ନୂଆଦିଲ୍ଲୀ: ବେଙ୍ଗଲ ପ୍ରଶାସନ ଉପରେ ବର୍ଷିଲେ ରାଷ୍ଟ୍ରପତି । ଦାର୍ଜିଲିଂରେ ସାନ୍ତାଳ ସମ୍ମିଳନାରେ ବ୍ୟାପକ ପ୍ରଶାସନିକ ଅବ୍ୟବସ୍ଥା ନେଇ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅସନ୍ତୋଷ । ଲୋକମାନେ ତାଙ୍କୁ ଭେଟଙ୍କୁ ବୋଲି ବେଙ୍ଗଲ ପ୍ରଶାସନ ଚାହୁଁନଥିଲା । ସମ୍ମିଳନୀକୁ ମମତା ଦିଦି କାହିଁକି ଆସିଲେ ନାହିଁ ବୋଲି ପ୍ରଶ୍ନ କରି ଅସନ୍ତୋଷ ବ୍ୟକ୍ତ କରିଛନ୍ତି । ସାନ୍ତାଳ ସମ୍ମିଳନୀର ସ୍ଥାନ ଚୟନ ଏବଂ ମୁଖ୍ୟମନ୍ତ୍ରୀଙ୍କ ଅନୁପସ୍ଥିତିକୁ ନେଇ ସେ ଖୋଲାଖୋଲି ଭାବେ ନିଜର ମନର ଦୁଃଖ ପ୍ରକାଶ କରିଛନ୍ତି ।
ସାନ୍ତାଳ ସମ୍ମିଳନୀ ପାଇଁ ପ୍ରଶାସନ ଏପରି ଏକ ସ୍ଥାନ ବାଛିଲା ଯେଉଁଠାକୁ ସାଧାରଣ ଲୋକ ପହଞ୍ଚିବା କଷ୍ଟକର ବୋଲି କହିଛନ୍ତି ମହାମହିମ । ସମ୍ମିଳନୀ ଦୂରରେ ହେଉଥିବାରୁ ଅନେକ ଲୋକ ଆସିପାରିଲେ ନାହିଁ, ଯାହା ତାଙ୍କୁ ବହୁତ ଦୁଃଖ ଦେଇଛି । ବୋଧହୁଏ ପ୍ରଶାସନ ଭାବିଥିଲା କେହି ଆସିବେନି ଆଉ ରାଷ୍ଟ୍ରପତି ସେମିତି ଫେରିଯିବେ । ଏହା ସହ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ନେଇ ପ୍ରତିକ୍ରିୟା ରଖିଛନ୍ତି । ଯେତେବେଳେ ରାଷ୍ଟ୍ରପତି ଆସନ୍ତି, ମୁଖ୍ୟମନ୍ତ୍ରୀ ଏବଂ ମନ୍ତ୍ରୀମାନେ ଉପସ୍ଥିତ ରହିବା କଥା । କିନ୍ତୁ ମମତା ଦିଦି ଆସିଲେ ନାହିଁ । ସେ କାହିଁକି ମୋ ଉପରେ ରାଗିଛନ୍ତି ମୁଁ ଜାଣିନି ବୋଲି କହିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ ।
ସେପଟେ ରାଷ୍ଟ୍ରପତିଙ୍କ ଅସନ୍ତୋଷ ପରେ ପ୍ରତିକ୍ରିୟା ରଖିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ନିର୍ବାଚନ ସମୟରେ ବିଜେପି କଥାରେ ପଡ଼ି ରାଜନୀତି କରନ୍ତୁ ନାହିଁ ବୋଲି କହିଛନ୍ତି । ରାଷ୍ଟ୍ରପତିଙ୍କ ପ୍ରତି ତାଙ୍କର ସମ୍ମାନ ଅଛି, କିନ୍ତୁ ସେ ବିଜେପିର ଏଜେଣ୍ଡାରେ କାମ କରିବା ଉଚିତ୍ ନୁହେଁ । ଏହା ସହ SIR ନୋଇ ପ୍ରଶ୍ନ କରିଛନ୍ତି । ବିଜେପିର ‘SIR’ ଅଭ୍ୟାସ ଯୋଗୁଁ କେତେ ଆଦିବାସୀ ପ୍ରଭାବିତ ହୋଇଛନ୍ତି ଏବଂ ସେମାନଙ୍କୁ କିଭଳି ବାହାର କରିଦିଆଯାଇଛି, ସେ ବିଷୟରେ ରାଷ୍ଟ୍ରପତି ଜାଣିବା ଉଚିତ୍ ବୋଲି କହିଛନ୍ତି ମମତା । ଏହା ସହ ମଣିପୁରରେ ଆଦିବାସୀଙ୍କ ଉପରେ ଅତ୍ୟାଚାର ବେଳେ ସେତେବେଳେ ଆପଣଙ୍କ ସ୍ବର କାହିଁକି ଶୁଣାଯାଉନଥିଲା ବୋଲି ପ୍ରଶ୍ନ କରିଛନ୍ତି ।
