ଭୁବନେଶ୍ୱର: କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନୀତିନ ଗଡକରୀ ଗୁରୁବାର ଦିନ ଓଡ଼ିଶା ପାଇଁ ୧୫୪ କିଲୋମିଟର ଲମ୍ବ ସହିତ ୪,୧୩୭ କୋଟି ଟଙ୍କାର ୧୯ଟି ଜାତୀୟ ରାଜପଥ ପ୍ରକଳ୍ପର ଉଦଘାଟନ ଏବଂ ଶିଳାନ୍ୟାସ କରିଛନ୍ତି। ଭୁବନେଶ୍ୱର ବରମୁଣ୍ଡା ପଡିଆରେ ଅନୁଷ୍ଠିତ ଏକ କାର୍ଯ୍ୟକ୍ରମରେ ଗଡକରୀ କହିଥିଲେ ଯେ ଓଡ଼ିଶାର ସଡ଼କ ଭିତ୍ତିଭୂମି ଖୁବ୍ ଶୀଘ୍ର ଆମେରିକାର ସହ ପ୍ରତିଯୋଗୀତା କରିବ।ଏକ ରାଜ୍ୟର ବିକାଶ ପାଇଁ ବିଶ୍ୱସ୍ତରୀୟ ଭିତ୍ତିଭୂମି ଅତ୍ୟନ୍ତ ଜରୁରୀ। ସମୃଦ୍ଧ ଖଣିଜ ସଂରକ୍ଷିତ, ବନ୍ଦର, ଜଙ୍ଗଲ ଏବଂ ବନ୍ୟପ୍ରାଣୀ ସହିତ, ଓଡ଼ିଶାରେ ଅପାର ପର୍ଯ୍ୟଟନ ସମ୍ଭାବନା ରହିଛି।
ଉନ୍ନତ ସଡ଼କ ସଂଯୋଗୀକରଣ ଏହି କ୍ଷେତ୍ରଗୁଡ଼ିକରେ ଅଭିବୃଦ୍ଧିକୁ ତ୍ୱରାନ୍ୱିତ କରିବ ବୋଲି ସେ କହିଛନ୍ତି।ଗଡକରୀ ସୂଚନା ଦେଇଥିଲେ ଯେ ରାଜ୍ୟରେ ୨ ଲକ୍ଷ କୋଟି ଟଙ୍କାର ରାଜପଥ ପ୍ରକଳ୍ପର କାମ ଚାଲିଛି। ଏଥିମଧ୍ୟରୁ ୬୦,୦୦୦ କୋଟି ଟଙ୍କାର ପ୍ରକଳ୍ପ ସମ୍ପୂର୍ଣ୍ଣ ହୋଇଛି। ଆଉ ୬୦,୦୦୦ କୋଟି ଟଙ୍କାର ପ୍ରକଳ୍ପ ଚାଲୁ ରହିଛି ଏବଂ ୭୫,୦୦୦ କୋଟି ଟଙ୍କାର ପ୍ରକଳ୍ପ କାର୍ଯ୍ୟକ୍ଷମ ହେବାକୁ ଅଛି। ଆହୁରି ୪୦,୦୦୦ କୋଟି ଟଙ୍କାର ବିସ୍ତୃତ ପ୍ରକଳ୍ପ ରିପୋର୍ଟ ବା ଡିପିଆର ପ୍ରସ୍ତୁତ କରାଯାଉଛି ବୋଲି ସେ କହିଥିଲେ।ଗଡକରୀ ଆହୁରି କହିଥିଲେ ଯେ ୬୫୦ କିଲୋମିଟର ଲମ୍ବ ସହିତ ୨୭,୦୦୦ କୋଟି ଟଙ୍କାର ପ୍ରକଳ୍ପ ପୂର୍ବରୁ ପ୍ରଦାନ କରାଯାଇଛି। ସେ ଆକଳନ କରିଥିଲେ ଯେ ଆଗାମୀ ଦୁଇ ବର୍ଷ ମଧ୍ୟରେ ୩ ୦,୦୦୦୦ କୋଟି ଟଙ୍କାର ରାଜପଥ କାଯ୍ୟ ସମାପ୍ତ ହେବ।
