ନୂଆଦିଲ୍ଲୀ: ଆଜି ୨ ଏପ୍ରିଲ୍ରେ ସଂସଦରେ ଓ୍ୱାକଫ୍ ସଂଶୋଧନ ବିଲ୍ ଆଗତ ହେବ। ସରକାର ପ୍ରଥମେ ଏହାକୁ ଲୋକସଭାରେ ଉପସ୍ଥାପନ କରିବେ। ଏହା ୪ ଏପ୍ରିଲ୍ ପର୍ଯ୍ୟନ୍ତ ଚାଲିବ। ଗୃହମନ୍ତ୍ରୀ ଅମିତ ଶାହ ମାର୍ଚ୍ଚ ୨୯ରେ କହିଥିଲେ ଯେ ଏହି ବଜେଟ୍ ଅଧିବେଶନରେ ବିଲ୍ ଆଣିବାର ଯୋଜନା ରହିଛି। ସେ ଜଣାଇଥିଲେ ଯେ ଏହା ଓ୍ୱାକଫ ବୋର୍ଡରେ ପାରଦର୍ଶିତା ଓ ଉତ୍ତରଦାୟିତ୍ୱ ବଢ଼ାଇବ ଏବଂ ମହିଳାଙ୍କ ସାମିଲକୁ ନିଶ୍ଚିତ କରିବ। କିନ୍ତୁ ଏହି ବିଲ୍ ମୁସଲିମ ସମୁଦାୟରେ ଅସନ୍ତୋଷ ସୃଷ୍ଟି କରିଛି।
ଓ୍ୱାକଫ କଣ ତାହା ଜାଣିବା ଜରୁରୀ। ଏହା ଏକ ଇସଲାମିକ ପରମ୍ପରା, ଯେଉଁଠି ଜଣେ ବ୍ୟକ୍ତି ନିଜ ସମ୍ପତ୍ତିକୁ ଧାର୍ମିକ କିମ୍ବା ସାମାଜିକ କାମ ପାଇଁ ଦାନ କରିଥାଏ। ଏହି ସମ୍ପତ୍ତି ଓ୍ୱାକଫ ବୋର୍ଡ ଅଧୀନରେ ରହି କଲ୍ୟାଣ ପାଇଁ ବ୍ୟବହାର ହୋଇଥାଏ। ଏହା ଜମି, ଘର, ମସଜିଦ, କବରସ୍ଥାନ କିମ୍ବା ସ୍କୁଲ ଭଳି ହୋଇପାରେ।
ଭାରତରେ ଓ୍ୱାକଫ ବୋର୍ଡ ପ୍ରତ୍ୟେକ ରାଜ୍ୟରେ ରହି ଏହି ସମ୍ପତ୍ତିଗୁଡ଼ିକୁ ପରିଚାଳନା କରିଥାଏ। ଏମାନଙ୍କ ପାଖରେ ୯.୪ ଲକ୍ଷ ଏକର ଜମି ଓ ୮.୭ ଲକ୍ଷ ସମ୍ପତ୍ତି ରହିଛି। ଏଗୁଡ଼ିକର ମୋଟ ମୂଲ୍ୟ ୧.୨ ଲକ୍ଷ କୋଟି ଟଙ୍କା ବୋଲି ଆକଳନ କରାଯାଇଛି। ଏତେ ସମ୍ପତ୍ତି ଥାଇ ମଧ୍ୟ ଖରାପ ପରିଚାଳନା ଓ ମୋକଦ୍ଦମା କାରଣରୁ ଅନେକ ଜମି ବିବାଦରେ ପଡ଼ିଛି।
ସରକାର ଓ୍ୱାକଫ ଆଇନ ୧୯୯୫ରେ ସଂଶୋଧନ କରି ଏହାକୁ ଅଧିକ ଦକ୍ଷ ଓ ସ୍ୱଚ୍ଛ କରିବାକୁ ଚାହୁଁଛନ୍ତି। ଏବେ ବୋର୍ଡର ସଦସ୍ୟ ନିର୍ବାଚନ ଦ୍ୱାରା ଆସୁଥିବା ବେଳେ ନୂଆ ବିଲ୍ରେ ସରକାର ସେମାନଙ୍କୁ ମନୋନୀତ କରିବେ। ସମ୍ପତ୍ତିଗୁଡ଼ିକୁ ଜିଲ୍ଲା କଲେକ୍ଟରଙ୍କ ପାଖରେ ପଞ୍ଜିକରଣ କରାଇ ସଠିକ୍ ମୂଲ୍ୟାଙ୍କନ କରାଯିବ। ଏହା ସମ୍ପତ୍ତି ପରିଚାଳନାକୁ ସୁଧାରିବ ବୋଲି ସରକାର ଦାବି କରୁଛନ୍ତି।
