ଭୁବନେଶ୍ୱର: ରାଜ୍ୟରେ ସ୍କୁଲ ଶିକ୍ଷା ବ୍ୟବସ୍ଥାର ନବୀକରଣ କରାଯିବ। ବଦଳିବ ‘ମୋ ସ୍କୁଲ ଅଭିଯାନ’ ନାଁ। ଖୁବ୍ଶୀଘ୍ର ରାଜ୍ୟରେ କାର୍ୟ୍ୟକାରୀ ହେବ ‘ପଞ୍ଚସଖା ଶିକ୍ଷା ସେତୁ ଯୋଜନା’। ଏ ନେଇ ରାଜ୍ୟ ସରକାରଙ୍କ ସ୍କୁଲ ଓ ଗଣଶିକ୍ଷା ବିଭାଗ ପକ୍ଷରୁ ଶୁକ୍ରବାର ବିଜ୍ଞପ୍ତି ପ୍ରକାଶ ପାଇଛି। ଉକ୍ତ ବିଜ୍ଞପ୍ତିରେ ଉଲ୍ଲେଖ କରାଯାଇଛି ଯେ, ସାଂସ୍କୃତିକ, ସାମାଜିକ ଓ ଅର୍ଥନୈତିକ ବିବିଧତାରେ ପରିପୂର୍ଣ୍ଣ ଓଡ଼ିଶା ପାଇଁ ରହିଥିବା ବିଭିନ୍ନ ଆହ୍ବାନର ମୁକାବିଲା ଲାଗି ଏକ ମଜଭୁତ ତଥା ଉଦ୍ୟୋଗୀ ଶିକ୍ଷା ବ୍ୟବସ୍ଥାର ଆବଶ୍ୟକତାକୁ ଦୃଷ୍ଟିରେ ରଖି ରାଜ୍ୟ ସରକାର ଶିକ୍ଷା କ୍ଷେତ୍ରରେ ନବୀକରଣର ପରିକଳ୍ପନା କରିଛନ୍ତି। ଏହି ଯୋଜନା ଅଧୀନରେ ସ୍କୁଲ ନିର୍ମାଣ, ଶିକ୍ଷାର ମାନ ବୃଦ୍ଧି ଏବଂ ସାମାଜିକ ଯୋଗଦାନ ବୃଦ୍ଧି ଲକ୍ଷ୍ୟ ରଖାଯାଇଛି। ଏହି ବିଶାଳ ଅଭିଯାନରେ ପୂର୍ବତନ ଛାତ୍ର, ପୂର୍ବତନ ଛାତ୍ର ସଂଘ, ଶିକ୍ଷାନୁଷ୍ଠାନ, ସାମାଜିକ ସଂସ୍ଥା, କମ୍ପାନୀ, ସଂଗଠନ, ସିଆର୍ଏସ୍ କର୍ମୀ, ସାମାଜିକ କର୍ମୀ ଓ ଅନ୍ୟମାନଙ୍କୁ ସାମିଲ କରାଯିବ। ରାଜ୍ୟରେ ଶିକ୍ଷାର ବିକାଶ ଲାଗି ପାଣ୍ଠି, ସାମଗ୍ରୀ ଏବଂ ସେବା ପ୍ରଦାନ ନେଇ ଏମାନଙ୍କୁ ଏକ ମଞ୍ଚ ପ୍ରଦାନ କରାଯିବ। ଭବିଷ୍ୟତ ପିଢିକୁ ସୃଜନଶୀଳ ଉଦ୍ଭାବନକାରୀ, ଗବେଷଣାକାରୀ, ଉଦ୍ୟୋଗୀ କରି ଗଢି ତୋଳିବାର ଲକ୍ଷ୍ୟ ନେଇ ଏହି ଯୋଜନା କାର୍ୟ୍ୟକାରୀ ହେବ। ଏଥିଲାଗି ମୋ ସ୍କୁଲ ଅଭିଯାନ ପରିଚାଳନା ସଂଗଠନ (ଏମ୍ଏସ୍ଏପିଏସ୍)କୁ ପଞ୍ଚସଖା