ଭୋପାଳ: ଆଗାମୀ ଦିନରେ ଦକ୍ଷିଣ ଆଫ୍ରିକାର ବୋତସୱାନାରୁ ଆଠଟି ଚିତା ଦୁଇଟି ପର୍ଯ୍ୟାୟରେ ଭାରତର ମଧ୍ୟପ୍ରଦେଶକୁ ଅଣାଯିବ। ମେ ମାସରେ ଚାରୋଟି ଚିତାବାଘ ଆସିବ, ତା’ପରେ ଆଉ ଚାରୋଟି ଚିତାବାଘ ଭାରତକୁ ଅଣାଯିବ। ପ୍ରୋଜେକ୍ଟ ଚିତା ଅଧୀନରେ, ସେମାନଙ୍କୁ ଏବେ ପର୍ଯ୍ୟାୟକ୍ରମେ ଗାନ୍ଧୀ ସାଗର ଅଭୟାରଣ୍ୟକୁ ସ୍ଥାନାନ୍ତରିତ କରାଯିବ।
ଏନଟିସିଏ(NTCA) ଅଧିକାରୀମାନେ କହିଛନ୍ତି ଯେ, ପ୍ରୋଜେକ୍ଟ ଚିତା ଅଧୀନରେ ଏପର୍ଯ୍ୟନ୍ତ ୧୧୨ କୋଟି ଟଙ୍କାରୁ ଅଧିକ ଖର୍ଚ୍ଚ ହୋଇସାରିଛି। ଏହି ଟଙ୍କା ମଧ୍ୟରୁ ୬୭ ପ୍ରତିଶତ ମଧ୍ୟପ୍ରଦେଶରେ ଚିତା ପୁନର୍ବାସ ପାଇଁ ଖର୍ଚ୍ଚ ହୋଇଛି।
ରାଜସ୍ଥାନ ସୀମାନ୍ତ ଗାନ୍ଧୀ ସାଗର ଅଭୟାରଣ୍ୟକୁ ଚିତାକୁ ଅଣାଯିବ ଏବଂ ପର୍ଯ୍ୟାୟକ୍ରମେ ସେମାନଙ୍କୁ ରଖାଯିବ । ମଧ୍ୟପ୍ରଦେଶ ଏବଂ ରାଜସ୍ଥାନ ମଧ୍ୟରେ ଏକ ଆନ୍ତଃରାଜ୍ୟ ଚିତା ସଂରକ୍ଷଣ କ୍ଷେତ୍ର ପ୍ରତିଷ୍ଠା ପାଇଁ ଏକ ଚୁକ୍ତିନାମା ସ୍ୱାକ୍ଷରିତ ହୋଇଛି।
ମଧ୍ୟପ୍ରଦେଶର କୁନୋ ଜାତୀୟ ଉଦ୍ୟାନରେ ୨୬ଟି ଚିତାବାଘ ଅଛି, ଯେଉଁଥିରୁ ୧୬ଟି ଖୋଲା ଜଙ୍ଗଲରେ ଏବଂ ୧୦ଟି ପୁନର୍ବାସ କେନ୍ଦ୍ରରେ ଅଛନ୍ତି। ଅଧିକାରୀମାନେ କହିଛନ୍ତି ଯେ, ଚିତାମାନଙ୍କୁ ଟ୍ରାକ୍ କରିବା ଏବଂ ମନିଟର କରିବା ପାଇଁ ସାଟେଲାଇଟ୍ କଲାର ଆଇଡିର ବ୍ୟବହାର କରି ୨୪ ଘଣ୍ଟା ଟ୍ରାକ୍ କରାଯାଏ।
ଅଧିକାରୀମାନେ କହିଛନ୍ତି ଯେ ମାଈ ଚିତା ଜ୍ୱାଳା, ଆଶା, ଗାମିନୀ ଏବଂ ବୀରା ଛୁଆ ଜନ୍ମ ଦେଇଛନ୍ତି। ଏହା ସହିତ, କୁନୋରେ ପର୍ଯ୍ୟଟକଙ୍କ ସଂଖ୍ୟା ଦୁଇ ବର୍ଷ ମଧ୍ୟରେ ଦ୍ୱିଗୁଣିତ ହୋଇଛି।
୧୭ ସେପ୍ଟେମ୍ବର,୨୦୨୨ରେ, ନାମ୍ବିଆରୁ ଅଣାଯାଇଥିବା ଆଠଟି ଚିତା (୫ଟି ମାଈ, ୩ଟି ପୁରୁଷ) କୁନୋରେ ମୁକ୍ତ କରାଯାଇଥିଲା, ଯାହା ଚିତାମାନଙ୍କର ପ୍ରଥମ ଆନ୍ତଃମହାଦେଶୀୟ ସ୍ଥାନାନ୍ତରଣ ଥିଲା । ଏହା ପରେ, ଫେବୃଆରୀ ୨୦୨୩ରେ, ଦକ୍ଷିଣ ଆଫ୍ରିକାରୁ କୁନୋକୁ ଆଉ ୧୨ଟି ଚିତା ଅଣାଯାଇଥିଲା।
ଗତ ଶୁକ୍ରବାର ମଧ୍ୟପ୍ରଦେଶର ଭୋପାଳ ଠାରେ ଅନୁଷ୍ଠିତ ଚିତା ପ୍ରକଳ୍ପର ସମୀକ୍ଷା ବୈଠକ ଅନୁଷ୍ଠିତ ହୋଇଥିବାବେଳେ ଏଥିରେ ମୁଖ୍ୟମନ୍ତ୍ରୀ ମୋହନ ଯାଦବ ଏବଂ କେନ୍ଦ୍ର ଜଙ୍ଗଲ, ପରିବେଶ ମନ୍ତ୍ରୀ ଭୂପେନ୍ଦ୍ର ଯାଦବ ପ୍ରମୁଖ ଉପସ୍ଥିତ ଥିଲେ। ଏପରିକି କେନିୟାରୁ ମଧ୍ୟ ଚିତା ଆଣିବାକୁ ସରକାର ଯୋଜନା କରୁଥିବା ଜଣାପଡିଛି।
