ସୁପ୍ରିମକୋର୍ଟ ଦେଶର ସର୍ବାଧିକ ପ୍ରଦୂଷିତ ସହରଗୁଡ଼ିକର ମାଗିଲେ ତାଲିକା, କହିଲେ, ପ୍ରଦୂଷଣ ଏକ ଦେଶବ୍ୟାପୀ ସମସ୍ୟା

ନୂଆଦିଲ୍ଲୀ-ଏନସିଆର୍ ପ୍ରଦୂଷଣ ମାମଲାର ଶୁଣାଣି ବେଳେ ସୁପ୍ରିମକୋର୍ଟ ଦେଶର ଅନ୍ୟ ପ୍ରଦୂଷିତ ସହରଗୁଡ଼ିକ ବିଷୟରେ ତଥ୍ୟ ଲୋଡ଼ିଛନ୍ତି । ସର୍ବୋଚ୍ଚ ଅଦାଲତ କହିଛନ୍ତି, ଏହି ସମସ୍ୟାର ମୁକାବିଲା ପାଇଁ ଅନ୍ୟାନ୍ୟ ସହରରେ ମଧ୍ୟ ବ୍ୟବସ୍ଥା କରିବାକୁ ଚେଷ୍ଟା କରାଯିବ । ଜଷ୍ଟିସ୍ ଅଭୟ ଏସ୍ ଓକା ଓ ମନମୋହନଙ୍କ ବେଞ୍ଚ କହିଛନ୍ତି ଯେ ସୁପ୍ରିମକୋର୍ଟ ଦିଲ୍ଲୀରେ ଅଛନ୍ତି ଏହାର ଅର୍ଥ ନୁହେଁ ଯେ ଆମର ଚିନ୍ତାଧାରା କେବଳ ଏହା ଭିତରେ ସୀମିତ । କୋର୍ଟ ସାରା ଦେଶରେ ପ୍ରଦୂଷଣକୁ ନେଇ ଶୁଣାଣି କରିବ ।ସୁପ୍ରିମକୋର୍ଟ ସୋମବାର କହିଛନ୍ତି, ପ୍ରଦୂଷଣ ଏକ ଦେଶବ୍ୟାପୀ ସମସ୍ୟା, ତେଣୁ ଆମେ ଏହି ଶୁଣାଣିର ପରିସର ବଢ଼ାଉଛୁ । କୋର୍ଟ କେନ୍ଦ୍ର ସରକାରଙ୍କଠାରୁ ଦେଶର ସର୍ବାଧିକ ପ୍ରଦୂଷିତ ସହରଗୁଡ଼ିକ ବିଷୟରେ ସୂଚନା ମାଗିଛନ୍ତି । ଏହା ସହିତ ଦେଶରେ ବାୟୁ ଗୁଣବତ୍ତା ପରିଚାଳନା ଆୟୋଗ ଭଳି ମେକାନିଜମ୍ ଲାଗୁ କରିବାର ଆବଶ୍ୟକତା ଉପରେ କୋର୍ଟ ଗୁରୁତ୍ୱ ଦେଇଛନ୍ତି । କୋର୍ଟ କହିଛନ୍ତି, ସୁପ୍ରିମକୋର୍ଟ କେବଳ ଦିଲ୍ଲୀରେ ପ୍ରଦୂଷଣ ଉପରେ କାର୍ଯ୍ୟ କରୁଛନ୍ତି ବୋଲି ଆମେ ବାର୍ତ୍ତା ଦେବା ଉଚିତ୍ ନୁହେଁ । ଅନ୍ୟ ପ୍ରଦୂଷିତ ସହରର ମଧ୍ୟ ତାଲିକା ପ୍ରସ୍ତୁତ କରି ପଦକ୍ଷେପ ଗ୍ରହଣ କରାଯିବା ଉଚିତ୍ । ଦିଲ୍ଲୀ-ଏନସିଆରରେ ବାୟୁ ଗୁଣବତ୍ତା ସୁଧାରିବା ପାଇଁ ସକ୍ରିୟ ଥିବା CAQMକୁ ଅନ୍ୟ ରାଜ୍ୟରେ ବି ଲାଗୁ କରିବା ଦିଗରେ ଚର୍ଚ୍ଚା ହୋଇଥିଲା । ଏହି ମେକାନିଜମ୍ ବାୟୁ ପ୍ରଦୂଷଣ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଏକ ପ୍ରଭାବଶାଳୀ ମଡେଲ ଭାବରେ ଉଭା ହୋଇଛି । ତେବେ ସର୍ବୋଚ୍ଚ ଅଦାଲତ ଚିନ୍ତା ପ୍ରକଟ କରି କହିଛନ୍ତି, ଦିଲ୍ଲୀ-ଏନସିଆରରେ ଲାଗୁ ହୋଇଥିବା ଗ୍ରାପ୍ (GRAP) ଅନ୍ୟ ରାଜ୍ୟରେ ପ୍ରଭାବଶାଳୀ ଭାବରେ କାର୍ଯ୍ୟକାରୀ ହେଉନାହିଁ । ବେଞ୍ଚ କହିଛନ୍ତି, ଅନ୍ୟ ରାଜ୍ୟରେ ବି ସମାନ ସମସ୍ୟା ରହିଛି, ଯାହାକୁ ଅଣଦେଖା କରାଯାଇପାରିବ ନାହିଁ । ଏନସିଆର୍ ସଂଲଗ୍ନ ସହରଗୁଡ଼ିକରେ ନିଷିଦ୍ଧ କାର୍ଯ୍ୟକଳାପ ଜାରି ରହିଛି । ଏବେ ବି ଅନ୍ୟ ରାଜ୍ୟଗୁଡ଼ିକରେ ନଡ଼ା ଜଳାଯାଉଛି, ଯଦ୍ଦ୍ଵାରା ପ୍ରଦୂଷଣର ସ୍ତର ଆହୁରି ବୃଦ୍ଧି ପାଉଛି ।