ଶିକ୍ଷା ସେତୁ (ପିଏସ୍ଏସ୍) ଭାବେ ପୁନଃନାମିତ କରାଯିବ। ପିଏସ୍ଏସ୍ ନୂତନ ଶିକ୍ଷା ଯୋଜନାର କାର୍ୟ୍ୟକାରୀ ସଂସ୍ଥା ଭାବେ କାମ କରିବ। ରାଜ୍ୟ ମୁଖ୍ୟ ଶାସନ ସଚିବ ଏହାର ମୁଖ୍ୟ ରହିବେ। ଜିଲା ତଥା ରାଜ୍ୟସ୍ତରରେ ଯୋଜନାର କାଯର୍ର୍ୟକାରିତା ନେଇ ଯଥାକ୍ରମେ ଜିଲାପାଳଙ୍କ ଅଧ୍ୟକ୍ଷତାରେ ଜିଲାସ୍ତରୀୟ କମିଟି ଏବଂ ସ୍କୁଲ ଓ ଗଣଶିକ୍ଷା ବିଭାଗ ସଚିବଙ୍କ ଅଧ୍ୟକ୍ଷତାରେ ରାଜ୍ୟ ସ୍ତରୀୟ କମିଟି ଗଠନ କରାଯିବ। ଏହି ଯୋଜନା ପାଇଁ ରାଜ୍ୟ ସରକାର ପାଣ୍ଠି ପ୍ରଦାନ କରିବେ। ଏଥିସହିତ ହଷ୍ଟେଲ, ଲ୍ୟାବ, ଲାଇବ୍ରେରି, ଇଣ୍ଟରନେଟ, ଶ୍ରେଣୀଗୃହ, ଆସବାବପତ୍ର, ଶୌଚାଳୟ ପ୍ରଭୃତି ନିର୍ମାଣ ସହିତ ଭିତ୍ତିଭୂମିର ବିକାଶ ଭଳି ବିଭିନ୍ନ କାମ ପାଇଁ ଭିନ୍ନଭିନ୍ନ ସୂତ୍ରରୁ ଦାନ ଆକାରରରେ ମଧ୍ୟ ପାଣ୍ଠି ମଧ୍ୟ ଗ୍ରହଣ କରାଯିବ। ଯୋଜନାର ସଫଳ ରୂପାୟନ ପାଇଁ ବିଭିନ୍ନ ଅଧିକାରୀ ତଥା କର୍ମଚାରୀ ନିଯୁକ୍ତ ହେବେ। ଯୋଜନା ସମ୍ବନ୍ଧୀୟ ସମସ୍ତ ଦୈନନ୍ଦିନ ବ୍ୟାପାର ପରିଚାଳନା ନିମନ୍ତେ ଏକ କାର୍ୟ୍ୟନିର୍ବାହୀ ସଂଗଠନ ରହିବ। ଏହାକୁ ସହଯୋଗ କରିବା ଲାଗି ଏକ ଗଭର୍ଣ୍ଣିଂବଡି ଏବଂ ଏକ ପରାମର୍ଶଦାତା ବୋର୍ଡ ରହିବ। କଳା, ସଂସ୍କୃତି, ଡିଜାଇନ, ଆଡ୍ଭର୍ଟାଇଜିଂ, ଫିଲ୍ମ ନିର୍ମାତା, ସାହିତି୍ୟକ, ବିଜ୍ଞାନ ଓ କ୍ରୀଡା କ୍ଷେତ୍ରର ବିଚାରବନ୍ତ ନେତା, ବିଶିଷ୍ଟ ଶିକ୍ଷାବିତ୍, ବୈଜ୍ଞାନିକ ଏବଂ ପ୍ରତିଷ୍ଠିତ ବ୍ୟକ୍ତିମାନେ ଏଥିରେ ସଦସ୍ୟ ରହିବେ ବୋଲି ସୂଚନା ଦିଆଯାଇଛି।
ବଦଳିବ ‘ମୋ ସ୍କୁଲ ଅଭିଯାନ’ ନାଁ
