ମଧ୍ୟ ପ୍ରଦେଶ : ଚର୍ଚ୍ଚାରେ ମଧ୍ୟ ପ୍ରଦେଶର ଆଇଏଏସ୍ ଅଫିସର । ୧୦ ବର୍ଷରେ କଲେଣି ୩ ବିବାହ । ଆଉ ୩ ଜଣ ଯାକ ପତ୍ନୀ ଆଇଏଏସ୍ ଅଧିକାରୀ । ନିଜର ବ୍ୟକ୍ତିଗତ ଜୀବନକୁ ନେଇ ଖବର ପାଲଟିଥିବା ଏହି ପ୍ରଶାସନିକ ଅଧିକାରୀ ହେଉଛନ୍ତି ଅଭି ପ୍ରସାଦ। ଏବେ ସେ ତୃତୀୟ ଥର ପାଇଁ ବିବାହ କରିଛନ୍ତି । ତେବେ ତୃତୀୟ ଥର ବିବାହ କରିବା ପରେ ସୋସିଆଲ ମିଡିଆରେ ଭାଇରାଲ ହେଉଛି ଆଇଏଏସଙ୍କ ବିବାହର ଚର୍ଚ୍ଚିତ କାହାଣୀ । ୨୦୧୪ ବ୍ୟାଚ୍ ଆଇଏଏସ୍ ଅଫିସର ଅଭି ପ୍ରସାଦ ଗତ ୧୧ ତାରିଖରେ କୁନୋ ନ୍ୟାସନାଲ ପାର୍କରେ ବିବାହ କରିଛନ୍ତି । ଏଥର ସେ ୨୦୧୭ ବ୍ୟାଚ୍ ର ଆଇଏଏସ୍ ଅଧିକାରୀ ଅଙ୍କିତା ଧାକରେଙ୍କୁ ବିବାହ କରିଛନ୍ତି । ବର୍ତ୍ତମାନ ସେ ରାଜ୍ୟ ପ୍ରଶାସନିକ ବିଭାଗରେ ଉପ-ସଚିବ ଭାବରେ କାର୍ଯ୍ୟରତ।
ଅଭି ପ୍ରସାଦ ହେଉଛନ୍ତି ଉତ୍ତର ପ୍ରଦେଶର ସୀତାପୁର ଜିଲାର ନିବାସୀ । ୨୦୧୩ରେ ପ୍ରଥମେ IPS ପାଇଁ ମନୋନୀତ ହୋଇଥିଲେ । କିନ୍ତୁ ୨୦୧୪ରେ UPSC ପରୀକ୍ଷାରେ ସର୍ବଭାରତୀୟ ସ୍ତରରେ ୧୩ତମ ର୍ୟାଙ୍କ ହାସଲ କରି IAS ହୋଇଥିଲେ। ତାଙ୍କ ଜେଜେବାପା ତାମ୍ବେଶ୍ୱର ପ୍ରସାଦ ପୂର୍ବତନ ପ୍ରଧାନମନ୍ତ୍ରୀ ଚୌଧୁରୀ ଚରଣ ସିଂଙ୍କ ସରକାରରେ ଜଣେ ପ୍ରଭାବଶାଳୀ ମନ୍ତ୍ରୀ ଥିଲେ। । ଅଭି ପ୍ରସାଦ ଜଣେ ଦକ୍ଷ ଅଧିକାରୀ ଭାବେ ନିଜର ପରିଚୟ ସୃଷ୍ଟି କରିଛନ୍ତି । ବିଶେଷ କରି କଟନୀ ଜିଲାପାଳ ଭାବେ କାର୍ଯ୍ୟ କରିବା ସମୟରେ ‘ଅପୁଷ୍ଟି ନିରାକରଣ’ ଦିଗରେ ତାଙ୍କର ଅଭିନବ ପ୍ରୟାସ ବେଶ୍ ପ୍ରଶଂସନୀୟ ହୋଇଥିଲା । ବର୍ତ୍ତମାନ ସେ ମଧ୍ୟପ୍ରଦେଶ ରୋଜଗାର ଗ୍ୟାରେଣ୍ଟି କାଉନସିଲର ମୁଖ୍ୟ ନିର୍ବାହୀ ଅଧିକାରୀ (CEO) ଭାବେ କାର୍ଯ୍ୟ କରୁଛନ୍ତି ।
ଅଭିଙ୍କ ପ୍ରଥମ ପତ୍ନୀ ରିଜୁ ବାଫନା ମଧ୍ୟ ଜଣେ IAS ଅଫିସର ଥିଲେ । ଦିଲ୍ଲୀରେ ପ୍ରସ୍ତୁତି ସମୟରୁ ଉଭୟଙ୍କ ମଧ୍ୟରେ ସମ୍ପର୍କ ଗଢିଉଠିଥିଲା । ତେବେ ବିବାହର କିଛି ବର୍ଷ ପରେ ସେମାନଙ୍କର ବିଚ୍ଛେଦ ହୋଇଥିଲା । ବର୍ତ୍ତମାନ ଋଜୁ ଶାଜାପୁରର ଜିଲାପାଳ ଭାବେ ଦାୟିତ୍ୱ ତୁଲାଉଛନ୍ତି । ପରେ ୨୦୧୬ ବ୍ୟାଚର IAS ଅଫିସର ମିଶା ସିଂଙ୍କ ସହ ସେ ଦ୍ୱିତୀୟ ବିବାହ କରିଥିଲେ । ମିଶା ନିଜର କ୍ୟାଡର ପରିବର୍ତ୍ତନ କରି ମଧ୍ୟପ୍ରଦେଶ ଆସିଥିଲେ । ମାତ୍ର ୪ ବର୍ଷ ଚାଲିଥିଲା ବିବାହ । ୨୦୨୫ରୁ ବର୍ତ୍ତମାନ ପର୍ଯ୍ୟନ୍ତ ମିଶା ରତଲାମ୍ କଲେକ୍ଟର ଭାବରେ କାର୍ଯ୍ୟରତ । ଦୁଇ ଆଇଏଏସ୍ ପତ୍ନୀଙ୍କୁ ଛାଡପତ୍ର ପରେ ଏବେ ତୃତୀୟ ଥର ପାଇଁ ଆଉ ଜଣେ ପ୍ରଶାସନିକ ଅଧିକାରୀଙ୍କୁ ବିବାହ କରି ପୁଣିଥରେ ଚର୍ଚ୍ଚାର ପରିସରକୁ ଆସିଛନ୍ତି ଅଭି ପ୍ରସାଦ ।
