ନୂଆଦିଲ୍ଲୀ : ଇଥିଓପିଆରେ ହେଲି ଗବିନ୍ ଜ୍ୱାଳାମୁଖୀ ବିସ୍ଫୋରଣର ପ୍ରଭାବ ଏବେ ଭାରତରେ ଦେଖିବାକୁ ମିଳିଛି । ପ୍ରବଳ ପବନ ଦ୍ୱାରା ଜ୍ୱାଳାମୁଖୀ ଧୂଆଁ ଓମାନ ଏବଂ ଆରବ ସାଗର ଦେଇ ଭାରତୀୟ ବାୟୁମଣ୍ଡଳରେ ପହଞ୍ଚିଛି । ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ଏବଂ ମୁମ୍ବାଇ–ଦିଲ୍ଲୀ ପାଣିପାଗ କାର୍ଯ୍ୟାଳୟ ବିମାନ କମ୍ପାନୀଗୁଡ଼ିକ ପାଇଁ ଏକ SIGMET ଜାରି କରିଛନ୍ତି । ଏହାରି ମଧ୍ୟରେ ବିମାନ ଚଳାଚଳ ଅଧିକାରୀମାନେ ସତର୍କ କରାଇବା ସହିତ ବିମାନ ଚଳାଚଳ ବନ୍ଦ କରିଛନ୍ତି । ଯାହା ଉଡ଼ାଣ ପାଇଁ ବିପଦ ସୃଷ୍ଟି କରିପାରେ ବୋଲି କୁହାଯାଉଛି । ତେଣୁ ରୁଟ୍ ଏବଂ ଉଡ଼ାଣ ସ୍ତର ଉପରେ ବିଶେଷ ସତର୍କତା ଅବଲମ୍ବନ କରାଯିବା ଉଚିତ ।
ସୂଚନାନୁଯାୟୀ, ଇଥିଓପିଆର ହେଲି ଗବିନ୍ ଜ୍ୱାଳାମୁଖୀ ହଠାତ୍ ବିସ୍ଫୋରଣ ହୋଇଥିଲା । ଜ୍ୱାଳାମୁଖୀ ଉଦଗୀରଣ ହେବା ମାତ୍ରେ ସିଧାସଳଖ ବାୟୁପଥକୁ ପ୍ରଭାବିତ କରେ । ଏହି ଉଦଗୀରଣର ପ୍ରଭାବ ୨୩ ନଭେମ୍ବରରେ ଭାରତ ଉପରେ ପଡିଥିଲା । ଏହି ଉଦ୍ଗୀରଣ ହେବା ଫଳରେ ମହାରାଷ୍ଟ୍ର, ଗୁଜରାଟ, ରାଜସ୍ଥାନ ଏବଂ ମଧ୍ୟ ଭାରତର ବିମାନ ମାର୍ଗ ନିକଟ ଦେଇ ଗତି କରୁଛି ।
ପରିସ୍ଥିତିକୁ ଦୃଷ୍ଟିରେ ରଖି ବିମାନ ଚଳାଚଳ ଏୟାର ଇଣ୍ଡିଆର ୧୧ଟି ବିମାନ ଚଳାଚଳକୁ ବାତିଲ କରାଯାଇଛି । ୨୪ ଓ ୨୫ ତାରିଖର ୧୧ଟି ବିମାନ ବାତିଲ କଲା ଏୟାର ଇଣ୍ଡିଆ । AI 106, AI 102-ନ୍ୟୁୟର୍କ-ଦିଲ୍ଲୀ,AI 2204- ଦୁବାଇ-ହାଇଦ୍ରାବାଦ,AI 2290- ଦୋହା-ମୁମ୍ବାଇ, AI 2212- ଦୁବାଇ-ଚେନ୍ନାଇ, AI 2284- ଦୋହା-ଦିଲ୍ଲୀ, AI 2250 ଦମ୍ମାମ-ମୁମ୍ବାଇ, AI 2822 ଚେନ୍ନାଇ-ମୁମ୍ବାଇ, AI 2466 ହାଇଦ୍ରାବାଦ-ଦିଲ୍ଲୀ,AI 2444/2445 ମୁମ୍ବାଇ-ହାଇଦ୍ରାବାଦ-ମୁମ୍ବାଇ, AI 2471/2472 ମୁମ୍ବାଇ-କୋଲକାତା-ମୁମ୍ବାଇ ବିମାନ ବାତିଲ୍ କରାଯାଇଛି ।
ଅନ୍ୟପଟେ ଆଗ୍ନେୟଗିରି ଧୂଆଁ ବିମାନ ପାଇଁ ଅତ୍ୟନ୍ତ ବିପଦଜନକ କାରଣ ଏହା ଇଞ୍ଜିନ ବିଫଳତାର କାରଣ ହୋଇପାରେ । ଧୂଆଁ ଇଞ୍ଜିନ ଉପରେ ପ୍ରଭାବ ପକାଇଥାଏ, ଯାହା ଫଳରେ ଅବରୋଧ ସୃଷ୍ଟି ହୁଏ । ୱିଣ୍ଡସିଲ୍ଡ ଏବଂ ସେନ୍ସରଗୁଡ଼ିକ ମଧ୍ୟ କ୍ଷତିଗ୍ରସ୍ତ ହୋଇଯାଏ । ଏଥିସହ ବିମାନର ଏୟାରଫ୍ରେମଗୁଡ଼ିକ ମଧ୍ୟ କ୍ଷତିଗ୍ରସ୍ତ ହୋଇଥାଏ । ଏହା ରାଡାରରେ ସ୍ପଷ୍ଟ ଭାବରେ ଦେଖାଯାଏ ନାହିଁ ତେଣୁ ବିପଦର ଆଶଙ୍କା ଥାଏ । ଏହି ପରିସ୍ଥିତିକୁ ଦୃଷ୍ଟିରେ ରଖି ମୁମ୍ବାଇ ଏବଂ ଦିଲ୍ଲୀ ପାଣିପାଗ ବିଭାଗର କାର୍ଯ୍ୟାଳୟଗୁଡ଼ିକ SIGMET ଜାରି କରିଛନ୍ତି ।
