ତାଙ୍କ ନାଁ ଥିଲା ଧର୍ମ ପ୍ରସାଦ ଏବଂ ସତରେ ସେ ଥିଲେ ଧର୍ମ, ସଂସ୍କୃତି ଓ ପରମ୍ପରାକୁ ସମ୍ମାନ ଦେଉଥିବା ଜଣେ ଦରଦୀ ମଣିଷ । ୧୯୯୮ରୁ ୨୦୦୨ ଚାରି ବର୍ଷ ପର୍ଯ୍ୟନ୍ତ ମୁଁ ତାଙ୍କ ଦୁଇ ପୁଅ ଦେବୀଦତ୍ତ (ସାଧକ) ଓ ମାତୃଦତ୍ତ (ଯାଚକ)ଙ୍କ ଦ୍ୱାରା ପ୍ରତିଷ୍ଠା ହୋଇଥିବା ଏମ.କେ ଫର୍ମସ୍ ର ମାର୍କେଟିଙ୍ଗ୍ ମ୍ୟାନେଜର୍ ଓ ପ୍ରଶାସନିକ ଅଫିସର୍ ଭାବେ କାମ କରୁଥିଲି । ତେଣୁ ସେହି ସମୟରୁ ମଉସାଙ୍କ ସହ ମୋର ପରିଚୟ ଗଢିଉଠିଥିଲା । ସବୁବର୍ଷ ଦୁର୍ଗାଷ୍ଟମୀରେ ଘରେ ଦୁର୍ଗାପୂଜା ହେଉ କି ଘରେ ପିତୃପୁରୁଷଙ୍କ ଶ୍ରାଦ୍ଧ ହେଉ ସବୁଥିରେ ସେ ଆମକୁ ତାଙ୍କ ନୟାପଲ୍ଲୀ ବାସଭବନକୁ ଭୋଜି ଖାଇବା ପାଇଁ ନିମନ୍ତ୍ରଣ କରୁଥିଲେ । ଆଜି ତାଙ୍କୁ ସୁମରିବାର ବିଶେଷ କାରଣ ହେଲା ଭୋଜି ବାଢ଼ିବା ସମୟରେ ପାଖେପାଖେ ରହି ଖାଇବା ଓ ପରଖିବା ଉଭୟ କଥା ବୁଝୁଥିଲେ । ତାଙ୍କର ବିଶେଷ ଗୁଣ ହେଲା ସେ ମଣିଷ ଚିହ୍ନିବା ରେ ଧୁରନ୍ଧର ଥିଲେ । ବଣିଆ ସୁନା ଚିହ୍ନିଲା ଭଳି ସେ ମଣିଷର ମନ ଓ ପେଟ ଉଭୟକୁ ଚିହ୍ନି ପାରୁଥିଲେ । କିଏ କଣ ଖାଇବ, ପସନ୍ଦ ଅପସନ୍ଦ ଜାଣି ସେଇ ଅନୁସାରେ ପରଷିଦେବାକୁ କୁହନ୍ତି । ମୁଁ ସେତେବେଳେ ମାତ୍ର ୧୨୦୦ ଟଙ୍କା ଦରମା ପାଉଥିଲି । ମଉସା ଦିନେ ମତେ ଡାକି ପଚାରିଲେ ଜ୍ଞାନ, ଏ ଜାଚକ ସାଧକ ଯାହା ଦରମା ଦେଉଛନ୍ତି ତୁମକୁ ପାଉଛି ତ ? ମୁଁ ହସି ଦେଇଥିଲି, ଆଉ ହଁ କରିଥିଲି । ସେ କିନ୍ତୁ ମତେ ଛାଡ଼ି ନଥିଲେ ପ୍ରଶ୍ନ ପରେ ପ୍ରଶ୍ନ ପଚାରି ଚାଲିଥିଲେ । ଶେଷରେ କହିଥିଲେ ଶୁଣ ଜ୍ଞାନ, ମୁଁ ଜାଣି ପାରୁଛି ତୁମେ ପାଉଥିବା ଦରମାରେ ଘର ଚଳାଇବା କଷ୍ଟ ହେଉଥିବ । କିନ୍ତୁ ଚିନ୍ତା କରିବନି, ଯେତେବେଳେ ଯଦି କିଛି ଅସୁବିଧା ହେବ, ଯାଚକ ସାଧକଙ୍କୁ ନ କହି ମତେ କହିବ, ମୁଁ ଅଛି । ସେଦିନର ସେ ଦୁଇପଦ କଥା ଆଜି ମନେ ପକାଇଲାବେଳକୁ ଆଖି ଲୁହରେ ଭରିଯାଉଛି ।
ଏମିତି କୌଣସି ପର୍ବ ପର୍ବାଣୀ ନଥିଲା ଯାହାକି ମଉସା ଘରେ ପାଳନ କରୁନଥିଲେ । ଚିଫ୍ ଇଂଜିନିୟର ପଦବୀ ରୁ ଅବସର ନେଲାପରେ ସେ ଅନେକ କନଷ୍ଟ୍ରକସନ୍ କମ୍ପାନୀର ଉପଦେଷ୍ଟା ଭାବରେ କାମ କରିଛନ୍ତି । ଶ୍ରୀ ଜଗନ୍ନାଥ ମହାପ୍ରଭୁଙ୍କ ସେ ପରମ ଭକ୍ତ ଥିଲେ । ସେଥିପାଇଁ ବୋଧେ ମହାପ୍ରଭୁ ତାଙ୍କରି ମନ୍ଦିର ମରାମତି ଓ ସୁରକ୍ଷା କାମ ତନଖି ଓ ସୁପରିଚାଳନାରେ ତାଙ୍କୁ ସଂପୃକ୍ତ କରାଇ ପାଖେପାଖେ ରଖିଥିଲେ । ତାଙ୍କର ଦୁଇ ସୁପୁତ୍ର ମାତୃଦତ୍ତ ଓ ଦେବୀଦତ୍ତ ଉଭୟ ଏବେ ଏକ ପ୍ରତିଷ୍ଠିତ ବିଲ୍ଡର୍ କମ୍ପାନୀ ଏସ.ଜେ ଡେଭଲପର୍ ପ୍ରତିଷ୍ଠା କରି ସଫଳତା ହାସଲ କରିଛନ୍ତି । ଉଭୟ ବାପାଙ୍କ ସମସ୍ତ ଭଲ ଗୁଣର ଅଧିକାରୀ । ମୋର ଚାକିରି ଛାଡିବାର ଦୀର୍ଘ ୨୦ ବର୍ଷ ହେଲାଣି । କଦବା କ୍ୱଚିତ ଘଟଣାକୁ ଛାଡିଦେଲେ ମୋର ଦୁଇଜଣଙ୍କ ସାଙ୍ଗେ ପ୍ରାୟ ଦେଖା ହୋଇନାହିଁ । ତଥାପି ମଉସାଙ୍କ ଦୁଃଖନ୍ତ ଦେହାନ୍ତର ଖବର ମତେ ଜଣାଇ ଏକାଦଶାହକୁ ଯିବାପାଇଁ ଡାକିଛନ୍ତି । ମତେ ଲାଗୁଛି ସତେ ଯେମିତି ମଉସା ଉପରୁ ନିର୍ଦ୍ଦେଶ ଦେଇଛନ୍ତି ଜ୍ଞାନକୁ ଡାକ ବୋଲି । କିନ୍ତୁ ମୋତେ ଆଜି ତାଙ୍କ ନୟାପଲ୍ଲୀ ଘରକୁ ନୁହେଁ ବରଂ ଶ୍ରଦ୍ଧାସୁମନ ଜଣାଇବା ପାଇଁ ଲୁମ୍ବିନୀ କନଭେନସନ୍ ଯିବାକୁ ପଡିବ । ସେଠାରେ ଆଜି ଆଉ ମଉସା ନଥିବେ, ଭଲ-ମନ୍ଦ, ସୁଖ-ଦୁଃଖ କଥା ପଚାରିବାକୁ କି ଖାଇବା-ପରଖିବା କାମ ଦେଖିବାକୁ । ସବୁକିଛି ସଫେଦ ଆଉ ଫାଙ୍କା ଫାଙ୍କା ଲାଗିବ । କିନ୍ତୁ ବୈକୁଣ୍ଠରେ ଥାଇ ତାଙ୍କର ଆଶୀର୍ବାଦର ହାତ ସବୁବେଳେ ସଭିଙ୍କ ଉପରେ ଥିବ । ମଉସାଙ୍କୁ ଭକ୍ତିପୂତ ପ୍ରଣାମ ଓ ଭାବପୂର୍ଣ୍ଣ ଶ୍ରଦ୍ଧାଞ୍ଜଳି ଜଣାଇ ଅମର ଆତ୍ମାର ସଦଗତି କାମନା କରୁଛି ।
ଜ୍ଞାନ ରଞ୍ଜନ ମିଶ୍ର
ସମ୍ପାଦକ, ଭଏସ୍ ଅଫ ଭିକ୍ଟମ୍ସ
