ଖୋର୍ଦ୍ଧା ସହର: ଓଡ଼ିଶା ସୂଚନା ଅଧିକାର ଅଭିଯାନ (ଓସା) ପକ୍ଷରୁ ଆୟୋଜିତ ଦୁର୍ନୀତି ବିରୋଧୀ ସଚେତନତା ଅଭିଯାନକୁ ଆଜି ଖୋର୍ଦ୍ଧା ସହରରେ ସାଧାରଣ ଲୋକଙ୍କ ପକ୍ଷରୁ ବ୍ୟାପକ ସମର୍ଥନ ମିଳିଛି । ଦୁର୍ନୀତି ବିରୋଧରେ ଜନସଚେତନତା, ସରକାରୀ ବ୍ୟବସ୍ଥାରେ ପାରଦର୍ଶିତା, ଜବାବଦେହିତା ଓ ଲୋକଙ୍କ ସୂଚନା ଅଧିକାରକୁ ସୁଦୃଢ଼ କରିବା ଉଦ୍ଦେଶ୍ୟରେ ଏହି ଅଭିଯାନ ଆୟୋଜିତ ହୋଇଛି ଓସା ପକ୍ଷରୁ ୦୫ ଅକ୍ଟୋବରରୁ ୦୯ ଅକ୍ଟୋବର ୨୦୨୬ ପର୍ଯ୍ୟନ୍ତ ରାଜ୍ୟର ବିଭିନ୍ନ ଜିଲ୍ଲାରେ ଜିଲ୍ଲାପାଳଙ୍କ କାର୍ଯ୍ୟାଳୟ, ବ୍ଲକ ସଦର ମହକୁମା ଏବଂ ଅନ୍ୟାନ୍ୟ ପ୍ରମୁଖ ସ୍ଥାନରେ ଶାନ୍ତିପୂର୍ଣ୍ଣ ଭାବେ ଏହି ସଚେତନତା କାର୍ଯ୍ୟକ୍ରମ କରାଯାଉଛି ।
ଏହି କ୍ରମରେ ଆଜି ଓସାର କର୍ମକର୍ତ୍ତା ଓ ସଦସ୍ୟମାନେ ଖୋର୍ଦ୍ଧା ଜିଲ୍ଲାପାଳଙ୍କ କାର୍ଯ୍ୟାଳୟ ପରିସର ସମେତ କୋର୍ଟ, ମାର୍କେଟ, ବସ୍ଷ୍ଟାଣ୍ଡ ଓ ସହରର ବିଭିନ୍ନ ପ୍ରମୁଖ ସ୍ଥାନରେ ଜନସାଧାରଣଙ୍କୁ ଦୁର୍ନୀତି, ପ୍ରଶାସନିକ ଜବାବଦେହିତା ଓ ସରକାରୀ କାର୍ଯ୍ୟରେ ପାରଦର୍ଶିତା ସମ୍ପର୍କରେ ସଚେତନ କରିଥିଲେ । ଏହି ଅବସରରେ ପୂର୍ବତନ ଓ ବର୍ତ୍ତମାନ ସରକାରଙ୍କ କାର୍ଯ୍ୟକଳାପ ସମ୍ପର୍କିତ ବିଭିନ୍ନ ପ୍ରଶ୍ନ, ଅଭିଯୋଗ ଓ ସାର୍ବଜନୀନ ଆଲୋଚନାର ବିଷୟଗୁଡ଼ିକୁ ଲୋକଙ୍କ ସମ୍ମୁଖରେ ରଖାଯାଇଥିଲା । ଏଥିସହ ସଚେତନତାମୂଳକ ଲିଫଲେଟ୍ ବଣ୍ଟନ କରାଯାଇଥିଲା ।
ଅଭିଯାନ ସମୟରେ ଖୋର୍ଦ୍ଧା ସହରର ବିଭିନ୍ନ ବର୍ଗର ନାଗରିକ ଓ ସହରବାସୀଙ୍କ ସହ କର୍ମୀମାନେ ଆଲୋଚନା କରିଥିଲେ। ଦୁର୍ନୀତି ବିରୋଧରେ ଏପରି ଜନସଚେତନତାମୂଳକ ପଦକ୍ଷେପକୁ ଅନେକ ନାଗରିକ ସ୍ୱାଗତ କରିବା ସହ ସରକାରୀ ବ୍ୟବସ୍ଥାରେ ଅଧିକ ପାରଦର୍ଶିତା ଓ ଜବାବଦେହିତାର ଆବଶ୍ୟକତା ଉପରେ ମତ ପ୍ରକାଶ କରିଥିଲେ । ଏହି ଅବସରରେ ବରିଷ୍ଠ ସାମାଜିକ ତଥା ସୂଚନା ଅଧିକାର କର୍ମୀ ଶ୍ରୀ ପ୍ରକାଶ ଦାସ ବିଜେପି ସରକାରର ଅଢ଼େଇ ବର୍ଷର ଶାସନକାଳକୁ ନେଇ ବିଭିନ୍ନ ପ୍ରଶ୍ନ ଓ ଅଭିଯୋଗ ଉଠାଇଥିଲେ । ବିଶେଷକରି ପୂର୍ବତନ ବିଜେଡି ସରକାରଙ୍କ ଶାସନକାଳ ସମ୍ପର୍କରେ ଉଠିଥିବା ବିଭିନ୍ନ ଅଭିଯୋଗ ଓ ପ୍ରସଙ୍ଗ ଉପରେ ବର୍ତ୍ତମାନ ସରକାର କି ପଦକ୍ଷେପ ନେଇଛନ୍ତି, ସେ ସମ୍ପର୍କରେ ସ୍ପଷ୍ଟତା, ତଦନ୍ତ ଓ ଜବାବଦେହିତାର ଆବଶ୍ୟକତା ଉପରେ ସେ ପ୍ରଶ୍ନ ଉଠାଇଥିଲେ ।
