ରଣପୁର: ନୟାଗଡ ଜିଲ୍ଲା,ରଣପୁର ବ୍ଲକରେ ହାତୀ ଆକ୍ରମଣର ଶିକାର ହୋଇ ଜଣେ ବୃଦ୍ଧାଙ୍କ ମୃତ୍ୟୁ ହୋଇଯାଇଛି। ପ୍ରାପ୍ତ ସୂଚନାନୁଯାୟୀ ଓସ୍ତପଡ଼ା ଗ୍ରାମର ବଳଭଦ୍ର ଜେନାଙ୍କ ପତ୍ନୀ ପାଗଳୀ ଜେନା ରାତି ୩.୧୫ ସମୟରେ ସ୍ନାନ ଓ ଶୌଚ କର୍ମ ପାଇଁ ଘର ବାହାରକୁ ଉଠିଥିବା ସମୟରେ ବାହାରେ ଥିବା ଏକ ବିଶାଳକାୟ ଦନ୍ତାହାତୀ ତାଙ୍କୁ ଶୁଣ୍ଢରେ ଭିଡ଼ି ନେଇ ଆକ୍ରମଣ କରିବା ସହିତ ପାଦରେ ଦଳି ଅନ୍ତ ବୁଜୁଳା ବାହାର କରିଦେଇଥିଲା। ସାଥିରେ ଥିବା ତାଙ୍କ ନାତୁଣୀ ଦୌଡି ପଳାଇ ଯିବାରୁ ଅଳ୍ପକେ ବର୍ତ୍ତିଯାଇଥିଲେ।
ନାତୁଣୀର ଚିତ୍କାର ଶୁଣି ଲୋକେ ଉଠିବା ବେଳକୁ ହାତୀ ଆକ୍ରମଣ କରି ନିକଟସ୍ତ ଜଙ୍ଗଲକୁ ପଳାଇ ଯାଇଥିଲା। ସୂଚନାଯୋଗ୍ୟ ଯେ ଗତ ୪ଦିନ ତଳେ ନିକଟସ୍ଥ ହରିପୁର ଗାଁରେ ଏହିଭଳି ଭାବରେ ହାତୀ ଆକ୍ରମଣରେ ଜଣଙ୍କର ମୃତ୍ୟୁ ହୋଇଥିଲା। ମୃତକ ପାଗଳୀ ଜେନାଙ୍କ ବୟସ ପ୍ରାୟ ୬୫ ବର୍ଷ ହେବ। ବାରମ୍ବାର ଏହିଭଳି ଭାବରେ ହାତୀ ଗାଁରେ ପଶି ଆକ୍ରମଣ କରି ମଣିଷ ମାରୁଥିବାକୁ ନେଇ ଅଞ୍ଚଳ ବାସୀ ପ୍ରଶାସନ ଓ ସ୍ଥାନୀୟ ବନବିଭାଗକୁ ଦୋଷାରୋପ କରୁଛନ୍ତି। ପ୍ରଶାସନ ତୁରନ୍ତ ପଦକ୍ଷେପ ନେବା ପାଇଁ ବୁଦ୍ଧିଜୀବୀ ମାନେ ମତ ପ୍ରକାଶ କରିଛନ୍ତି।
