ଭୁବନେଶ୍ବର: ଓଡ଼ିଶା କ୍ରିକେଟ୍ ଆସୋସିଏସନ୍(ଓସିଏ) ସଭାପତି ଦାୟିତ୍ୱ ଗ୍ରହଣ କରିଛନ୍ତି ପଙ୍କଜ ଲୋଚନ ମହାନ୍ତି। ଆଜି ଓସିଏର ସ୍ୱତନ୍ତ୍ର ସାଧାରଣ ପରିଷଦ ବୈଠକ ଅବସରରେ ନିର୍ବାଚନ ଅଧିକାରୀ ଏମ.ଏଲ ମଜୁମଦାର ଶ୍ରୀ ମହାନ୍ତିଙ୍କୁ ନିଦ୍ୱର୍ନ୍ଦ୍ୱରେ ସଭାପତି ଭାବେ ନିର୍ବାଚିତ ବୋଲି ଘୋଷଣା କରିଥିଲେ। ସମ୍ପାଦକ ସଞ୍ଜୟ ବେହେରା, ଯୁଗ୍ମ ସମ୍ପାଦକ ପ୍ରଭାତ ଭୋଳ, କୋଷାଧ୍ୟକ୍ଷ ବିକାଶ ପ୍ରଧାନଙ୍କ ସମେତ ଓସିଏର ଅନ୍ୟ ପଦାଧିକାରୀ ଉପସ୍ଥିତ ଥିଲେ। ସୂଚନାଯୋଗ୍ୟ ଗତ ଡିସେମ୍ବର୨୯ରେ ପ୍ରଣବ ପ୍ରକାଶ ଦାସ ବ୍ୟକ୍ତିଗତ କାରଣ ଦର୍ଶାଇ ସଭାପତି ପଦରୁ ଇସ୍ତଫାପତ୍ର ପ୍ରଦାନ କରିଥିଲେ। ଉପସଭାପତି ଭାବେ ନିର୍ବାଚିତ ହୋଇଥିବା ପଙ୍କଜ ଲୋଚନଙ୍କୁ କାର୍ଯ୍ୟକାରୀ ସଭାପତି ଦାୟିତ୍ୱ ପ୍ରଦାନ କରାଯାଇଥିଲା। ଗତ ୧୩ ତାରିଖରୁ ଓସିଏର ସଭାପତି ପଦ ନିମନ୍ତେ ନିର୍ବାଚନୀ ପ୍ରକ୍ରିୟା ଆରମ୍ଭ ହୋଇଥିଲା। ପଙ୍କଜଙ୍କ ବ୍ୟତୀତ ଅନ୍ୟ କେହି ପ୍ରାର୍ôଥପତ୍ର ଦାଖଲ କରିନଥିଲେ। ଫଳରେ ସେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି। ପଙ୍କଜ ସଭାପତି ହେବା ସହିତ ଓସିଏର ଉପସଭାପତି ପଦ ଏବେ ଫାଙ୍କା ହୋଇଛି। ପ୍ରଶାସନିକ ଦୃଢ଼ତା ସହ ଓଡ଼ିଶା କ୍ରିକେଟ୍କୁ ଏକ ନୂତନ ଉଚ୍ଚତାରେ ପହଞ୍ଚାଇବା ବୋଲି ଶ୍ରୀ ମହାନ୍ତି ଏହି ଅବସରରେ ମତବ୍ୟକ୍ତ କରିଛନ୍ତି। ଓସିଏର ଉପସଭାପତି ଭାବେ ଶ୍ରୀ ମହାନ୍ତି ୨୦୨୨ ଅକ୍ଟୋବର ୨୮ ତାରିଖ ଓସିଏ ଆପେକ୍ସ କାଉନସିଲ୍ର ବାର୍ଷିକ ସାଧାରଣ ଅଧିବେଶନରେ ନିର୍ବାଚିତ ହୋଇଥିଲେ। ସେବେଠାରୁ ଉପସଭାପତି ଭାବେ ସେ କାର୍ଯ୍ୟଭାର ତୁଲାଇ ଆସୁଥିଲେ।
ପଙ୍କଜ ଲୋଚନ ଓସିଏର ନୂଆ ସଭାପତି