ଶ୍ରୀ ଦାସ କହିଥିଲେ ଯେ, ଦୁର୍ନୀତି ଯେକୌଣସି ସରକାର କିମ୍ବା ରାଜନୈତିକ ଦଳ ସହ ସମ୍ପର୍କିତ ହେଉ, ତାହାର ନିରପେକ୍ଷ ତଦନ୍ତ, ତଥ୍ୟର ସାର୍ବଜନୀନ ପ୍ରକାଶ ଓ ଆଇନ ଅନୁଯାୟୀ ଜବାବଦେହିତା ନିଶ୍ଚିତ ହେବା ଆବଶ୍ୟକ । ଜନସାଧାରଣଙ୍କ ଟଙ୍କା, ସରକାରୀ ସମ୍ପଦ ଓ ପ୍ରଶାସନିକ ବ୍ୟବସ୍ଥାର ବ୍ୟବହାର ସମ୍ପର୍କରେ ଲୋକଙ୍କୁ ସତ୍ୟ ଓ ପ୍ରମାଣଭିତ୍ତିକ ସୂଚନା ମିଳିବା ଗଣତନ୍ତ୍ରରେ ଅତ୍ୟନ୍ତ ଜରୁରୀ ବୋଲି ସେ ମତ ପ୍ରକାଶ କରିଥିଲେ ।
ଓସା ପକ୍ଷରୁ କୁହାଯାଇଛି ଯେ, ଦୁର୍ନୀତି ବିରୋଧରେ ଲଢ଼େଇ କେବଳ ରାଜନୈତିକ ଦଳ ବିରୋଧୀ ଅଭିଯାନ ନୁହେଁ; ଏହା ପାରଦର୍ଶିତା, ସୁଶାସନ, ଜବାବଦେହିତା ଓ ନାଗରିକ ଅଧିକାରର ସୁରକ୍ଷା ପାଇଁ ଏକ ଜନଆନ୍ଦୋଳନ। ସୂଚନା ଅଧିକାର ଆଇନକୁ ଅସ୍ତ୍ର କରି ସରକାରୀ କାର୍ଯ୍ୟରେ ପାରଦର୍ଶିତା ଆଣିବା ଏବଂ ଜନସାଧାରଣଙ୍କୁ ନିଜ ଅଧିକାର ପ୍ରତି ସଚେତନ କରିବା ପାଇଁ ଏଭଳି ଅଭିଯାନ ଆଗାମୀ ଦିନରେ ମଧ୍ୟ ଜାରି ରହିବ । ରାଜ୍ୟବ୍ୟାପୀ ଏହି ଅଭିଯାନରେ ପ୍ରାୟ ୩୦,୦୦୦ ସଚେତନତାମୂଳକ ଲିଫଲେଟ୍ ବଣ୍ଟନ କରାଯିବା ସହିତ ବିଭିନ୍ନ ଜିଲ୍ଲା ଓ ବ୍ଲକସ୍ତରରେ ଜନସାଧାରଣଙ୍କୁ ଦୁର୍ନୀତି ବିରୋଧରେ ସ୍ୱର ଉତ୍ତୋଳନ କରିବା, ସୂଚନା ଅଧିକାରର ସଦୁପଯୋଗ କରିବା ଏବଂ ସରକାରୀ ବ୍ୟବସ୍ଥାରେ ଜବାବଦେହିତା ଦାବି କରିବା ପାଇଁ ଆହ୍ୱାନ କରାଯିବ ।
ଓସା ପକ୍ଷରୁ ସ୍ପଷ୍ଟ କରାଯାଇଛି ଯେ, ଏହି ଅଭିଯାନ ଶାନ୍ତିପୂର୍ଣ୍ଣ, ଗଣତାନ୍ତ୍ରିକ ଓ ତଥ୍ୟଭିତ୍ତିକ ଭାବରେ ଜାରି ରହିବ । ସରକାର କିମ୍ବା କୌଣସି ରାଜନୈତିକ ଦଳ ନୁହେଁ, ବରଂ ଦୁର୍ନୀତି, ଅପାରଦର୍ଶିତା ଓ ଜବାବଦେହିତାର ଅଭାବ ବିରୋଧରେ ଏହି ଲଢ଼େଇ ଆଗାମୀ ଦିନରେ ଆହୁରି ତୀବ୍ର କରାଯିବ । ଆଜିର କାର୍ଯ୍ୟକ୍ରମରେ ଶ୍ରୀ ପ୍ରକାଶ ଦାସ, ଶ୍ରୀ ସୁଧୀର ମାହାନ୍ତି, ଶ୍ରୀ ହୃଦାନନ୍ଦ କୋଦମସିଂହ, ଶ୍ରୀ ଜ୍ଞାନ ଦାସ, ଶ୍ରୀ ସୀମାଞ୍ଚଳ ଜେନା, ଶ୍ରୀ ସତ୍ୟବ୍ରତ ଜେନା, ଶ୍ରୀ ବିକାଶ ନାୟକ, ଶ୍ରୀ ପ୍ରକାଶ ସୁନ୍ଦରରାୟ ପ୍ରମୁଖଙ୍କ ସମେତ ୨୫ରୁ ଊର୍ଦ୍ଧ୍ୱ କର୍ମୀ ଓ ସଦସ୍ୟ ଯୋଗଦେଇଥିଲେ ।
