ପୁରୀ (ଭିଓଭି): ଶ୍ରୀମନ୍ଦିର ପରିକ୍ରମା ପ୍ରକଳ୍ପର ପିଛା ଛାଡୁନି ଅବ୍ୟବସ୍ଥା । ପ୍ରକଳ୍ପ ଉଦ୍ଘାଟନର ମାତ୍ର କେତୋଟି ଦିନ ନ ଯାଉଣୁ ପରିଚାଳନା ସମ୍ବନ୍ଧୀୟ ଅନେକ ଅବ୍ୟବସ୍ଥା ଦେଖିବାକୁ ମିଳୁଛି । କେତେବେଳେ କୁଢ଼ କୁଢ଼ ଅଳିଆ ଗଦା ହୋଇ ପୁତିଗନ୍ଧମୟ ପରିବେଶ ସୃଷ୍ଟି କରୁଛି ତ, ଆଉ କେତେବେଳେ ଶୌଚାଳୟ ରେ ପାଣି ନଥିବାରୁ ନାହିଁ ନଥିବା ଅସୁବିଧା ର ସମ୍ମୁଖୀନ ହେଉଛନ୍ତି ଶ୍ରଦ୍ଧାଳୁ । ଶୌ ଚାଳୟ ବ୍ୟବହାର ପରିବର୍ତେ ବାହାରେ ପରିଶ୍ରା କରୁଛନ୍ତି । ପ୍ରକଳ୍ପ ଉଦ୍ଘାଟନକୁ ମାତ୍ର ୨ ମାସ ନ ପୂରୁଣୁ, ଉଦ୍ଘାଟନ ବେଳେ ଝଲମଲ ସାର୍ଫି ଆଲୋକରେ ଝଲସୁଥିବା ପରିକ୍ରମା ମାର୍ଗରେ ଏବେ ସଂଞ ନଇଁଲେ ଅନ୍ଧାର ହୋଇ ଯାଉଛି । ଫଳରେ ସନ୍ଧ୍ୟା ସମୟରେ ପରିକ୍ରମା ମାର୍ଗରେ ବୁଲିବାର ସୁଖଦ ଅନୁଭୂତି ସାଉଁଟି ପାରୁ ନାହାନ୍ତି ଶ୍ରଦ୍ଧାଳୁ । ଅନ୍ଧାରରେ ବସି ଭଜନ କୀର୍ତନ କରିବାକୁ ଆଗ୍ରହ ଆସୁନି ମନରେ । ଏଥିପାଇଁ ନିଘା ନାହିଁ ଶ୍ରୀମନ୍ଦିର ପ୍ରଶାସନର କି ରକ୍ଷଣା ବେକ୍ଷଣ ଦାୟିତ୍ୱରେ ଥିବା କର୍ମଚାରୀ ମାନଙ୍କର । ମାର୍ଗରେ ଲାଗିଥିବା ୪୪ଟି ଶାର୍ଫି ଲାଇଟ୍ ମଧ୍ୟରୁ ଏବେ ମାତ୍ର ୨୩ଟି ଲାଇଟ୍ ଜଳୁଥିବା ବେଳେ ୨୧ ଟି ଲାଇଟ୍ ସଂପୂର୍ଣ୍ଣ ଅଚଳ ହୋଇ ପଡିଛି । ରାଧାବଲ୍ଲଭ ମଠ ନିକଟରେ ୮ଟି, ପଞ୍ଜାବୀ ମଠ ନିକଟରେ ୪ଟି, ଗାଣ୍ଡୁଆ ଚଉରା ଛକରେ ୪ଟି, ପଶ୍ଚିମଦ୍ୱାର ସମ୍ମୁଖରେ ୪ଟି ଓ ବଡ଼ଆଖଡ଼ା ମଠ ନିକଟରେ ଗୋଟିଏ ଲାଇଟ୍ ଅକାମୀ ହୋଇ ପଡ଼ିଛି । ଫଳରେ ଶ୍ରଦ୍ଧାଳୁ ଏବଂ ପର୍ଯ୍ୟଟକ ମହଲରେ ଅସନ୍ତୋଷ ଦେଖା ଦେଇଛି । ଏହାକୁ ହୃଦୟଙ୍ଗମ କରି ଶ୍ରଦ୍ଧାଳୁ ଓ ପର୍ଯ୍ୟଟକଙ୍କ ନିମନ୍ତେ ତୁରନ୍ତ ଅଚଳ ହୋଇପଡିଥିବା ସାର୍ଫି ଲାଇଟ୍ ଗୁଡିକୁ ତୁରନ୍ତ ମରାମତି କରିବାକୁ ଦାବି ଜଣାଇ ଶନିବାର ଦିନ ଆସୋସିଏସନ ଅଫ୍ ଟ୍ୱିଟର ଆକ୍ଟିଭିଷ୍ଟ (ଆଟା) ସଦସ୍ୟ ବିସ୍ମୟ ମିଶ୍ରଙ୍କ ନେତୃତ୍ୱରେ ଆସୋସିଏସନର ଏକ ଟିମ୍ ଶ୍ରୀମନ୍ଦିର କାର୍ଯ୍ୟାଳୟରେ ପହଞ୍ଚି ଉପମୁଖ୍ୟ ପ୍ରଶାସକ ସମର୍ଥ ବର୍ମାଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି ।
ଅବ୍ୟବସ୍ଥା ମଧ୍ୟରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ
