ନୂଆଦିଲ୍ଲୀ: ଉପରାଷ୍ଟ୍ରପତି ଜଗଦୀପ ଧନଖଡ ସୁୁପ୍ରିମକୋର୍ଟଙ୍କ ଦ୍ୱାରା ରାଷ୍ଟ୍ରପତିଙ୍କ କ୍ଷମତାକୁ ନେଇ ଦିଆଯାଇଥିବା ରାୟକୁ ବିରୋଧ ପ୍ରକାଶ କରିଛନ୍ତି। ଏବେ ବରିଷ୍ଠ ଆଇନଜୀବୀ ତଥା ସାଂସଦ କପିଲ ଶିବଲ ଉପରାଷ୍ଟ୍ରପତି ଜଗଦୀପ ଧନଖଡ଼ଙ୍କ ମନ୍ତବ୍ୟକୁ ତୀବ୍ର ସମାଲୋଚନା କରିଛନ୍ତି। ଯଦି କାର୍ଯ୍ୟପାଳିକା ନିଜର କାର୍ଯ୍ୟ ଠିକ୍ ଭାବେ ନ କରେ, ତା’ହେଲେ ଖଣ୍ଡପୀଠ ହସ୍ତକ୍ଷେପ କରିପାରିବାର ପୂର୍ଣ୍ଣ ଅଧିକାର ରହିଛି।
ଏକ ସାମ୍ବାଦିକ ସମ୍ମିଳନୀରେ କପିଲ ଶିବଲ କହିଛନ୍ତି, “ରାଷ୍ଟ୍ରପତି କେବଳ ଏକ ନାମମାତ୍ର ମୁଖ୍ୟ ଅଟନ୍ତି। ସୁପ୍ରିମକୋର୍ଟ ରାଜ୍ୟପାଳମାନଙ୍କ ଦ୍ୱାରା ପ୍ରେରିତ ବିଲ୍ଗୁଡ଼ିକ ଉପରେ ରାଷ୍ଟ୍ରପତିଙ୍କୁ ତିନି ମାସ ମଧ୍ୟରେ ନିଷ୍ପତ୍ତି ନେବାକୁ ନିର୍ଦ୍ଦେଶ ଦେଇଥିବା ରାୟକୁ ଉପରାଷ୍ଟ୍ରପତି ପ୍ରତିକ୍ରିୟା ରଖିଛନ୍ତି । ଯାହା ଦୁର୍ଭାଗ୍ୟଜନକ।” ସେ ଆହୁରି କହିଛନ୍ତି, “ଦେଶରେ ଗଣତନ୍ତ୍ରର ମୌଳିକ ଆଧାର ହେଉଛି ଖଣ୍ଡପୀଠର ସ୍ୱାଧୀନତା। କାର୍ଯ୍ୟପାଳିକା ନିଜ ଦାୟିତ୍ୱ ପାଳନରେ ବିଫଳ ହେଲେ, ଖଣ୍ଡପୀଠକୁ ହସ୍ତକ୍ଷେପ କରିବାର ଅଧିକାର ରହିଛି।”
କପିଲ ଶିବଲ ଅଭିଯୋଗ କରିଛନ୍ତି ଯେ, ରାଜ୍ୟସଭାର କୌଣସି ଅଧ୍ୟକ୍ଷଙ୍କୁ ଏପରି “ରାଜନୈତିକ ମନ୍ତବ୍ୟ” ଦେବା ସେ କେବେ ଦେଖି ନାହାନ୍ତି। ସେ କହିଛନ୍ତି, “ଜଗଦୀପ ଧନଖଡ଼ଙ୍କ ମନ୍ତବ୍ୟ ଦେଖି ମୁଁ ଦୁଃଖିତ ଓ ଆଶ୍ଚର୍ଯ୍ୟ ହୋଇଛି। ଆଜିର ସମୟରେ ଦେଶରେ ଯଦି କୌଣସି ପ୍ରତିଷ୍ଠାନ ଉପରେ ସମସ୍ତେ ଭରସା କରୁଛନ୍ତି, ତାହା