ନୂଆଦିଲ୍ଲୀ: ରାଷ୍ଟ୍ରିୟ ସ୍ଵୟମସେବକ ସଂଘ (ଆରଏସଏସ) ମୁଖ୍ୟ ମୋହନ ଭାଗବତ ହିନ୍ଦୁ ସମ୍ପ୍ରଦାୟକୁ ଏକଜୁଟ ହେବା ଏବଂ ନିଜ ମଧ୍ୟରେ ମତଭେଦ ତଥା ବିବାଦର ଅନ୍ତ ଘଟାଇବାକୁ ଆହ୍ଵାନ ଦେଇଛନ୍ତି। ସେ କହିଛନ୍ତି ଯେ, “ଭାଷା, ଜାତି ଏବଂ ଅଞ୍ଚଳ ଉପରେ ଆଧାରିତ ମତଭେଦ ତଥା ବିବାଦ ଦୂର କରି ହିନ୍ଦୁ ସମାଜକୁ ଏହାର ସୁରକ୍ଷା ପାଇଁ ଏକଜୁଟ ହେବାକୁ ପଡିବ। ସମାଜ ଏପରି ହେବା ଉଚିତ, ଯେଉଁଥିରେ ଏକତା, ସଦଭାବନା ଏବଂ ବନ୍ଧନ ଭାବନା ରହିବ।” ସେ କହିଛନ୍ତି ଯେ, ସମାଜରେ ଆଚରଣ ବିଧି, ରାଜ୍ୟ ପ୍ରତି କର୍ତ୍ତବ୍ୟ ଏବଂ ଲକ୍ଷ୍ୟ ଭିତ୍ତିକ ଗୁଣ ଆବଶ୍ୟକ। ସେ କହିଛନ୍ତି, ସମାଜ କେବଳ ମୋ ଏବଂ ମୋ ପରିବାରକୁ ନେଇ ଗଠିତ ନୁହେଁ, ବରଂ ସମାଜ ପାଇଁ ସାମଗ୍ରିକ ଚିନ୍ତା ମାଧ୍ୟମରେ ଆମ ଜୀବନରେ ଇଶ୍ବରଙ୍କୁ ହାସଲ କରିବାକୁ ପଡିବ। ଆରଏସଏସ ମୁଖ୍ୟ ମୋହନ ଭଗବତ କହିଛନ୍ତି ଯେ, ସଂଗଠନର କାର୍ଯ୍ୟ ଯାନ୍ତ୍ରିକ ନୁହେଁ ବରଂ ବିଚାର ଆଧାରିତ। ଦୁନିଆରେ ଏପରି କୌଣସି କାର୍ଯ୍ୟ ନାହିଁ ଯାହାକୁ ସଂଘର କାର୍ଯ୍ୟ ସହିତ ତୁଳନା କରାଯାଇପାରିବ।
‘ଭାରତ ଏକ ହିନ୍ଦୁ ରାଷ୍ଟ୍ର’:
ମୋହନ ଭାଗବତ କହିଛନ୍ତି ଯେ, ଦେଶର ଶକ୍ତି ଯୋଗୁଁ ବିଶ୍ୱରେ ଭାରତର ପ୍ରତିଷ୍ଠା। “ଭାରତ ହେଉଛି ଏକ ହିନ୍ଦୁ ରାଷ୍ଟ୍ର। ପ୍ରାଚୀନ କାଳରୁ ଆମେ ଏଠାରେ ବାସ କରିଆସୁଛୁ, ଯଦିଓ ହିନ୍ଦୁ ନାମ ପରେ ଆସିଥିଲା। ହିନ୍ଦୁ ଶବ୍ଦ ଏଠାରେ ବାସ କରୁଥିବା ଭାରତର ସମସ୍ତ ସମ୍ପ୍ରଦାୟ ପାଇଁ ବ୍ୟବହୃତ ହୋଇଥିଲା। ହିନ୍ଦୁମାନେ ସମସ୍ତଙ୍କୁ ନିଜର ବୋଲି ଭାବନ୍ତି ଏବଂ ସମସ୍ତଙ୍କୁ ଗ୍ରହଣ କରନ୍ତି।
ସେ କହିଛନ୍ତି, “ସମାଜରେ ପ୍ରଚଳିତ ତ୍ରୁଟିଗୁଡିକୁ ଦୂର କରିବା ଏବଂ ସମାଜକୁ ମଜବୁତ କରିବା ପାଇଁ ଉଦ୍ୟମ କରାଯିବା ଉଚିତ୍। ସମାଜରେ ସାମାଜିକ ସମନ୍ୱୟ, ସାମାଜିକ ନ୍ୟାୟ, ସାମାଜିକ ସ୍ୱାସ୍ଥ୍ୟ, ଶିକ୍ଷା, ସ୍ୱାସ୍ଥ୍ୟ ଏବଂ ଆତ୍ମନିର୍ଭରଶୀଳ ହେବା ପାଇଁ ଆହ୍ୱାନ ଦେବା ଉଚିତ୍।”
