ଢାକା : ବାଂଲାଦେଶର ପୂର୍ବତନ ରାଷ୍ଟ୍ରପତି ଜିଆଉର ରେହମାନ ଏବଂ ପୂର୍ବତନ ପ୍ରଧାନମନ୍ତ୍ରୀ ଖାଲେଦା ଜିଆଙ୍କ ବଡ଼ ପୁଅ ତାରିକ ରେହମାନ ପ୍ରାୟ ୧୭ବର୍ଷ ସ୍ବଦେଶକୁ ଫେରିଛନ୍ତି । ଲଣ୍ଡନରେ ୧୭ ବର୍ଷ ରହିବା ପରେ ଢାକାକୁ ଫେରିଛନ୍ତି ତାରିକ ରେହମାନ । ସେ ଫେରିବା ନେଇ ଶତାଧିକ ବାଂଲାଦେଶ ନ୍ୟାସନାଲିଷ୍ଟ ପାର୍ଟି (ବିଏନପି) ସମର୍ଥକ ଢାକା ବିମାନବନ୍ଦରରେ ରେହମାନ ଏବଂ ତାଙ୍କ ପରିବାରକୁ ସ୍ୱାଗତ କରିଥିଲେ । ରେହମାନଙ୍କ ବାଂଲାଦେଶ ଫେରିବା ବେଳେ ବିଏନପି ସମର୍ଥକ ଏବଂ ଦଳୀୟ କର୍ମୀ ବିମାନବନ୍ଦର ଅଭିମୁଖେ ପଦଯାତ୍ରା କରିଥିଲେ । ୫୦ ଲକ୍ଷରୁ ଅଧିକ ସମର୍ଥକ ତାଙ୍କ ସ୍ୱାଗତ ପାଇଁ ସମାବେଶରେ ଯୋଗ ଦେଇଥିଲେ । ଢାକାରେ ପହଞ୍ଚିବା ପରେ ରେହମାନ ଖାଲିପାଦରେ କିଛି ସମୟରେ ଛିଡା ହୋଇଥିଲେ । ଏହାପରେ ବୁଲେଟପ୍ରୁଫ ବସରେ କାର୍ଯ୍ୟକ୍ରମ ସ୍ଥଳକୁ ଯାଇଥିଲେ । ଏୟାରପୋର୍ଟ ଠାରୁ ଆରମ୍ଭ କରି ରାଲି ସ୍ଥାନ ଯାଏଁ ପ୍ରଧାନମନ୍ତ୍ରୀଙ୍କ ଭଳି ସୁରକ୍ଷା ପ୍ରଦାନ କରାଯାଇଥିଲା ।
୨୦୦୮ ମସିହାରୁ ରେହମାନ ଲଣ୍ଡନରେ ରହୁଛନ୍ତି । କାରଣ ସେ ବାଂଲାଦେଶରେ ଅନେକ ଅପରାଧିକ ମାମଲାର ସମ୍ମୁଖୀନ ହୋଇଥିଲେ । ମନି ଲଣ୍ଡରିଂ ଏବଂ ହାସିନାଙ୍କୁ ହତ୍ୟା କରିବା ପାଇଁ ଷଡ଼ଯନ୍ତ୍ର ସହିତ ଜଡିତ ଏକ ମାମଲାରେ ସାମିଲ ଥିଲେ ରେହମାନ । ହାସିନାଙ୍କୁ ହଟାଇବା ପରେ ରେହମାନଙ୍କୁ ସମସ୍ତ ଅଭିଯୋଗରୁ ମୁକ୍ତ କରାଯାଇଛି । ସେପ୍ଟେମ୍ବର ୨୦୦୮ ରେ ବାଂଲାଦେଶ ଛାଡିବା ପରେ ଲଣ୍ଡନରେ ରହିଥିଲେ । ବିଦେଶରେ ରହି ସେ ଦଳକୁ ନେତୃତ୍ୱ ଦେଇଥିଲେ । ରେହମାନ ବିଏନପିର କାର୍ଯ୍ୟକାରୀ ଅଧ୍ୟକ୍ଷ ଅଛନ୍ତି । ୨୦୨୪ ମସିହାରେ ହସିନା ସରକାରଙ୍କ ପତନ ପରେ, ତାଙ୍କ ବିରୁଦ୍ଧରେ ମାମଲା ପ୍ରତ୍ୟାହାର ହେବା ପରେ ତାରିକ ବାଂଲାଦେଶ ଫେରିବାକୁ ପ୍ରତିଶ୍ରୁତି ଦେଇଥିଲେ । ତେବେ ସେ ଫେବୃଆରୀରେ ହେବାକୁ ଥିବା ନିର୍ବାଚନରେ ଅଂଶଗ୍ରହଣ ହେବେ ବୋଲି ଆଶା କରାଯାଉଛି ।
