ଭୁବନେଶ୍ୱର : ରାଜ୍ୟରେ ଆଳୁ ଦର ହ୍ରାସ ପାଉନାହିଁ । ଏବେ ବି ସେହି ୪୦ଟଙ୍କା ରହିଛି । ତେବେ କିଛି ଦୋକାନୀ ୪୫ ଟଙ୍କା ମଧ୍ୟ ନେଉଥିବା ଜଣାପଡିଛି । ଗରୀବ, ଖଟିଖିଆଙ୍କ ଉପରେ ବୋଝ ଉପରେ ଲଳିତା ବିଡା ସଦୃସ ସମସ୍ୟା ସୃଷ୍ଟି ହୋଇଛି । ବର୍ତ୍ତମାନର ମହଙ୍ଗା ମାଡ଼ରେ ସାଧାରଣ ଲୋକ ମଧ୍ୟ ଅସୁବିଧାର ସମ୍ମୁଖୀନ ହେଉଛନ୍ତି । ଏପରି ସମସ୍ୟା ଖୁବଶୀଘ୍ର ସମାଧାନ ହେବ ବୋଲି ପୂର୍ବରୁ ଯେଉଁ ବିଶ୍ୱାସ ରହିଥିଲା ତାହା ଆଉ ନାହିଁ । କାରଣ ପଶ୍ଚିମ ବଙ୍ଗ ଓଡ଼ିଶାକୁ ଆଳ ଦେବାକୁ ରାଜି ହେଉନଥିବା ବେଳେ ପୂର୍ବରୂ ଟ୍ରକ ପିଛା ୨୦ହଜାର ନେଉଥିବା ବେଳେ ଏବେ ୫୦ହଜାର ଦାବି କରୁଛି । ଏହି ନିୟମର କୌଣସି ଲିଖିତ ତଥ୍ୟ ନଥିବା ବେଳେ ପଶ୍ଚିମବଙ୍ଗର କିଛି ବରିଷ୍ଟ ଅଧିକାରୀ ମନମ୍ମୁଖୀ ଭାବେ ଚଢ଼ା ଦର ଧାର୍ଯ୍ୟ କରି ଓଡ଼ିଶାକୁ ଆଳୁ ନପଠାଇବାକୁ ବ୍ୟବସ୍ଥା କରିଥିବା ଓଡ଼ିଶା ବ୍ୟବସାୟୀ ମହାସଂଘର ମହାସଚିବ ସୁଧାକର ପଣ୍ଡା କହିଛନ୍ତି । ସେ କହିଲେ ଯେ ପଶ୍ଚିମ ବଙ୍ଗରୁ ଆଳୁ ନଆସିବା ଦ୍ୱାରା ଏବେ ଉତ୍ତରପ୍ରଦେଶରୁ ଆଳୁ ରାଜ୍ୟକୁ ଆସିଲାଣି । ପ୍ରାୟ ୮୦-୯୦ଟି ଟ୍ରକରେ ୩୦ଟନ୍ ଆଳୁ ଆସି ପହଞ୍ôଚଛି । ହେଲେ ସେହି ଆଳୁର ଆକାର ପଶ୍ଚିମବଙ୍ଗର ଆଳୁ ଠାରୁ ବହୁତ ବଡ । ଫଳରେ ଅନେକ ଗ୍ରାହକ ଏହି ଆଳୁ କିଣିବାକୁ ପସନ୍ଦ କରୁନାହାଁନ୍ତି । ଅପରପକ୍ଷରେ ଏପରି ସମସ୍ୟା ଲାଗି ରାଜ୍ୟ ସରକାର ଦାୟୀ ବୋଲି ମଧ୍ୟ ସେ କହିଛନ୍ତି । କାରଣ ଦେଶର ସମ୍ବିଧାନ ଅନୁସାରେ କୌଣସି ଅତ୍ୟାବଶ୍ୟକ ସାମଗ୍ରୀକୁ କୌଣସି ରାଜ୍ୟ ଅନ୍ୟ ରାଜ୍ୟକୁ ଦେବାରେ ବନ୍ଦ କରିପାରିବ ନାହିଁ । ଯଦି ବନ୍ଦ କରେ ତେବେ ତୁୁରନ୍ତ କେନ୍ଦ୍ର ସରକାର ଏଥିରେ ହସ୍ତକ୍ଷେପ କରି ସମସ୍ୟାର ସମାଧାନ ଲାଗି ଉଦ୍ୟମ କରିବା ଉଚିତ୍ । ଦୀର୍ଘଦିନ ହେବ ରାଜ୍ୟରେ ଆଳୁ ସଙ୍କଟ ରହିଥିବା ବେଳେ ରାଜ୍ୟ ସରକାର ଏସମ୍ପର୍କରେ କେନ୍ଦ୍ର ସହ ଆଲୋଚନା କରିନାହାନ୍ତି । ଫଳରେ ରାଜ୍ୟରେ ଲୋକେଆଳୁ ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି । ବର୍ତ୍ତମାନ ପାଇକାରୀ ମୁଲ୍ୟ ଅନୁସାରେ ଆଳୁ କୁଇଣ୍ଟାଲ ପିଛା ୨୩ଶହରୁ ୨୪ଶହ ମଧ୍ୟରେ ରହିଛି । ହେଲେ ଅନେକ ବେପାରୀ କିଲୋ ପିଛା ୪୦ଟଙ୍କାରେ ଆଳୁ ବିକ୍ରି କରୁଛନ୍ତି । ସେଥିପ୍ରତି ମଧ୍ୟ ସରକାର ନଜର ଦେବା ଉଚିତ ବୋଲି ସେ କହିଛନ୍ତି । ସେହପିରି କୁବେରପୁରୀ ବ୍ୟବସାୟୀ ସଂଘର ସମ୍ପାଦକ ଶକ୍ତି ଶଙ୍କର ମିଶ୍ର କହିଛନ୍ତି ଯେ ଓଡ଼ିଶାରେ ବର୍ଷକୁ ୧୪ /୧୫ଲକ୍ଷ ଟନ୍ ଆଳୁର ଆବଶ୍ୟକତା ରହିଥାଏ । କେବଳ ଭୁବନେଶ୍ୱରରେ ୫୦୦ଟନ୍ ଆଳୁର ଆବଶ୍ୟକତା ରହିଛି । ତେବେ ଆଜି ୫ଟି ଟ୍ରକରେ ୧୬ଟନ୍ ଆଳୁ ଆସିଛି । ଏକ ନମ୍ବର ହାଟରେ ଆଳୁ କେଜି ପ୍ରତି ୩୫ ଟଙ୍କାରେ ବିକ୍ରି କରାଯାଉଛି । ରାଜ୍ୟର ବିଭିନ୍ନ ସ୍ଥାନରେ ଆଳୁ କେଜି ପ୍ରତି ଭିନ୍ନ ଦାମ ରହିଛି । ରାଜ୍ୟରେ ଉତ୍ପାଦନ ହେଉଛି ୭୦ରୁ ୮୦ ହଜାର ଟନ । ତେଣୁ ସର୍ବାଧିକ ପଶ୍ଚିମବଙ୍ଗ, ଉତ୍ତର ପ୍ରଦେଶ ଓ ପଞ୍ଜାବରୁ ଆଳୁ ରାଜ୍ୟକୁ ଆସୁଛି ।
