ଭୁବନେଶ୍ୱର: ରାଜ୍ୟରେ ଅଛନ୍ତି ୪୦ ଲକ୍ଷ ଭୂତ ରାସନକାର୍ଡଧାରୀ । ଶୁକ୍ରବାର ଏହି ସୂଚନା ଦେଇଛନ୍ତି ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର । ସେ କହିଛନ୍ତି ଯେ ପ୍ରତି ଜିଲ୍ଲାରେ ଲକ୍ଷେରୁ ଦେଢ଼ ଲକ୍ଷ ଭୂତ ହିତାଧିକାରୀ ଅଛନ୍ତି । ବର୍ତ୍ତମାନ ସୁଦ୍ଧା ଇ-କେୱାସି ଜାରି ରହିଛି । ମିଛ ତଥ୍ୟ ଦେଇ କେତେକ ହିତାଧିକାରୀ ରାସନକାର୍ଡ ହାତେଇ ନେଇଛନ୍ତି । ରାସନ କାର୍ଡ ନେଇ ସରକାରଙ୍କର ଯେଉଁ ଗାଇଡ଼ଲାଇନ ରହିଛି ତାହାକୁ ଦଳିମକଚି ଦିଆଯାଇଛି । ଚାରି ଚକିଆ ଯାନ ଓ ସରକାରୀ ଚାକିରୀଆ ଏବଂ ପେନସନ ଭୋଗୀ ମଧ୍ୟ ରାସନ କାର୍ଡରେ ଶସ୍ତାରେ ଚାଉଳ ଗହମ ପାଉଛନ୍ତି । ସରକାର ଏଭଳି ନକଲି ହିତାଧିକାରୀଙ୍କୁ ତାଲିକାରୁ ବାଦ ଦେବା ସହ କାର୍ୟ୍ୟାନୁଷ୍ଠାନ ନେବାକୁ ଯୋଜନା କରିଛନ୍ତି । ଅନ୍ୟପକ୍ଷରେ ସେ କହିଛନ୍ତି ଯେ ଭୂତ ରାସନକାର୍ଡଧାରୀଙ୍କ ଭଳି ଭୂତ ଚାଷୀଙ୍କୁ ମଧ୍ୟ ଧରାଯିବ । ରାଜ୍ୟରେ କେତେ ଜଣ ପ୍ରକୃତ ଚାଷୀ ଅଛନ୍ତି ତାହା ଜାଣିବାକୁ ରେଜିଷ୍ଟ୍ରେସନ ଆରମ୍ଭ ହୋଇଛି । ମିଛ ପଞ୍ଜୀକରଣ କରି ଧାନ ବିକୁଥିବା ଚାଷୀଙ୍କୁ ଧରିବା ପାଇଁ ପ୍ରକ୍ରିୟା ଆରମ୍ଭ ହୋଇଛି ବୋଲି ମନ୍ତ୍ରୀ ଶ୍ରୀ ପାତ୍ର କହିଛନ୍ତି ।
ରାଜ୍ୟରେ ୪୦ ଲକ୍ଷ ଭୂତ ରାସନକାର୍ଡଧାରୀ: ଯୋଗାଣ ମନ୍ତ୍ରୀ