ହେଉଛି କୋର୍ଟ। ରାଷ୍ଟ୍ରପତି କେବଳ ନାମମାତ୍ର ମୁଖ୍ୟ ଅଟନ୍ତି ଏବଂ ସେ ମନ୍ତ୍ରୀମଣ୍ଡଳର ପରାମର୍ଶ ଓ କ୍ଷମତା ଅନୁଯାୟୀ କାର୍ଯ୍ୟ କରନ୍ତି। ରାଷ୍ଟ୍ରପତିଙ୍କର ବ୍ୟକ୍ତିଗତ କ୍ଷମତା ନାହିଁ।”
ଚଳିତ ମାସରେ ସୁପ୍ରିମକୋର୍ଟ ତାମିଲନାଡୁ ରାଜ୍ୟପାଳଙ୍କ ବିଲ୍ଗୁଡ଼ିକୁ ଅନୁମୋଦନ ନ ଦେବାର ନିଷ୍ପତ୍ତିକୁ ରଦ୍ଦ କରିଥିଲେ। ଏହାପରେ ପ୍ରଥମ ଥର ପାଇଁ କୋର୍ଟ ନିର୍ଦ୍ଦେଶ ଦେଇଥିଲେ ଯେ, ରାଜ୍ୟପାଳମାନଙ୍କ ଦ୍ୱାରା ପ୍ରେରିତ ବିଲ୍ଗୁଡ଼ିକ ଉପରେ ରାଷ୍ଟ୍ରପତି ତିନି ମାସ ମଧ୍ୟରେ ନିଷ୍ପତ୍ତି ନେବେ।
ଏହି ରାୟକୁ ଆଧାର କରି ଉପରାଷ୍ଟ୍ରପତି ଧନଖଡ଼ କହିଥିଲେ ଯେ, ସୁପ୍ରିମକୋର୍ଟ “ସୁପର ସଂସଦ” ହୋଇପାରେ ନାହିଁ ଏବଂ ରାଷ୍ଟ୍ରପତିଙ୍କୁ ନିର୍ଦ୍ଦେଶ ଦେବା ଆରମ୍ଭ କରିପାରେ ନାହିଁ। ସେ ଆହୁରି କହିଥିଲେ ଯେ, ସମ୍ବିଧାନର ଅନୁଚ୍ଛେଦ ୧୪୨ ଖଣ୍ଡପୀଠ ପାଇଁ “ପରମାଣୁ ମିସାଇଲ” ପାଲଟିଛି, ଯାହା ଗଣତାନ୍ତ୍ରିକ ଶକ୍ତିଙ୍କ ବିରୁଦ୍ଧରେ ୨୪ଘଣ୍ଟା ଉପଲବ୍ଧ।
ଅନୁଚ୍ଛେଦ ୧୪୨ ସୁପ୍ରିମକୋର୍ଟକୁ ଯେକୌଣସି ମାମଲାରେ “ସମ୍ପୂର୍ଣ୍ଣ ନ୍ୟାୟ” ପ୍ରଦାନ ପାଇଁ ବିଶେଷ କ୍ଷମତା ପ୍ରଦାନ କରେ। ଏହାର ପ୍ରତିକ୍ରିୟାରେ କପିଲ ଶିବଲ କହିଛନ୍ତି, “ଏପରି ମନ୍ତବ୍ୟ ଏମିତି ଲାଗୁଛି ଯେମିତି ଖଣ୍ଡପୀଠଙ୍କୁ ଶିକ୍ଷା ଦିଆଯାଉଛି। କାର୍ଯ୍ୟପାଳିକା ଏଭଳି ଭାବେ ଖଣ୍ଡପୀଠଙ୍କୁ ଆକ୍ରମଣ କରିବା ଉଚିତ୍ ନୁହେଁ। ଅନୁଚ୍ଛେଦ ୧୪୨ ସମ୍ବିଧାନ ଦ୍ୱାରା ସୁପ୍ରିମକୋର୍ଟକୁ କ୍ଷମତା ଦେଇଛି, ସରକାର ଦ୍ୱାରା ନୁହେଁ।
