ନୂଆଦିଲ୍ଲୀ: ପଶ୍ଚିମ ଏସିଆ ସଂକଟକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶବାସୀଙ୍କୁ ଇନ୍ଧନ ସଞ୍ଚୟ ପାଇଁ ନିବେଦନ କରିଛନ୍ତି। ପ୍ରଧାନମନ୍ତ୍ରୀଙ୍କ ଏହି ନିବେଦନ ପରେ ସରକାରୀ ସ୍ତରରେ ଇନ୍ଧନ ସଞ୍ଚୟ ଓ ଅନ୍ୟାନ୍ୟ ଖର୍ଚ୍ଚକାଟ୍ ପାଇଁ ପଦକ୍ଷେପ ନିଆଯାଇଛି।
ଏହି କ୍ରମରେ ସୁପ୍ରିମକୋର୍ଟ ମଧ୍ୟ ଇନ୍ଧନ ସଞ୍ଚୟ ଲାଗି ପଦକ୍ଷେପ ନେଇଛନ୍ତି। ସୁପ୍ରିମକୋର୍ଟ ସେକ୍ରେଟାରୀ ଜେନେରାଲ ଭରତ ପରାସରଙ୍କ ପକ୍ଷରୁ ଜାରି ନିର୍ଦେଶନାମା ଅନୁଯାୟୀ ଗ୍ରୀଷ୍ମ ଅବକାଶ ଓ ଅନ୍ୟାନ୍ୟ ଆଂଶିକ କାର୍ଯ୍ୟଦିବସରେ ବିଚାରପତିମାନେ ଭର୍ଚୁଆଲ (ଆଭାସି) ମାଧ୍ୟମରେ ମାମଲାର ଶୁଣାଣି କରିବେ। ଏଥପାଇଁ ସୁପ୍ରିମକୋର୍ଟ ରେଜିଷ୍ଟ୍ରିଙ୍କୁ ଆବଶ୍ୟକ ପଦକ୍ଷେପ ନେବାକୁ କୁହାଯାଇଛି। ଏପରି କି କେତେକ ବିଚାରପତି କାର୍ଯ୍ୟାଳୟକୁ କାର୍ ପୁଲିଂରେ ଆସିବା ଲାଗି ସମ୍ମତି ପ୍ରକାଶ କରିଛନ୍ତି। ସେହିପରି ରେଜିଷ୍ଟ୍ରିର ବିଭିନ୍ନ ବିଭାଗର ୫୦% କର୍ମଚାରୀ ସପ୍ତାହକୁ ଦୁଇଦିନ ଘରେ ରହି କାମ କରିବେ (ୱାର୍କ ଫ୍ରମ ହୋମ୍)।
