ଟାଟା-ଏୟାରବସ ପ୍ଲାଣ୍ଟ ଉଦଘାଟନ କଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ଗୁଜୁରାଟର ଭଦୋଦରାରେ ଉଦଘାଟିତ ହେଲା ବହୁଚର୍ଚ୍ଚିତ ଟାଟା-ଏୟାରବସବିମାନ ନିର୍ମାଣ ପ୍ଲାଣ୍ଟ । ସ୍ପେନ ରାଷ୍ଟ୍ରପତି ପେଡ୍ରୋ ସଞ୍ଚେଜଙ୍କ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ପ୍ଲାଣ୍ଟର ଉଦଘାଟନ କରିଛନ୍ତି । ତିନି ଦିନିଆ ଭାରତ ଗସ୍ତରେ ଥିବା ସ୍ପେନ ରାଷ୍ଟ୍ରପତି ସଞ୍ଚେଜ ଆଜି ସକାଳେ ଭଦୋଦରାରେ ପହଞ୍ଚିଥିଲେ । ପ୍ଲାଣ୍ଟ ଉଦଘାଟନ ପୂର୍ବରୁ ଉଭୟ ରାଷ୍ଟ୍ରମୁଖ୍ୟ ରୋଡ ସୋ’ ମଧ୍ୟ କରିଥିଲେ। ସ୍ପେନର ଆଭିଏସନ କମ୍ପାନୀ ‘ଏୟାରବସ’ ସହଯୋଗରେ ‘ଟାଟା ଆଡଭାନ୍ସ ସିଷ୍ଟମ’ ଏହି କାରଖାନା ସ୍ଥାପନ କରିଛି । ‘ଟାଟା ଆଡଭାନ୍ସଡ ସିଷ୍ଟମ ଲିମିଟେଡ୍’  କ୍ୟାମ୍ପସରେ ଏହି ଉତ୍ପାଦନକାରୀ ପ୍ଲାଣ୍ଟ ନିର୍ମାଣ କରାଯାଇଛି । ଏହା ଭାରତୀୟ ସାମରିକ କ୍ଷେତ୍ରକୁ ବଳ ଦେବା ସହ ଆତ୍ମନିର୍ଭରତା ବଢାଇବ ।କେନ୍ଦ୍ର ସରକାରଙ୍କ ‘C-୨୯୫’ କାର୍ୟ୍ୟକ୍ରମ ଅଧୀନରେ ମୋଟ ୫୬ ବିମାନ ନିର୍ମାଣ ହେବାର କାର୍ୟ୍ୟକ୍ରମ ଅଛି । ସେଥିମଧ୍ୟରୁ ୧୬ଟି ସ୍ପେନ ଆଭିଏସନ କମ୍ପାନୀ ‘ଏୟାରବସ’ ନିର୍ମାଣ କରିବା ସହ ଭାରତକୁ ଯୋଗାଇଦେବ । ଅବଶିଷ୍ଟ ୪୦ଟି ବିମାନ ଭାରତରେ ଟାଟା କମ୍ପାନୀର ମିଳିତ ସହଯୋଗରେ ନିର୍ମାଣ ହେବ । ଏହି ୪୦ଟି ବିମାନ ଉତ୍ପାଦନ ପାଇଁ ‘ଟାଟା ଆଡଭାନ୍ସଡ ସିଷ୍ଟମ ଲିମିଟେଡ’ ଓ ‘ଏୟାରବସ’ ମିଳିତ ଭାବେ ଗୁଜୁରାଟରେ କାମ କରିବେ । ଏହି ପ୍ଲାଣ୍ଟରେ ବିମାନ ନିର୍ମାଣଠାରୁ ଆରମ୍ଭ କରି ଆସେମ୍ବୁଲ (ଯନ୍ତ୍ରାଂଶ ଏକତ୍ରୀକରଣ), ପରୀକ୍ଷଣ ଏବଂ ମେଣ୍ଟେନାନ୍ସ ପର୍ୟ୍ୟନ୍ତ ଏକ ସମ୍ପୂର୍ଣ୍ଣ ବୈଷୟିକ ବ୍ୟବସ୍ଥା ବିକଶିତ ହେବ । ଟାଟା କମ୍ପାନୀ ବ୍ୟତୀତ ପ୍ରମୁଖ ରାଷ୍ଟ୍ରାୟତ ପ୍ରତିରକ୍ଷା କ୍ଷେତ୍ର ୟୁନିଟ୍ ‘ଭରତ ଇଲେକ୍ଟ୍ରୋନିକ୍ସ ଲିମିଟେଡ୍’ ଏବଂ ‘ଭରତ ଡାଇନାମିକ୍ସ ଲିମିଟେଡ୍’ ଓ କିଛି ଘରୋଇ କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ ଏହି କାର୍ୟ୍ୟକ୍ରମରେ ମଧ୍ୟ ସହଯୋଗ କରିବେ ।