ନୂଆଦିଲ୍ଲୀ: ନ୍ୟାସନାଲ ଫାର୍ମାସ୍ୟୁଟିକଲ ପ୍ରାଇସିଂ ଅଥରିଟି (ଏନପିପିଏ) ୩୯ ନୂଆ ଔଷଧ ଫର୍ମୂଲେସନର ଖୁଚୁରା ମୂଲ୍ୟ ନିର୍ଦ୍ଧାରଣ କରିଛନ୍ତି। ଏହି ସବୁ ଔଷଧରେ ଉଚ୍ଚରକ୍ତଚାପ, ଡାୟବେଟିଜ୍, ଏଚଆଇଭି, ହୃଦରୋଗ ଓ ଆଖି ସଂକ୍ରମଣ ଭଳି ରୋଗ ଚିକିତ୍ସାରେ ଉପଯୋଗ ହେଉଥିବା ଔଷଧ ରହିଛି। ଡ୍ରଗସ୍ (ପ୍ରାଇସ କଣ୍ଚ୍ରୋଲ) ଅର୍ଡର ୨୦୧୩ ଅନୁସାରେ ଧାର୍ଯ୍ୟ କରାଯାଇଥିବା ଏହି ମୂଲ୍ୟ ଯୋଗୁ ରୋଗୀଙ୍କୁ ଔଷଧ ନିର୍ଦ୍ଧାରିତ ଓ ସୁଲଭ ମୂଲ୍ୟରେ ମିଳି ପାରିବ। ତେବେ ଏନପିପିଏ ସ୍ପଷ୍ଟ କରିଛନ୍ତି ଯେ ଏହା ଔଷଧର ଦର ହ୍ରାସ ନିଷ୍ପତ୍ତି ନୁହେଁ, ବରଂ ଅଧିକତମ ଖୁଚୁରା ମୂଲ୍ୟ ନିର୍ଦ୍ଧାରଣ କରିବାର ପ୍ରକ୍ରିୟା।
ଏନପିପିଏ ଅନୁସାରେ ଉଚ୍ଚ ରକ୍ତଚାପ ଚିକିତ୍ସାରେ ଉପଯୋଗ ହେଉଥିବା ଏମ୍ଲୋଡିପିନ, ବିସୋପ୍ରୋଲୋଲ ଓ ଟେଲିମିସାରଟନ ମିଳିତ ଟାବଲେଟ୍ ମୂଲ୍ୟ ପ୍ରତି ଟାବଲେଟ୍ ୧୪ଟଙ୍କା ୭୪ ପଇସା ନିର୍ଦ୍ଧାରିତ ହୋଇଛି। ସେହିପରି ଚକ୍ଷୁ ସର୍ଜରି ପରେ ଉପଯୋଗ ହେଉଥିବା ବ୍ୟାକ୍ଟେରିୟାଲ ସଂକ୍ରମଣରେ ବ୍ୟବହୃତ ହେଉଥିବା ନେପାଫେନାକ ଓ ମୋକ୍ସିଫ୍ଲୋକ୍ସସିନ ଆଇଡ୍ରପ ପ୍ରତି ମିଲି ୬୮ଟଙ୍କା ୬୪ ପଇସା ନିର୍ଦ୍ଧାରିତ ହୋଇଥିବା ବେଳେ ହୃଦଘାତ ଓ ଷ୍ଟ୍ରୋକ୍ ରିସ୍କକୁ ହ୍ରାସ କରୁଥିବା କ୍ଲୋପିଡେଗ୍ନେଲ, ଆସ୍ପିରିନ ଓ ଏଟୋରଭାଷ୍ଟେଟିନ ପ୍ରତି କ୍ୟାପସୁଲ ମୂଲ୍ୟ ୬ଟଙ୍କା ୩୭ ପଇସା ଧାର୍ଯ୍ୟ ହୋଇଛି।
ଅଥରିଟି ସବୁ ଔଷଧ ବିକ୍ରେତା ଓ ଡିଲରଙ୍କୁ ନିର୍ଦ୍ଦେଶ ଦେଇଛନ୍ତି ଯେ ସେମାନେ ନିର୍ମାତାଙ୍କ ଠାରୁ ପାଉଥିବା ମୂଲ୍ୟ ସୂଚୀ ଓ ଆବଶ୍ୟକ ହେଲେ ସପ୍ଲିମିଣ୍ଟାରୀ ମୂଲ୍ୟ ସୂଚୀ ଏପରି ସ୍ଥାନରେ ପ୍ରଦର୍ଶିତ କରନ୍ତୁ ଯେଉଁଠି ଗ୍ରାହକ ଏହାକୁ ସହଜରେ ଦେଖି ପାରିବେ। ଏହା ସହିତ ଚେତାବନୀ ଦିଆଯାଇଛି ଯେ ଯଦି କୌଣସି ନିର୍ମାତା ଅଥବା ମାର୍କେଟିଂ କମ୍ପାନୀ ନିର୍ଦ୍ଧାରିତ ଦରରୁ ଅଧିକ ଅସୁଲ କରୁଥାନ୍ତି ତେବେ ସେମାନଙ୍କୁ ଡିପିସିଓ ୨୦୧୩ ଓ ଆବଶ୍ୟକ ବସ୍ତୁ ଅଧିନିୟମ ୧୯୫୫ ଅନୁସାରେ ଅସୁଲ କରାଯାଇଥିବା ଅତିରିକ୍ତ ରାଶି ସୁଧ ସମେତ ଜମା କରିବାକୁ ପଡିବ।
