ରଣପୁର: ବଜ୍ରକୋଟ ଗ୍ରାମପଞ୍ଚାୟତ ଅଧୀନ ବିଦ୍ୟାଳୟ ପରିସରରେ ସ୍ଥାନାନ୍ତରଣ ଶିକ୍ଷକ ସେବା ସମ୍ବର୍ଦ୍ଧନା ଓ ମେଧା ସମ୍ବର୍ଦ୍ଧନା କାର୍ଯ୍ୟକ୍ରମ ଆନନ୍ଦ ଓ ଭାବାବେଗପୂର୍ଣ୍ଣ ପରିବେଶରେ ଅନୁଷ୍ଠିତ ହୋଇଛି। ପ୍ରଧାନ ଶିକ୍ଷକ ସୁଶୀଲ କୁମାର ରଣାଙ୍କ ସଭାପତିତ୍ୱରେ ଆୟୋଜିତ ଏହି ସମାରୋହରେ ଶିକ୍ଷକଙ୍କ ନିଷ୍ଠାପର ସେବାକୁ ସମ୍ମାନ ଦେବା ସହ ବିଦ୍ୟାଳୟର ମେଧାବୀ ଛାତ୍ରୀଙ୍କ ସଫଳତାକୁ ଉତ୍ସାହିତ କରାଯାଇଥିଲା।
କାର୍ଯ୍ୟକ୍ରମରେ ବଜ୍ରକୋଟ ଗ୍ରାମପଞ୍ଚାୟତର ସରପଞ୍ଚ ବନିତା ବାଲିଆରସିଂହ ମୁଖ୍ୟ ଅତିଥି ଏବଂ ବିଶିଷ୍ଟ ଶିକ୍ଷାବିତ୍ ଲକ୍ଷ୍ମୀଧର ସାହୁ ମୁଖ୍ୟ ବକ୍ତା ଭାବେ ଯୋଗଦେଇଥିଲେ। ସମ୍ମାନିତ ଅତିଥି ଭାବେ ଅତିରିକ୍ତ ବ୍ଲକ ଶିକ୍ଷା ଅଧିକାରୀ ମାଧବ ଚନ୍ଦ୍ର ପ୍ରଧାନ, ଗୌରାଙ୍ଗପୁର କ୍ଲଷ୍ଟରର ସି.ଆର.ସି.ସି. ସୁଧାକର ମିଶ୍ର, ଶିକ୍ଷାବିତ୍ ଅଶୋକ କୁମାର ଦାଶ, ଶିକ୍ଷାବିତ୍ ସନ୍ତୋଷ କୁମାର ମିଶ୍ର, ବିଦ୍ୟାଳୟ ପରିଚାଳନା କମିଟି ସଭାପତି ଶେଷଦେବ ପ୍ରଧାନ, ପଞ୍ଚସଖା ସେତୁ କମିଟି ସଭାପତି ଗଣେଶ୍ୱର ପ୍ରଧାନ ଓ ସଦସ୍ୟ ରବୀନ୍ଦ୍ର କୁମାର ସଂଗ୍ରାମସିଂହ ପ୍ରମୁଖ ଯୋଗଦେଇଥିଲେ।
ବିଦ୍ୟାଳୟରେ ନିଷ୍ଠା ଓ ଦାୟିତ୍ୱବୋଧର ସହ ଶିକ୍ଷାଦାନ କରି ଅନ୍ୟତ୍ର ସ୍ଥାନାନ୍ତରିତ ହୋଇଥିବା ଶିକ୍ଷକ ପ୍ରଦୀପ କୁମାର ସେନଗୁପ୍ତ ଓ କାହ୍ନୁ ଚରଣ ମୁଦୁଲିଙ୍କୁ ଅତିଥିମାନଙ୍କ ଦ୍ୱାରା ଉତ୍ତରୀୟ, ମାନପତ୍ର, ମୋମେଣ୍ଟୋ ଓ ପୁଷ୍ପଗୁଚ୍ଛ ପ୍ରଦାନ କରାଯାଇ ଭାବପୂର୍ଣ୍ଣ ପରିବେଶରେ ସେବା ସମ୍ବର୍ଦ୍ଧନା ଦିଆଯାଇଥିଲା। ଦୀର୍ଘଦିନର ସହକର୍ମୀଙ୍କୁ ବିଦାୟ ଦେବା ବେଳେ ବିଦ୍ୟାଳୟ ପରିବେଶ ଭାବାବେଗପୂର୍ଣ୍ଣ ହୋଇଉଠିଥିଲା।
