ନୂଆଦିଲ୍ଲୀ: ଭାରତ ପାକିସ୍ତାନ ପାଇଁ ପୁଣି ବଡ଼ ଘୋଷଣା କରିଛି । ଭାରତ ପାକିସ୍ତାନ ବିମାନ ପାଇଁ ଏୟାରସ୍ପେସ ବନ୍ଦ ଅବଧିକୁ ୧ ମାସ ବଢାଇ ଦେଇଛି । ଏହାକୁ ଜୁଲାଇ ୨୪ ଯାଏଁ ବଢାଇ ଦିଆଯାଇଛି । ଏୟାରସ୍ପେସ୍ ବନ୍ଦ ନେଇ NOTAM ନୋଟିସ ଜାରି କରିଛି ନୂଆ ଦିଲ୍ଲୀ । ପାକିସ୍ତାନ ପାଇଁ ଭାରତର ଏୟାର ସ୍ପେସ୍ ବନ୍ଦ ଏବେ ମହଙ୍ଗା ହେବ । ପାକିସ୍ତାନର କୌଣସି ବିମାନ ଭାରତୀୟ ବାୟୁସୀମା ଦେଇ ଉଡ଼ାଣ କରି ପାରିବ ନାହିଁ । ପାକିସ୍ତାନରେ ପଞ୍ଜିକୃତ, ପରିଚାଳିତ ଏବଂ ଲିଜରେ ନେଇଥିବା ବିମାନ, ପାକିସ୍ତାନ ଏୟାର ଲାଇନ୍ସ ଏବଂ ସେନା ଉଡ଼ାଣ ପାଇଁ ଏୟାର ସ୍ପେସ୍ ବନ୍ଦ କଲା ଭାରତ ।
ଭାରତୀୟ ଏୟାର ସ୍ପେସ ୩୦ ଏପ୍ରିଲରୁ ପାକିସ୍ତାନ ଏୟାରଲାଇନ୍ସ କମ୍ପାନୀ ପାଇଁ ବନ୍ଦ ରହିଥିଲା । କଶ୍ମୀର ପହଲଗାମରେ ୨୨ ଏପ୍ରିଲରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ଜୀବନ ଚାଲିଯାଇଥିଲା । ଏହାପରେ ଭାରତ ସରକାର ପାକିସ୍ତାନ ଉପରେ କାର୍ଯ୍ୟାନୁଷ୍ଠାନ କରି ଅନେକ ପ୍ରତିବନ୍ଧକ ଲଗାଇଥିଲେ ।
ଭାରତ ଦ୍ବାରା ପାକିସ୍ତାନ ବିମାନ ପାଇଁ ବନ୍ଦ ହୋଇଥିବା ଏୟାର ସ୍ପେସ ପ୍ରଥମେ ୨୪ ମଇରେ ଖୋଲିବାର ଥିଲା । କିନ୍ତୁ ଏହାକୁ ବଢାଇ ୨୪ ଜୁନ୍ କରିଦିଆଯାଇଥିଲା । ଏବେ ନୂଆ ଏନଓଟିଏଏମ୍ ଅନୁଯାୟୀ, ଏହାକୁ ବଢାଇ ଜୁଲାଇ ୨୪ ଯାଏଁ କରିଦଆଯାଇଛି । ସୂଚନାଯୋଗ୍ୟ, ୨୨ ଏପ୍ରିଲରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ତଦନ୍ତ କରୁଥିବା NIA ଏହି ମାମଲାରେ ଏକ ବଡ଼ ଖୁଲାସା କରିଥିଲା । ତଦନ୍ତରୁ ଏନଆଇଏ ଜାଣିବାକୁ ପାଇଥିଲା କି, ପାକ୍-ପ୍ରାୟୋଜିତ ଆତଙ୍କବାଦୀମାନଙ୍କୁ ଆକ୍ରମଣରେ ସ୍ଥାନୀୟ ଓଭରଗ୍ରାଉଣ୍ଡ କର୍ମୀ (OGW) ସହାୟତା କରିଥିଲେ । ଏହି ବ୍ୟକ୍ତି କେବଳ ଆତଙ୍କବାଦୀଙ୍କ ସହିତ ପର୍ଯ୍ୟଟକଙ୍କ ସ୍ଥାନ ସେୟାର କରିନଥିଲେ ବରଂ ଆକ୍ରମଣ ପରେ ସେମାନଙ୍କୁ ଖସିଯିବାରେ ମଧ୍ୟ ସାହାଯ୍ୟ କରିଥିଲେ ।
