ଗୁରୁପୂର୍ଣ୍ଣିମାରେ ଗୁରୁପୂଜନ

ସତ୍ୟବାଦୀ (ଭିଓଭି): ମହର୍ଷି ବ୍ୟାସଦେବଙ୍କ ପୂଣ୍ୟ ଜନ୍ମତିଥି ପବିତ୍ର ଗୁରୁପୂର୍ଣ୍ଣିମା ଅବସରରେ ଲୋକକଳାଗ୍ରାମ ସାରଙ୍ଗଯୋଡିର ମା’ କ୍ଷେତ୍ରପାଳୀ ମୃଦଙ୍ଗ ବାଦ୍ୟନୃତ୍ୟ ପରିଷଦ ଆୟୋଜନରେ ବାଇଁଶିବାଡିର ପ୍ରଖ୍ୟାତ ସଂକୀର୍ତ୍ତନ, ପାଲା ଓ ଲୋକନୃତ୍ୟ ଗୁରୁ କୁଳମଣି ବିଶ୍ଵାଳଙ୍କ ଗୁରୁପୂଜନ କାର୍ଯ୍ୟକ୍ରମ ଗ୍ରାମ ଭାଗବତ ଗାଦିଘର ଠାରେ ଅନୁଷ୍ଠିତ ହୋଇଯାଇଛି।ଶ୍ରୀ ବିଶ୍ଵାଳଙ୍କ ପାଖରୁ ଶିକ୍ଷା ଗ୍ରହଣ କରି କଳାଜଗତରେ ପ୍ରତିଷ୍ଠିତ ଶତାଧିକ ଶିଷ୍ୟ ଆଜି ପୂର୍ବାହ୍ନରେ ତାଙ୍କ ଗ୍ରାମର ଗାଦିଘରେ ସମବେତ ହୋଇ ଗୁରୁଙ୍କୁ ପାରମ୍ପରିକ ରୀତିରେ ପୂଜା କରିଥିଲେ। ଆଶୀର୍ବଚନ ପ୍ରଦାନ କରି ଗୁରୁ ଶ୍ରୀ ବିଶ୍ଵାଳ ସମସ୍ତଙ୍କର ମଙ୍ଗଳମୟ ଭବିଷ୍ୟତ କାମନା କରିଥିଲେ। ଶିଷ୍ୟ ସର୍ବଶ୍ରୀ ଭାସ୍କର ସ୍ଵାଇଁ,ଜୟନ୍ତ ବିଶ୍ଵାଳ, ସୁଦର୍ଶନ ପରିଡ଼ା, ଅଭିମନ୍ୟୁ ନାୟକ, ଦୁର୍ଯ୍ୟୋଧନ ପରିଡ଼ା, ବିଜୟ ନାୟକ, ପୂର୍ଣ୍ଣଚନ୍ଦ୍ର ପ୍ରଧାନ,ଶିବ ପ୍ରସାଦ ସ୍ଵାଇଁ ଓ ରମେଶ ଚନ୍ଦ୍ର ଦାସଙ୍କ ସମେତ ସମସ୍ତ ଶିଷ୍ୟ ଗୁରୁପୂଜନ କାର୍ଯ୍ୟକ୍ରମରେ ଅଂଶ ଗ୍ରହଣ କରିଥିଲେ। ଆୟୋଜକ ଅନୁଷ୍ଠାନର ସଂପାଦକ ରମେଶ ଚନ୍ଦ୍ର ପଲେଇ ଓ ସଦସ୍ୟ ରବୀନ୍ଦ୍ର କୁମାର ସାହୁ କାର୍ଯ୍ୟକ୍ରମ ପରିଚାଳନା କରିଥିଲେ।