ଦେବଜିତ ସାଇକିଆ ହେଲେ BCCI ର ନୂଆ ସମ୍ପାଦକ

ନୂଆଦିଲ୍ଲୀ: ବିସିସିଆଇ ନୂଆ ସମ୍ପାଦକ ହେଲେ ଦେବଜିତ ସାଇକିଆ । ଜୟ ଶାହଙ୍କ ପରେ ଦେବଜିତଙ୍କୁ ବିସିସିଆଇର ଦାୟିତ୍ବ ମିଳିଛି । ଜୟ ଶାହ ଆଇସିସିର ଅଧ୍ୟକ୍ଷ ହେବା ପରେ ଦେବଜିତଙ୍କୁ ଏହି ଦାୟିତ୍ବ ଦେଇଛି ବିସିସିଆଇ । ତାଙ୍କୁ ବିସିସିଆଇ ସଭାପତି ରୋଜର ବିନ୍ନି କାର୍ଯ୍ୟକାରୀ ସମ୍ପାଦକ ଭାବରେ ନିଯୁକ୍ତ କରିଛନ୍ତି। ସେହିପରି ପ୍ରଭତେଜ ସିଂ ଭାଟିଆଙ୍କୁ କୋଷାଧ୍ୟକ୍ଷ ଭାବେ ଚୟନ କରାଯାଇଛି । ଦେବଜିତ ସାଇକିଆ ଆସାମର ପୂର୍ବତନ କ୍ରିକେଟର । ୫୫ ବର୍ଷୀୟ ଦେବଜିତ ଆସାମ ପାଇଁ ୪ଟି ଫାଷ୍ଟ କ୍ଲାସ କ୍ରିକେଟ ଖେଳିଛନ୍ତି । ତାଙ୍କର ଶ୍ରେଷ୍ଠ ସ୍କୋର ୫୪ ରନ୍ । ସେ ୮ଟି କ୍ୟାଚ ଧରିଥିବା ବେଳେ ଗୋଟିଏ ଷ୍ଟମ୍ପ ଆଉଟ୍ କରିଛନ୍ତି । ପେଶାରେ ସେ ଜଣେ ଓକିଲ । ୨୦୧୬ରେ ସାଇକିଆ ଏସିଏର ଉପାଧ୍ୟକ୍ଷ ହୋଇଥିଲେ । ୨୦୧୯ରେ ତାଙ୍କୁ ସଚିବ ଭାବେ ଚୟନ କରାଯାଇଥିଲା । ଏହାପରେ ୨୦୨୨ରେ ବିସିସିଆଇରେ ଏଣ୍ଟ୍ରି କରିଥିଲେ । ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମାଙ୍କୁ ଚୟନ କରାଯିବା ସମୟରେ ଦେବଜିତ ସାଇକିଆ ସରକାରଙ୍କ ମୁଖ୍ୟ ଆଇନ ପରାମର୍ଶଦାତା ଭାବେ ନିଯୁକ୍ତି ଦିଆଯାଇଥିଲା । କ୍ରିକେଟ୍ ପରେ ସେ ଆଇନରେ କ୍ୟାରିୟର କରିଥିଲେ ଏବଂ ୨୮ ବର୍ଷ ବୟସରେ ସେ ଗୌହାଟୀ ହାଇକୋର୍ଟରେ ଓକିଲ ହୋଇଥିଲେ । ବିସିସିଆଇର ପୂର୍ବତନ ସଚିବ ଜୟ ଶାହ ଆଇସିସି ଅଧ୍ୟକ୍ଷ ହୋଇସାରିଲେଣି। ସେ ଡିସେମ୍ବର ୧ ତାରିଖରୁ ପଦଭାର ସମ୍ଭାଳିଛନ୍ତି । ଜୟ ଶାହ ଚଳିତ ବର୍ଷ ଅଗଷ୍ଟରେ ଆଇସିସି ଅଧ୍ୟକ୍ଷ ଭାବେ ନିର୍ଦ୍ବନ୍ଦ୍ବରେ ନିର୍ବାଚନ ହୋଇଛନ୍ତି । ଏହି ପଦ ସମ୍ଭାଳିବାରେ ଜୟ ଶାହ ସବୁଠାରୁ କନିଷ୍ଠ ଅଧ୍ୟକ୍ଷ। ପୂର୍ବରୁ ଜଗମୋହନ ଡାଲମିଆ, ଶରତ ପାଓ୍ଵାର, ଏନ ଶ୍ରୀନିବାସନ, ଶଶାଙ୍କ ମନୋହର ଆଇସିସିର ଚେୟାରମ୍ୟାନ ପଦ ସମ୍ଭାଳିଛନ୍ତି । ଆଇସିସି ଅଧ୍ୟକ୍ଷଙ୍କ କାର୍ଯ୍ୟକାଳ ଦୁଇ -ଦୁଇ ବର୍ଷ ପାଇଁ ତିନିଟି ଟର୍ମ ଥାଏ । ଜଗମୋହନ ଡାଲମିଆ ୧୯୯୭ରୁ ୨୦୦୦, ଶରଦ ପାଓ୍ଵର ୨୦୧୦ରୁ ୨୦୧୨, ଏନ ଶ୍ରୀନିବାସନ ୨୦୧୪ ରୁ ୨୦୧୫ ଏବଂ ଶଶାଙ୍କ ମନୋହର ୨୦୧୫ରୁ ୨୦୨୦ ପର୍ଯ୍ୟନ୍ତ ଆଇସିସି ଚେୟାରମ୍ୟାନ ପଦବୀରେ ରହିଥିଲେ ।