ନୂଆ ବିଲ୍ରେ କିଛି ବଡ଼ ପରିବର୍ତ୍ତନ ପ୍ରସ୍ତାବିତ ହୋଇଛି। ସମ୍ପତ୍ତି ପଞ୍ଜିକରଣ ବାଧ୍ୟତାମୂଳକ ହେବ। ବୋର୍ଡରେ ଅଣ-ମୁସଲିମ ସଦସ୍ୟ ରହିପାରିବେ ଓ ଦୁଇଜଣ ଅଣ-ମୁସଲିମ ଥିବା ଜରୁରୀ। ସିଇଓ ମଧ୍ୟ ଅଣ-ମୁସଲିମ ହୋଇପାରନ୍ତି। ମହିଳାଙ୍କୁ ବୋର୍ଡରେ ସ୍ଥାନ ଦେବାକୁ ବ୍ୟବସ୍ଥା ହେବ।
କିନ୍ତୁ ଏହାକୁ ମୁସଲିମ ପକ୍ଷ ଓ ବିରୋଧୀ ଦଳ ବିରୋଧ କରୁଛନ୍ତି। ସେମାନେ କହୁଛନ୍ତି ଯେ ଏହା ସରକାରୀ ହସ୍ତକ୍ଷେପ ବଢ଼ାଇବ ଓ ଧାର୍ମିକ ସ୍ୱାଧୀନତା ଉପରେ ଆଘାତ ଦେବ। ଏହା ଓ୍ୱାକଫ ବୋର୍ଡରେ ଗଣତାନ୍ତ୍ରିକ ମୂଲ୍ୟକୁ ଦୁର୍ବଳ କରିବ ବୋଲି ମତ ରହିଛି।
ଓ୍ୱାକଫ୍ ସମ୍ପତ୍ତି ନେଇ ଅନେକ ବିବାଦ ଅଦାଲତରେ ରହିଛି। ଓ୍ୱାକଫ ଟ୍ରିବ୍ୟୁନାଲରେ ୪୦,୯୫୧ଟି ମାମଲା ବିଚାରାଧୀନ ଅଛି । ଯେଉଁଥିରୁ ୯,୯୪୨ଟି ମୁସଲିମ ସମୁଦାୟ ଓ୍ବାକଫ ସଂସ୍ଥା ବିରୋଧରେ ଦାୟର କରିଛନ୍ତି। ଏହା ଖରାପ ପରିଚାଳନା ଓ ଅବହେଳାକୁ ଦର୍ଶାଉଛି।
ଓ୍ୱାକଫ୍ ଟ୍ରିବ୍ୟୁନାଲର ନିଷ୍ପତ୍ତିକୁ ହାଇକୋର୍ଟରେ ଚ୍ୟାଲେଞ୍ଜ କରାଯାଇପାରିବ। କେବଳ ଧାର୍ମିକ ଓ ସାମାଜିକ କାମ ପାଇଁ ଦାନ କରାଯାଇଥିବା ସମ୍ପତ୍ତି ଉପରେ ହିଁ ଓ୍ୱାକଫ ବୋର୍ଡ ଦାବି କରିପାରିବ, ବ୍ୟକ୍ତିଗତ ଜମି ଉପରେ ନୁହେଁ।
ସରକାର ଏହି ସଂଶୋଧନ ଦ୍ୱାରା ଓ୍ୱାକଫ ସମ୍ପତ୍ତିର ଉନ୍ନତ ପରିଚାଳନା ଓ ସ୍ୱଚ୍ଛତା ଆଣିବାକୁ ଚାହୁଁଛନ୍ତି। କିନ୍ତୁ ବିରୋଧୀ ଓ ମୁସଲିମ ସମୁଦାୟ ଏହାକୁ ଅସାମ୍ବିଧାନିକ ଓ ଧର୍ମୀୟ ଅଧିକାର ଉପରେ ଆକ୍ରମଣ ବୋଲି କହୁଛନ୍ତି। ଏହାର ଭବିଷ୍ୟତ କଣ ହେବ, ତାହା ଦେଖିବାର ଅଛି।
