ଭୁବନେଶ୍ୱର : ଧାନ କିଣାରେ ଅବ୍ୟବସ୍ଥା । ବିଜେପି ସରକାରଙ୍କୁ ନବୀନଙ୍କ ତୀବ୍ର ସମାଲୋଚନା । ମଣ୍ଡିରେ ଚାଷୀ ହନ୍ତସନ୍ତ । ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଲେ ବିରୋଧୀ ଦଳ ନେତା ନବୀନ ପଟ୍ଟନାୟକ । ଓଡ଼ିଶାରେ ଚାଲିଥିବା ଖରିଫ ଧାନ କିଣା ପ୍ରକ୍ରିୟାରେ ବ୍ୟାପକ ଅବ୍ୟବସ୍ଥାକୁ ନେଇ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ବିଜେପି ସରକାରଙ୍କୁ ଘେରିଛନ୍ତି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଲେଖିଥିବା ଏକ ଚିଠିରେ ସେ ଅଭିଯୋଗ କରିଛନ୍ତି ଯେ, ନିର୍ବାଚନ ସମୟରେ ଦେଇଥିବା ପ୍ରତିଶ୍ରୁତି ପାଳନ ନକରି ସରକାର ଚାଷୀଙ୍କ ସହ ବିଶ୍ୱାସଘାତକତା କରିଛନ୍ତି ।
ନବୀନଙ୍କ ପ୍ରମୁଖ ଅଭିଯୋଗ ଗୁଡିକ ହେଲା କଟନି ଛଟନିରେ ଚାଷୀ ଆତଙ୍କିତ । ମଣ୍ଡିରେ ଗୁଣବତ୍ତା ନାଁରେ କ୍ୱିଣ୍ଟାଲ ପିଛା ୫ ରୁ ୭ କିଲୋ ଧାନ କଟାଯାଉଛି । ଏଥିରେ ମିଲର ଓ ସରକାରୀ ଅଧିକାରୀଙ୍କ ମଧୁଚନ୍ଦ୍ରିକା ଥିବା ସେ ଅଭିଯୋଗ କରିଛନ୍ତି । ଏହାସହ ୧୫୦ କ୍ୱିଣ୍ଟାଲ ସୀମାକୁ ନେଇ ଆପତ୍ତି ଉଠାଇଛନ୍ତି । କହିଛନ୍ତି ୮୦୦ ଟଙ୍କାର ଇନପୁଟ୍ ସବସିଡି ଉପରେ ୧୫୦ କ୍ୱିଣ୍ଟାଲର ସୀମା ଲଗାଇବା ଦ୍ୱାରା ଚାଷୀମାନେ କ୍ଷତି ସହୁଛନ୍ତି । ଏହା ବିଜେପିର ସଂକଳ୍ପ ପତ୍ରର ବିରୋଧାଚରଣ କରୁଛି ।
ଧାନ ଉଠାଇବାରେ ବିଳମ୍ବ ଯୋଗୁଁ ହଜାର ହଜାର ଚାଷୀ ଶୀତ କାକରରେ ଖୋଲା ଆକାଶ ତଳେ ଧାନ ଜଗି ରହିଛନ୍ତି । ୪୮ ଘଣ୍ଟା ମଧ୍ୟରେ ଟଙ୍କା ମିଳିବାର ପ୍ରତିଶ୍ରୁତି ମଧ୍ୟ ଫେଲ୍ ମାରିଛି । ଯାହାଫଳରେ ଚାଷୀ ଅଭାବୀ ବିକ୍ରୀର ସମ୍ମୁଖୀନ ହେଉଛନ୍ତି । ସରକାରୀ ଅବହେଳା ଯୋଗୁଁ ଚାଷୀମାନେ ବାଧ୍ୟ ହୋଇ ଦଲାଲ ଓ ମିଲରଙ୍କୁ କମ୍ ଦାମରେ ଧାନ ବିକୁଛନ୍ତି ।
ଏହାସହ ନବୀନ ସରକାରଙ୍କ ପାଖରେ ୪ଟି ଦାବି ରଖିଛନ୍ତି । ପ୍ରଥମ ମଣ୍ଡିରେ କଟ୍ ନୀ-ଛଟ୍ ନୀ ରୋକିବା ପାଇଁ ସ୍ୱତନ୍ତ୍ର ସ୍କ୍ୱାଡ୍ ଗଠନ କରାଯାଉ । ଦ୍ବିତୀୟ ଇନପୁଟ୍ ସବସିଡି ଉପରେ ଥିବା ୧୫୦ କ୍ୱିଣ୍ଟାଲ ସୀମାକୁ ହଟାଯାଉ । ତୃତୀୟରେ ପ୍ରତିଶ୍ରୁତି ଅନୁଯାୟୀ ୪୮ ଘଣ୍ଟା ମଧ୍ୟରେ ଚାଷୀଙ୍କ ବ୍ୟାଙ୍କ ଖାତାକୁ ଟଙ୍କା ପଠାଯାଉ । ଚତୁର୍ଥରେ ଖୋଲା ଆକାଶ ତଳେ ପଡ଼ିଥିବା ଧାନକୁ ୭୨ ଘଣ୍ଟା ମଧ୍ୟରେ ଉଠାଯାଉ । ନବୀନ ପଟ୍ଟନାୟକ ଚେତାବନୀ ଦେଇଛନ୍ତି ଯେ, ଯଦି ସରକାର ତୁରନ୍ତ ପଦକ୍ଷେପ ନନିଅନ୍ତି, ତେବେ ବିଜୁ ଜନତା ଦଳ ଚାଷୀଙ୍କ ସ୍ୱାର୍ଥ ପାଇଁ ସାରା ରାଜ୍ୟରେ ଆନ୍ଦୋଳନକୁ ଜୋରଦାର କରିବ ।