ଏହି ଅବସରରେ ବିଦ୍ୟାଳୟର ମେଧାବୀ ଛାତ୍ରୀ ସ୍ୱୟଂ ଶ୍ରୀୟା ପ୍ରଧାନଙ୍କୁ ମଧ୍ୟ ମେଧା ସମ୍ବର୍ଦ୍ଧନା ପ୍ରଦାନ କରାଯାଇଥିଲା। ସ୍ୱୟଂ ଶ୍ରୀୟା ଓଡ଼ିଶା ଆଦର୍ଶ ବିଦ୍ୟାଳୟ ପ୍ରବେଶିକା ପରୀକ୍ଷା ୨୦୨୫–୨୬ରେ ସଫଳତା ହାସଲ କରି ବିଦ୍ୟାଳୟ ଓ ନିଜ ଗ୍ରାମ ପାଇଁ ଗୌରବ ଆଣିଛନ୍ତି। ତାଙ୍କର ଏହି ଉଲ୍ଲେଖନୀୟ ସଫଳତା ପାଇଁ ଅତିଥିମାନେ ଉତ୍ତରୀୟ, ମାନପତ୍ର, ମୋମେଣ୍ଟୋ ଓ ପୁଷ୍ପଗୁଚ୍ଛ ପ୍ରଦାନ କରି ସମ୍ମାନିତ କରିଥିଲେ। ତାଙ୍କର ସଫଳତା ଅନ୍ୟ ଛାତ୍ରଛାତ୍ରୀଙ୍କୁ ମଧ୍ୟ ଅଧ୍ୟୟନ ପ୍ରତି ଉତ୍ସାହିତ କରିବ ବୋଲି ଅତିଥିମାନେ ମତବ୍ୟକ୍ତ କରିଥିଲେ।
ସଭାରେ ବକ୍ତାମାନେ ଶିକ୍ଷକଙ୍କ ଅବଦାନ, ଛାତ୍ରଛାତ୍ରୀଙ୍କ ସଫଳତା ଓ ବିଦ୍ୟାଳୟର ଶିକ୍ଷା ପରିବେଶକୁ ଆହୁରି ସମୃଦ୍ଧ କରିବା ଉପରେ ଆଲୋକପାତ କରିଥିଲେ। ପ୍ରଧାନ ଶିକ୍ଷକ ସୁଶୀଲ କୁମାର ରଣା ମଞ୍ଚ କାର୍ଯ୍ୟକୁ ସୁନ୍ଦର ଭାବେ ସଂଚାଳନ କରିବା ସହ ସମସ୍ତଙ୍କ ସହଯୋଗ ପାଇଁ କୃତଜ୍ଞତା ଜଣାଇଥିଲେ।
କାର୍ଯ୍ୟକ୍ରମ ପରିଚାଳନାରେ ସହକାରୀ ଶିକ୍ଷୟିତ୍ରୀ ପଦ୍ମାବତୀ ବେହେରା, ଶିକ୍ଷକ ଦିଲ୍ଲୀପ କୁମାର ସାହୁ, ଅଙ୍ଗନବାଡ଼ି କର୍ମୀ ପୁଷ୍ପମଞ୍ଜରୀ ଦେଇ, କାନନବାଳା ସାହୁ, ପରିଚାଳନା କମିଟି ସଦସ୍ୟା ଶକୁନ୍ତଳା ଇନ୍ଦ୍ରଜିତ, ରାଜଲକ୍ଷ୍ମୀ ରଣସିଂହଙ୍କ ସମେତ ବିଦ୍ୟାଳୟର ସମସ୍ତ ପାଚିକା ସହଯୋଗ କରିଥିଲେ।
ଶିକ୍ଷକଙ୍କ ସେବାକୁ ସମ୍ମାନ ଓ ଛାତ୍ରୀଙ୍କ ସଫଳତାକୁ ପ୍ରୋତ୍ସାହନ ଏହି ଦୁଇଟି ଉଦ୍ଦେଶ୍ୟକୁ ନେଇ ଆୟୋଜିତ ସମାରୋହଟି ବିଦ୍ୟାଳୟରେ ଏକ ସ୍ମରଣୀୟ ଅଧ୍ୟାୟ ସୃଷ୍ଟି କରିଥିଲା।
