ଭୁବନେଶ୍ବର: ଘରୋଇ ସହାୟକଙ୍କୁ ମିଳିବ କି ସର୍ବନିମ୍ନ ମଜୁରୀ? ସର୍ବନିମ୍ନ ମଜୁରୀ ଲାଗୁ କରିବାକୁ ରାଜ୍ୟଗୁଡ଼ିକୁ ସୁପ୍ରିମକୋର୍ଟଙ୍କ ପରାମର୍ଶ । ଘରେ କାମ କରୁଥିବା ଶ୍ରମିକଙ୍କ ସର୍ବନିମ୍ନ ମଜୁରୀ ସମ୍ପର୍କିତ ଏକ ଆବେଦନ ଉପରେ ଶୁଣାଣି କରି ଏହି ରାୟ ଦେଇଛନ୍ତି କୋର୍ଟ । କହିଛନ୍ତି, ଘରୋଇ ସହାୟକଙ୍କୁ ଶୋଷଣରୁ ରକ୍ଷା କରିବା ପାଇଁ ସମସ୍ତ ରାଜ୍ୟ ସରକାର ଉପଯୁକ୍ତ ବ୍ୟବସ୍ଥା କରିବା ଜରୁରୀ । ସର୍ବନିମ୍ନ ମଜୁରୀ ଧାର୍ଯ୍ୟ କରିବା ରାଜ୍ୟ ସରକାରଙ୍କ କାମ ।
ତେଣୁ ସରକାର ନିଜେ ଏହି ସମସ୍ୟାର ସମାଧାନ କରନ୍ତୁ ବୋଲି ପ୍ରଧାନ ବିଚାରପତି ସୂର୍ଯ୍ୟକାନ୍ତ ଏବଂ ବିଚାରପତି ଜୟମାଲ୍ୟ ବାଗ୍ ଚୀଙ୍କ ଖଣ୍ଡପୀଠ କହିଛନ୍ତି । ଶୋଷଣ ଉପରେ ଚିନ୍ତା ପ୍ରକଟ କରି କୋର୍ଟ କହିଛନ୍ତି, ଦେଶରେ ପ୍ରାୟ ୮ କୋଟି ଘରୋଇ ସହାୟକ ଅଛନ୍ତି । ପ୍ଲେସମେଣ୍ଟ ଏଜେନ୍ସିମାନେ ଘର ମାଲିକଙ୍କଠାରୁ ୪୦ ହଜାର ଟଙ୍କା ନେଉଥିବା ବେଳେ ଶ୍ରମିକଙ୍କୁ ମାତ୍ର ୧୯ ହଜାର ଟଙ୍କା ଦେଉଛନ୍ତି । ଯଦି ମଜୁରୀ ନିୟମ ଅଧିକ କଡ଼ାକଡ଼ି ହୁଏ, ତେବେ ଲୋକେ ଆଇନଗତ ଝାମେଲା ଭୟରେ ଘରୋଇ ସହାୟକ ରଖିବା ବନ୍ଦ କରିଦେଇ ପାରନ୍ତି ।
ଏହାଦ୍ୱାରା ଅନେକ ଲୋକ ବେକାର ହୋଇଯିବାର ଆଶଙ୍କା ରହିଛି।ଭାରତର ପ୍ରାୟ ୧୫ଟି ରାଜ୍ୟରେ ଘରୋଇ ସହାୟକଙ୍କ ପାଇଁ ସର୍ବନିମ୍ନ ମଜୁରୀ ନିୟମ ପୂର୍ବରୁ ଲାଗୁ ହୋଇଛି। ଅନ୍ୟ ରାଜ୍ୟଗୁଡ଼ିକ ମଧ୍ୟ ଏହା ଉପରେ ବିଚାର କରିବାକୁ କୋର୍ଟ କହିଛନ୍ତି । ସୁପ୍ରିମକୋର୍ଟ କୌଣସି ନୂଆ ଆଇନ ତିଆରି କରିନାହାନ୍ତି, କିନ୍ତୁ ରାଜ୍ୟ ସରକାରଙ୍କୁ ଏହି ଅବହେଳିତ ଶ୍ରେଣୀର ଉନ୍ନତି ପାଇଁ ତୁରନ୍ତ ପଦକ୍ଷେପ ନେବାକୁ ପରାମର୍ଶ ଦେଇଛନ୍ତି ସୁପ୍ରିମକୋର୍ଟ ।