ସେ ରାଜଧାନୀରେ ରିଙ୍ଗ ରୋଡ୍ ପାଇଁ ମଧ୍ୟ କେନ୍ଦ୍ରର ଅନୁମୋଦନ ଘୋଷଣା କରିଥିଲେ – ଖୋର୍ଦ୍ଧାର ରାମେଶ୍ୱରରୁ କଟକର ଟାଙ୍ଗୀ ପର୍ଯ୍ୟନ୍ତ ₹୭,୦୦୦ କୋଟି ଟଙ୍କାର ଆକଳନ କରାଯାଇଛି, ଯାହା କ୍ୟାବିନେଟ ମଞ୍ଜୁରୀ ଅପେକ୍ଷାରେ ଅଛି ବୋଲି ସେ ସୂଚନା ଦେଇଥିଲେ।ଏହା ସହିତ, ଭୁବନେଶ୍ୱର-ପୁରୀ ରାସ୍ତାର ଛଅ ଲେନ୍ କରିବା ପାଇଁ ₹୧,୨୦୦ କୋଟି ଟଙ୍କା ମଞ୍ଜୁର କରାଯାଇଛି। ଅନ୍ୟାନ୍ୟ ପ୍ରମୁଖ ପ୍ରକଳ୍ପ ମଧ୍ୟରେ ଦ୍ୱିତୀୟ ରାଞ୍ଚି-ସମ୍ବଲପୁର କରିଡର ପାଇଁ ₹୮,୦୦୦ କୋଟି ମଂଜୁର କରାଯାଇଛି। ଏଥିରେ ଚଣ୍ଡିଖୋଲ-ପାରାଦୀପ କରିଡର ଅନ୍ତର୍ଭୁକ୍ତ ଅଛି। ଏହା ଡିସେମ୍ବର ୨୦୨୬ ସୁଦ୍ଧା କାର୍ଯ୍ୟ ଶେଷ ହେବା ବୋଲି ଆଶା କରାଯାଉଛି।ଗଡକାରୀ ₹୮୦୦ କୋଟି ଟଙ୍କା ବ୍ୟୟରେ ନିର୍ମିତ ଏନଏଚ୍-୧୪୯ ଏବଂ ଏନଏଚ୍-୫୩ ର ଚାରି ଲେନ୍ ବିଶିଷ୍ଟ ତାଳଚେର-କାମାକ୍ଷାନଗର ସେକ୍ସନ (୪୧ କିଲୋମିଟର) ଉଦଘାଟନ କରିଥିଲେ।
ସେ ₹୪୫ କୋଟି ଟଙ୍କା ବ୍ୟୟରେ ନିର୍ମିତ ଏନଏଚ-୧୬ ରେ ବାଲିକୁଦା, ଶିଖରପୁର ଏବଂ ବଡ଼ଚଣାରେ ଯାନବାହନ ଅଣ୍ଡରପାସ୍ ମଧ୍ୟ ଶୁଭାରମ୍ଭ କରିଥିଲେ। ₹୮୪୧ କୋଟି ଟଙ୍କା ବ୍ୟୟରେ ମୋଟ ୪୪ କିଲୋମିଟର ଲମ୍ବ ଦୁଇଟି ଅତିରିକ୍ତ ରାଜପଥ ଅଂଶ ଏନଏଚ-୫୯ ଏବଂ ଏନଏଚ-୧୩୦ସିଡି ଉଦ୍ଘାଟିତ ହୋଇଥିଲା।₹୨,୯୦୫ କୋଟି ଟଙ୍କାର ୧୩ଟି ନୂତନ ପ୍ରକଳ୍ପ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା, ଯେଉଁଥିରେ ତିନୋଟି ନୂତନ ଭିୟୁପି, ଏକ ଫ୍ଲାଏଓଭର ଏବଂ ମହାନଦୀ, ରେଟ୍, ସଗଡା ଏବଂ ତେଲ ନଦୀ ଉପରେ ସେତୁ ଅନ୍ତର୍ଭୁକ୍ତ। ଯାହାର ମୋଟ ମୂଲ୍ୟ ₹୪୨୭ କୋଟି ଟଙ୍କା।
ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ଉପମୁଖ୍ୟମନ୍ତ୍ରୀ କେଭି ସିଂହ ଦେଓ ଏବଂ ପ୍ରଭାତୀ ପରିଡା ଏବଂ ପୂର୍ତ୍ତ ମନ୍ତ୍ରୀ ପୃଥିବୀରାଜ ହରିଚନ୍ଦନ ଉପସ୍ଥିତ ଥିଲେ। ସେହିପରି ପ୍ରକଳ୍ପ ସଂପର୍କିତ ଅଞ୍ଚଳର ସାଂସଦ ଓ ବିଧାୟକ ମଧ୍ୟ ଏଥିରେ ସାମିଲ ହୋଇଥିଲେ। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଅନୁପସ୍ଥିତ ଯୋଗୁଁ ତାଙ୍କର ଏକ ଭିଡିଓ ବାର୍ତ୍ତା ସେଠାରେ ଉପସ୍ଥାପିତ କରାଯାଇଥିଲା।
