ନୂଆଦିଲ୍ଲୀ : ଲୋକସଭା ବାଚସ୍ପତି ଓମ ବିରଳା ସଦନରେ ପ୍ରଧାନମନ୍ତ୍ରୀ ମୋଦିଙ୍କ ଭାଷଣ ଟାଳିକା ନେଇ ଦାବି କରିଛନ୍ତି । ବୁଧବାର ଅପରାହ୍ନ ୫ଟା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସଂସଦକୁ ସମ୍ବୋଧିତ କରିବାର ଥିଲା । ହେଲେ ଶେଷ ସମୟରେ ଏହାକୁ ବାରଣ କରାଯାଇଥିଲା । ଏହାର କାରଣ ଆଜି ସାମ୍ନାକୁ ଆସିଛି । ଲୋକସଭା ବାଚସ୍ପତି ଓମ ବିରଳା ନିଜ ପୀଠରେ ବସି କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦିଙ୍କ ସହିତ ଅପ୍ରତ୍ୟାସିତ ଘଟଣା ଘଟିବାର ଆଶଙ୍କା ଥିଲା, ଏଥିଲାଗି ସେ ସଦନକୁ ନ ଆସନ୍ତୁ ବୋଲି ଆଗ୍ରହ୍ୟ କରାଯାଇଥିଲା ।
ଗୁରୁବାର ଲୋକସଭା କାର୍ଯ୍ୟକ୍ରମ କାଳରେ ବାଚସ୍ପଚି ଓମ ବିରଳା କହିଛନ୍ତି ଯେ, ପରିସ୍ଥିତିକୁ ଦେଖି ମୁଁ ପ୍ରଧାନମନ୍ତ୍ରୀ ମୋଦିଙ୍କୁ ସଂସଦକୁ ନ ଆସିବାକୁ ଆଗ୍ରହ୍ୟ କରିଥିଲି ଓ ସେ ଏହାକୁ ମାନିଥିଲେ । ଏହି ଅବସରରେ ବାଚସ୍ପତି କଂଗ୍ରେସ ସାଂସଦମାନଙ୍କୁ ମଧ୍ୟ ଚେତାବନୀ ଦେଇଛନ୍ତି । ପୋଷ୍ଟର ନେଇ ଆସିଲେ ସଂସଦରେ କାର୍ଯ୍ୟକ୍ରମ ଚାଲି ପାରିବନି ବୋଲି କଂଗ୍ରେସ ପ୍ରତିନିଧିଙ୍କୁ କହିଛନ୍ତି । ଗୃହକାର୍ଯ୍ୟରେ ବିରୋଧୀ ବାରମ୍ବାର ବାଧା ଦେବାରୁ ବାଚସ୍ପତି ଲୋକସଭା ସ୍ଥଗିତ କରିଦେଇଥିଲେ ।
ତେବେ ଗୁରୁବାର ଓମ ବିରଳାଙ୍କ ବୟାନ ପରେ କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧି (ଭଦ୍ରା) କହିଛନ୍ତି ଯେ ପ୍ରଧାନମନ୍ତ୍ରୀ ‘ବାଚସ୍ପତିଙ୍କ ପଛରେ ଲୁଚୁଛନ୍ତି । କାଲି ସଦନକୁ ଆସିବାକୁ ପ୍ରଧାନମନ୍ତ୍ରୀଙ୍କ ସାହସ ହେଲାନି, କାରଣ ୩ ଜଣ ମହିଳା ବାଚସ୍ପତିଙ୍କ ସାମ୍ନାରେ ଛିଡା ହୋଇ ରହିଥିଲେ । ଗୃହରେ କୌଣସି ଚର୍ଚ୍ଚା ହେଉ ନାହିଁ ।
ସୂଚନାଯୋଗ୍ୟ, ଲୋକସଭାରେ ବୁଧବାର ବିରୋଧୀଙ୍କ ହଟ୍ଟଗୋଳ ଯୋଗୁ ଗୃହ କାର୍ଯ୍ୟରେ ବାରମ୍ବାର ବାଧା ଉପୁଜିଥିଲା । ଏଥିରେ ଲୋକସଭା ବାଚସ୍ପତି ଓମ ବିରଲା ଆହ୍ୱାନ ଦେଇଥିଲେ । ଏହା ପରେ ପ୍ରଧାନମନ୍ତ୍ରୀଙ୍କ ଭାଷଣ ବିନା ଗୃହରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଗୃହୀତ ହୋଇଯାଇଥିଲା ।
