ନେପାଳ : ପ୍ରକୃତିର ତାଣ୍ଡବରେ ଘାଣ୍ଟି ହେଉଥିବା ପଡ଼ୋଶୀ ଦେଶ ନେପାଳ ଉପରେ ବିପଦ ବଢିବାରେ ଲାଗିଛି । ତିବ୍ବତ-ନେପାଳ ସୀମାରେ ଥିବା ଆଉ ଏକ ଗ୍ଲେସିୟର ହ୍ରଦ ଫାଟିଯିବା ପରେ ଭୟାବହ ବନ୍ୟାର ଆଶଙ୍କା ଦେଖାଦେଇଛି । ଏହାକୁ ଦୃଷ୍ଟିରେ ରଖି ବିହାର ପ୍ରଶାସନ ପକ୍ଷରୁ ହାଇଆଲର୍ଟ ଜାରି କରାଯାଇଛି । ସମ୍ଭାବ୍ୟ ବନ୍ୟା ଆଶଙ୍କା ଦେଖି ରାଜ୍ୟ ସରକାରଙ୍କ ନିର୍ଦ୍ଦେଶରେ ଗଣ୍ଡକ ଏବଂ କୋସୀ ବ୍ୟାରେଜ ସମେତ ଉତ୍ତର ବିହାରର ସମସ୍ତ ଗୁରୁତ୍ବପୂର୍ଣ୍ଣ ସ୍ଥାନରେ ୨୪ ଘଣ୍ଟା ତଦାରଖ କରାଯାଉଛି ।
ନେପାଳରୁ ଆସୁଥିବା ପାଣି ଓ ମାଟିବାଲିକୁ ଦୃଷ୍ଟିରେ ରଖି ଜଳ ସମ୍ପଦ ବିଭାଗ ପକ୍ଷରୁ ମୁଖ୍ୟାଳୟ ଅଧିକାରୀ ଓ ଇଞ୍ଜିନିୟରଙ୍କ ସ୍ୱତନ୍ତ୍ର ଟିମ୍ ନିୟୋଜିତ କରାଯାଇଛି । ନେପାଳରୁ ଆସୁଥିବା ବନ୍ୟାଜଳ ଯେପରି ବିନା ଦ୍ବିଧାରେ ବାହାରିପାରିବ, ସେଥିପାଇଁ ଗଣ୍ଡକ ବ୍ୟାରେଜର ସମସ୍ତ ୩୬ଟି ଗେଟ୍ ଖୋଲାଯାଇଛି । ଅଧୀକ୍ଷଣ ଯନ୍ତ୍ରୀଙ୍କ ନେତୃତ୍ୱରେ ଏକ ଟେକ୍ନିକାଲ ଟିମ୍ ବ୍ୟାରେଜ ଉପରେ ନିରନ୍ତର ନଜର ରଖିଛି । ସାରଣ ତଟବନ୍ଧ ସମେତ ଅନ୍ୟ ସମ୍ବେଦନଶୀଳ ତଟବନ୍ଧଗୁଡ଼ିକରେ ମଧ୍ୟ ପାଟ୍ରୋଲିଂ ବଢ଼ାଯାଇଛି ।
ସେହିପରି ବୀରପୁରର କୋସୀ ବ୍ୟାରେଜର ୫୬ଟି ଗେଟ୍ ମଧ୍ୟରୁ ୧୭ଟି ଗେଟ୍ ଖୋଲାଯାଇଛି । କୋସୀ ବ୍ୟାରେଜରୁ ପ୍ରାୟ ୧,୪୪,୭୭୫ କ୍ୟୁସେକ୍ ପାଣି ଡିସଚାର୍ଜ ହୋଇଥିବା ରେକର୍ଡ କରାଯାଇଛି । ସମ୍ପୃକ୍ତ ଜିଲ୍ଲାର ଜିଲ୍ଲାପାଳ ଓ ଏସ୍ପିମାନଙ୍କୁ ନିଜ ଅଞ୍ଚଳର ତଟବନ୍ଧଗୁଡ଼ିକର ସ୍ଥିତି ନିଜେ ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି । ଅଧିକାରୀଙ୍କ ଅନୁସାରେ, ନେପାଳର ଭୋଟେକୋଶୀ ନଦୀରୁ ପ୍ରାୟ ୧୦ ହଜାର କ୍ୟୁସେକ୍ ଅତିରିକ୍ତ ପାଣି ଆସିବାର ସମ୍ଭାବନା ରହିଛି ।
ବିହାରର ଉପମୁଖ୍ୟମନ୍ତ୍ରୀ ବିଜୟ କୁମାର ଚୌଧୁରୀ କହିଛନ୍ତି ଯେ, ନେପାଳରେ ଗ୍ଲେସିୟର ଝିଲ୍ଲୀ ଫାଟିବା ଯୋଗୁଁ ବଡ଼ ବିପର୍ଯ୍ୟୟ ଘଟିଛି ।
ସୂଚନାଯୋଗ୍ୟ, ୨୦୧୭ ମସିହାରେ ମଧ୍ୟ ସିକରହନା ଓ ଏହାର ପାହାଡ଼ିଆ ଉପନଦୀଗୁଡ଼ିକରେ ଆସିଥିବା ବନ୍ୟା ଯୋଗୁଁ ଉତ୍ତର ବିହାରରେ ବ୍ୟାପକ କ୍ଷୟକ୍ଷତି ହୋଇଥିଲା । ତେଣୁ ବର୍ତ୍ତମାନ ନେପାଳରେ ଗ୍ଲେସିୟର ହ୍ରଦ ଫାଟିବା ଘଟଣା ପରେ ବିହାର ପ୍ରଶାସନ କୌଣସି ଆପାତକାଳୀନ ପରିସ୍ଥିତିର ମୁକାବିଲା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ରହିଛି ।
