ଭେନେଜୁଏଲା : ଭେନେଜୁଏଲା ରାଜଧାନୀ କାରାକାସରେ ପୁଣି ଗୁଳିମାଡ଼ । କାରାକାସରେ ରାଷ୍ଟ୍ରପତି ଭବନ ନିକଟରେ ଆଖିବୁଜା ଗୁଳିମାଡ଼ ହୋଇଛି । ଘଟଣା ପରେ ଲୋକେ ଆତଙ୍କିତ ହୋଇପଡିଛନ୍ତି । ରାଷ୍ଟ୍ରପତିଙ୍କ ଗିରଫଦାରୀ ପରେ ରାଷ୍ଟ୍ରପତି ଭବନ ଏବଂ ଆଖପାଖ ଅଞ୍ଚଳରେ ଗୁଳିମାଡ଼ ହୋଇଥିବା ଜଣାପଡିଛି । ଭେନେଜୁଏଲାର ରାଜଧାନୀ କାରାକାସରେ ଏକ ସନ୍ଦେହୀ ଡ୍ରୋନ୍ ଦେଖିବାକୁ ମିଳିଥିଲା । ତେବେ ରାଷ୍ଟ୍ରପତି ଭବନ ନିକଟରେ ଉଡୁଥିବା ସେହି ଡ୍ରୋନକୁ ମାରି ଖସାଇଛି ଭେନେଜୁଏଲା ସେନା । ସ୍ଥିତି ଏବେ ନିୟନ୍ତ୍ରଣାଧୀନ ରହିଛି ।
ରାଷ୍ଟ୍ରପତି ଗିରଫ ହେବା ପରେ ସଶସ୍ତ୍ର ଯାନ ଓ ସାମରିକ କର୍ମଚାରୀମାନେ ରାଷ୍ଟ୍ରପତି ଭବନକୁ ଘେରି ରହିଛନ୍ତି । ତେବେ ସରକାର ପରିସରରେ ଡ୍ରୋନ୍ର ଉପସ୍ଥିତିକୁ ତୀବ୍ର ନିନ୍ଦା କରିଛନ୍ତି । କେନ୍ଦ୍ରୀୟ କାରାକାସର ମିରାଫ୍ଲୋରେସ୍ ପ୍ୟାଲେସ୍ ଉପରେ ଅଜ୍ଞାତ ଡ୍ରୋନ୍ ଉଡ଼ୁଥିବାର ଦେଖାଯାଇଥିଲା । ରାଷ୍ଟ୍ରପତି ଭବନ ଚାରିପାଖରେ ଥିବା ଅଞ୍ଚଳ ସମେତ କାରାକାସର ଅନେକ ଅଞ୍ଚଳରେ ପ୍ରାୟ ୪୫ ମିନିଟ୍ ପର୍ଯ୍ୟନ୍ତ ପ୍ରବଳ ଗୁଳିକାଣ୍ଡ ଶୁଣାଯାଇଥିଲା ।
ଆମେରିକା ଶନିବାର ଭେନେଜୁଏଲା ଉପରେ ଆକ୍ରମଣ କରିଥିଲା, ପଦଚ୍ୟୁତ ରାଷ୍ଟ୍ରପତି ନିକୋଲାସ୍ ମାଦୁରୋ ଏବଂ ତାଙ୍କ ପତ୍ନୀଙ୍କୁ ବନ୍ଦୀ କରିଥିଲା । ଭେନେଜୁଏଲା ଉପରେ ଗୁଳିମାଡ଼ ପରେ ଆମେରିକା ଏକ ବିବୃତ୍ତି ଜାରି କରିଛି । ହ୍ୱାଇଟ୍ ହାଉସ କହିଛି ଯେ, ଭେନେଜୁଏଲାରେ ଗୁଳିକାଣ୍ଡରେ ଆମେରିକା ସମ୍ପୃକ୍ତ ନାହିଁ । ହ୍ୱାଇଟ୍ ହାଉସ କହିଛି ଯେ, ଭେନେଜୁଏଲା ରାଷ୍ଟ୍ରପତି ଭବନ ନିକଟରେ ଗୁଳିକାଣ୍ଡ ଏବଂ ଡ୍ରୋନ୍ ଦେଖାଯାଇଥିଲା, କିନ୍ତୁ ଏହି ଘଟଣାରେ ଆମେରିକାର କୌଣସି ଭୂମିକା ନାହିଁ ।
