ବରଗଡ଼ ସାଂସଦ ପ୍ରଦୀପ ପୁରୋହିତ ନୂଆଦିଲ୍ଲୀରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ ସାକ୍ଷାତ କରିଛନ୍ତି। ଏହି ସାକ୍ଷାତ ସମୟରେ ସେ ବରଗଡ଼ରେ ନିର୍ମିତ ବିପିସିଏଲର ବାୟୋ-ଇଥାନଲ୍ ପ୍ରକଳ୍ପକୁ ଉଦଘାଟନ କରିବା ପାଇଁ କେନ୍ଦ୍ର ମନ୍ତ୍ରୀଙ୍କୁ ନିମନ୍ତ୍ରଣ କରିବା ସହ ବନ୍ଦ ପଡ଼ିଥିବା ବରଗଡ଼ ସମବାୟ ଚିନି କଳର ପୁନରୁଦ୍ଧାର ପାଇଁ କେନ୍ଦ୍ରୀୟ ହସ୍ତକ୍ଷେପ ଲୋଡ଼ିଛନ୍ତି।
ବରଗଡ଼ ଜିଲ୍ଲାରେ ୧୦୪ ଏକର ପରିମିତ ଜମିରେ ପ୍ରତିଷ୍ଠିତ ଏହି ସମବାୟ ଚିନି କଳଟି ପରିଚାଳନାଗତ ତ୍ରୁଟି ଏବଂ ଆର୍ଥିକ ଅନଟନ କାରଣରୁ ୨୦୧୭ ମସିହା ଅପ୍ରେଲ ମାସରୁ ବନ୍ଦ ରହିଛି। ଯଦିଓ ‘ଇଣ୍ଡିଆନ୍ ପଟାଶ୍ ଲିମିଟେଡ୍’ ଏହାକୁ ପୁନଃଚାଲୁ କରିବାକୁ ଆଗ୍ରହ ପ୍ରକାଶ କରିଥିଲା, ତଥାପି ୨୦୨୩ ମସିହା ଅକ୍ଟୋବର ୧୬ ତାରିଖରେ ଏହି ପ୍ରକ୍ରିୟା ସମ୍ପୂର୍ଣ୍ଣ ବନ୍ଦ ହୋଇଯାଇଥିଲା।
ଦୀର୍ଘଦିନ ଧରି କଳଟି ବନ୍ଦ ରହିବା ଯୋଗୁଁ ଶହ ଶହ କର୍ମଚାରୀ ଓ ଆଖୁ ଚାଷୀଙ୍କ ଜୀବିକା ପ୍ରଭାବିତ ହୋଇଛି। ଏହାଦ୍ୱାରା ଅଞ୍ଚଳରେ ଆଖୁ ଚାଷ ପ୍ରାୟ ବନ୍ଦ ହେବାକୁ ବସିଥିବା ବେଳେ ଚାଷୀ ପରିବାରଗୁଡ଼ିକ ଗଭୀର ଆର୍ଥିକ ସଙ୍କଟର ସମ୍ମୁଖୀନ ହେଉଛନ୍ତି ବୋଲି ସାଂସଦ ପ୍ରଦୀପ ପୁରୋହିତ ପ୍ରକାଶ କରିଛନ୍ତି।
ତେଣୁ ଏହି ୧୦୪ ଏକର ପରିମିତ ପ୍ଲାଣ୍ଟକୁ ‘ଇଣ୍ଡିଆନ୍ ପଟାଶ୍ ଲିମିଟେଡ୍’ କିମ୍ବା ଅନ୍ୟ କୌଣସି ଦକ୍ଷ ସଂସ୍ଥାକୁ ହସ୍ତାନ୍ତର କରି ଏକ ଆଧୁନିକ ଓ ସମନ୍ୱିତ ଚିନି କଳ ପ୍ରତିଷ୍ଠା କରିବାକୁ ସେ ଅମିତ ଶାହାଙ୍କୁ ଅନୁରୋଧ କରିଛନ୍ତି। ତେବେ ଚିନି କଳର ପୁନରୁଦ୍ଧାର ପାଇଁ ଆବଶ୍ୟକ ପଦକ୍ଷେପ ନିଆଯିବ ବୋଲି କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଆଶ୍ୱାସନା ଦେଇଛନ୍ତି।
ସାଂସଦ ଆଲୋଚନା କ୍ରମେ ଜଣାଇଛନ୍ତି ଯେ, ପ୍ରଧାନମନ୍ତ୍ରୀ ଜୀ-ଭାନ୍ ଯୋଜନା ଅଧୀନରେ ପୂର୍ବ ଭାରତରେ ପ୍ରଥମଥର ପାଇଁ ବରଗଡ଼ରେ ପ୍ରାୟ ୧,୭୭୫ କୋଟି ଟଙ୍କା ବ୍ୟୟରେ ବିପିସିଏଲ୍ ର ଦ୍ୱିତୀୟ ପିଢ଼ିର ସମନ୍ୱିତ ବାୟୋ-ଇଥାନଲ୍ ପ୍ଲାଣ୍ଟ ପ୍ରତିଷ୍ଠିତ ହୋଇଛି। ଏହି ପ୍ଲାଣ୍ଟରେ ପ୍ରତିଦିନ ୨୦୦ କିଲୋଲିଟର ଇନ୍ଧନ ଉତ୍ପାଦନ କ୍ଷମତା ରହିଥିବାବେଳେ ଏଥିପାଇଁ ଧାନ ନଡ଼ା ଏବଂ ଅନ୍ୟାନ୍ୟ କୃଷି ବର୍ଜ୍ୟବସ୍ତୁକୁ କଞ୍ଚାମାଲ ଭାବେ ବ୍ୟବହାର କରାଯିବ। ଏହାଦ୍ୱାରା କୃଷି ବର୍ଜ୍ୟବସ୍ତୁର ସଠିକ୍ ଉପଯୋଗ ହେବା ସହ କୃଷକମାନଙ୍କ ଆୟ ବୃଦ୍ଧି ପାଇବ ଏବଂ ଗ୍ରାମାଞ୍ଚଳର ଅର୍ଥନୀତି ଆହୁରି ମଜବୁତ ହେବ ।
ଚିନି କଳର ପୁନରୁଦ୍ଧାର ଏବଂ ଏହି ନୂତନ ବାୟୋ-ଇଥାନଲ୍ ପ୍ଲାଣ୍ଟର କାର୍ଯ୍ୟକାରିତା ବରଗଡ଼ର କୃଷିଭିତ୍ତିକ ଅର୍ଥନୀତିକୁ ଏକ ନୂତନ ଗତି ଦେବ ବୋଲି ସାଂସଦ ମତବ୍ୟକ୍ତ କରିଛନ୍ତି।
ଏହି ସମସ୍ତ ବିକାଶମୂଳକ କାର୍ଯ୍ୟର ଗୁରୁତ୍ୱକୁ ଦୃଷ୍ଟିରେ ରଖି ସାଂସଦ ପ୍ରଦୀପ ପୁରୋହିତ କେନ୍ଦ୍ର ମନ୍ତ୍ରୀ ଅମିତ ଶାହାଙ୍କୁ ବରଗଡ଼ ଗସ୍ତ କରି ଏହି ପ୍ରକଳ୍ପଗୁଡ଼ିକୁ ଉଦଘାଟନ କରିବାକୁ ନିମନ୍ତ୍ରଣ କରିଛନ୍ତି। ଏହା ସହିତ, ଐତିହାସିକ ଗନ୍ଧମାର୍ଦ୍ଧନ ପର୍ବତମାଳା ଏବଂ ପ୍ରସିଦ୍ଧ ନୃସିଂହନାଥ ମନ୍ଦିର ପରିଦର୍ଶନ କରିବାକୁ ମଧ୍ୟ ସେ ଅମିତ ଶାହାଙ୍କୁ ଅନୁରୋଧ କରିଛନ୍ତି ଏବଂ ଗନ୍ଧମାର୍ଦ୍ଧନର ଐତିହାସିକ, ଧାର୍ମିକ ତଥା ପରିବେଷଗତ ମହତ୍ତ୍ୱ ସମ୍ପର୍କରେ ତାଙ୍କୁ ଅବଗତ କରାଇଛନ୍ତି।
