ଆମେରିକା: ଟ୍ରମ୍ପ ପ୍ରଶାସନରେ ବଡ଼ ହଲଚଲ । ଟ୍ରମ୍ପ ପ୍ରଶାସନରେ ବଡ଼ ଧରଣର ଅଦଳବଦଳ ଚର୍ଚ୍ଚା, କିଏ କିଏ ଦେବେ ଇସ୍ତଫା? ମଧ୍ୟବର୍ତ୍ତୀ ନିର୍ବାଚନରେ ରିପବ୍ଲିକାନ୍ ଙ୍କ ପରାଜୟ ପରେ ହ୍ୱାଇଟ୍ ହାଉସ୍ ରେ ହଲଚଲ । ମାର୍କୋ ରୁବିଓଙ୍କ ସମେତ ଏକାଧିକ ବରିଷ୍ଠ ଅଧିକାରୀଙ୍କ ଭବିଷ୍ୟତକୁ ନେଇ କଳ୍ପନାଜଳ୍ପନା । ମଧ୍ୟବର୍ତ୍ତୀ ନିର୍ବାଚନରେ ରିପବ୍ଲିକାନ୍ ପାର୍ଟିକୁ ଝଟକା ଲାଗିବା ପରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନରେ ବ୍ୟାପକ ଅଦଳବଦଳ ହେବା ନେଇ ଚର୍ଚ୍ଚା ଜୋର ଧରିଛି । ଡେମୋକ୍ରାଟିକ୍ ପାର୍ଟି କଂଗ୍ରେସର ଉଭୟ ସଦନରେ ନିୟନ୍ତ୍ରଣ ହାସଲ କରିବା ପରେ ଟ୍ରମ୍ପଙ୍କ ନୀତି ଓ ନେତୃତ୍ୱ ଉପରେ ଚାପ ବଢ଼ିଛି । ଏପରି ସ୍ଥିତିରେ ଟ୍ରମ୍ପ କ୍ୟାବିନେଟ୍ ର କେତେକ ବରିଷ୍ଠ ସଦସ୍ୟ ଇସ୍ତଫା ଦେଇପାରନ୍ତି ବୋଲି ଆମେରିକୀୟ ରାଜନୈତିକ ମହଲରେ ଆଲୋଚନା ଚାଲିଛି । ସବୁଠାରୁ ଅଧିକ ଚର୍ଚ୍ଚାରେ ଅଛନ୍ତି ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ।
ରିପୋର୍ଟ ଅନୁଯାୟୀ, ରୁବିଓ ଟ୍ରମ୍ପ ପ୍ରଶାସନରୁ ଇସ୍ତଫା ଦେଇ ୨୦୨୮ ଆମେରିକୀୟ ରାଷ୍ଟ୍ରପତି ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିପାରନ୍ତି । ରିପବ୍ଲିକାନ୍ ପାର୍ଟିର ରାଷ୍ଟ୍ରପତି ପ୍ରାର୍ଥୀ ଦୌଡ଼ରେ ଉପରାଷ୍ଟ୍ରପତି ଜେଡି ଭାନ୍ସ ତାଙ୍କର ପ୍ରମୁଖ ପ୍ରତିଦ୍ୱନ୍ଦ୍ୱୀ ହୋଇପାରନ୍ତି । ଇରାନ ଯୁଦ୍ଧ ଓ ଟ୍ରମ୍ପ ପ୍ରଶାସନର ବିବାଦୀୟ ନୀତିଠାରୁ ନିଜକୁ ଦୂରେଇ ରଖିବା ରୁବିଓଙ୍କ ପାଇଁ ରାଜନୈତିକ ଭାବେ ଲାଭଦାୟକ ହୋଇପାରେ ବୋଲି କେତେକ ରିପବ୍ଲିକାନ୍ ସୂତ୍ର ମତ ଦେଇଛନ୍ତି । ଏପରିକି ନୂଆ କଂଗ୍ରେସ ଜାନୁଆରୀରେ କାର୍ଯ୍ୟଭାର ଗ୍ରହଣ କରିବା ପୂର୍ବରୁ ପାଞ୍ଚଜଣ ପର୍ଯ୍ୟନ୍ତ କ୍ୟାବିନେଟ୍ ସଦସ୍ୟ ପଦ ଛାଡ଼ିପାରନ୍ତି ବୋଲି ରିପୋର୍ଟରେ ଆଶଙ୍କା ପ୍ରକାଶ ପାଇଛି। ତେବେ ଏହି ପାଞ୍ଚଜଣଙ୍କ ନାମ ସ୍ପଷ୍ଟ ହୋଇନାହିଁ ।
ଅନ୍ୟପଟେ ପ୍ରତିରକ୍ଷା ମନ୍ତ୍ରୀ ପିଟ୍ ହେଗସେଥ୍ ଙ୍କ ଭବିଷ୍ୟତକୁ ନେଇ ମଧ୍ୟ ଚର୍ଚ୍ଚା ଚାଲିଛି । ତାଙ୍କୁ ବଦଳାଇବା ସମ୍ପର୍କରେ ଟ୍ରମ୍ପ ପରାମର୍ଶ ନେଉଥିବା ଖବର ପ୍ରକାଶ ପାଇଥିଲେ ମଧ୍ୟ ରାଷ୍ଟ୍ରପତି ଏହାକୁ ଖଣ୍ଡନ କରିଛନ୍ତି । ସେହିପରି ହ୍ୱାଇଟ୍ ହାଉସ୍ ଚିଫ୍ ଅଫ୍ ଷ୍ଟାଫ୍ ସୁସି ୱାଇଲ୍ସଙ୍କ ପଦକୁ ନେଇ ମଧ୍ୟ କଳ୍ପନାଜଳ୍ପନା ରହିଛି। କିନ୍ତୁ ଉଭୟଙ୍କ ବିଦାୟ ସମ୍ପର୍କରେ କୌଣସି ଆନୁଷ୍ଠାନିକ ନିଷ୍ପତ୍ତି ହୋଇନାହିଁ । ମଧ୍ୟବର୍ତ୍ତୀ ନିର୍ବାଚନରେ ପରାଜୟ ପରେ ରିପବ୍ଲିକାନ୍ ନେତା ଓ ରଣନୀତିକାରମାନେ ଟ୍ରମ୍ପଙ୍କୁ ନୀତି ପରିବର୍ତ୍ତନ ଏବଂ ହ୍ୱାଇଟ୍ ହାଉସ୍ ରେ ନୂଆ ଟିମ୍ ଗଠନ ପାଇଁ ପରାମର୍ଶ ଦେଉଛନ୍ତି । ବିଶେଷକରି ଇରାନ ଯୁଦ୍ଧ, ଶୁଳ୍କ ନୀତି ଓ ବଢ଼ୁଥିବା ଜୀବନଯାପନ ଖର୍ଚ୍ଚକୁ ନେଇ ଅସନ୍ତୋଷ ରହିଥିବା କୁହାଯାଉଛି । ତେବେ ଇସ୍ତଫା ସମ୍ପର୍କିତ ଖବରକୁ ହ୍ୱାଇଟ୍ ହାଉସ୍ ଓ ଆମେରିକାର ବୈଦେଶିକ ବିଭାଗ ଖଣ୍ଡନ କରିଛନ୍ତି । ମାର୍କୋ ରୁବିଓଙ୍କ ସମ୍ଭାବ୍ୟ ବିଦାୟ ସମ୍ପର୍କିତ ଦାବିକୁ ଭିତ୍ତିହୀନ ବୋଲି କୁହାଯାଇଛି । ତେଣୁ କିଏ ପଦ ଛାଡ଼ିବେ ଏବଂ କିଏ ଟ୍ରମ୍ପଙ୍କ ଟିମ୍ ରେ ରହିବେ, ତାହା ଏବେ ବି ଅନିଶ୍ଚିତ । ଆଗାମୀ ଦିନରେ ଟ୍ରମ୍ପଙ୍କ ନିଷ୍ପତ୍ତି ଉପରେ ସମସ୍ତଙ୍କ ନଜର ରହିଛି ।
