଚକିଆ ଯାତ୍ରୀବାହୀ ଓ ମାଲବାହୀ ଗାଡ଼ି କ୍ଷେତ୍ରରେ ସାମାନ୍ୟ ଭିନ୍ନ ନିୟମ ରହିଛି । ଯାହାର ସବିଶେଷ ତଥ୍ୟ ସମସ୍ତ ଆଞ୍ଚଳିକ ପରିବହନ ଅଧିକାରୀଙ୍କ କାର୍ଯ୍ୟାଳୟ ଓ ପରିବହନ ବିଭାଗର ୱେବସାଇଟରେ ଉପଲବ୍ଧ ରହିଛି । ତେଣୁ ଶୁଳ୍କ ବକେୟା ରଖିଥିବା ଗାଡ଼ି ମାଲିକ ଆରଟିଓ କାର୍ଯ୍ୟାଳୟକୁ ଯାଇ ନିଜ ଗାଡ଼ିର ବକେୟା ଶୁଳ୍କ ଏକକାଳୀନ ପୈଠ କରି ଏ ଦିଗରେ ମିଳୁଥିବା ସୁବିଧାର ଲାଭ ଉଠାଇବାକୁ ପରାମର୍ଶ ଦେଇଛନ୍ତି ପରିବହନ କମିସନର । ଏହି ସୁବିଧାର ଲାଭ ଥରେ ନିଆଯାଇପାରିବ ଏବଂ ୨୬ ଡିସେମ୍ବର ୨୦୨୪ ଯାଏଁ ଏହା ଉପଲବ୍ଧ ରହିବ ବୋଲି ସୂଚନା ଦିଆଯାଇଛି ।
ମୋଟରଯାନ କାଗଜପତ୍ରର ହେବ କଡ଼ାକଡ଼ି ଯାଞ୍ଚ
