ମୁମ୍ବାଇ: ଟାଇଗର ଶ୍ରଫଙ୍କ କାରକୁ ଗୁଳିମାଡ଼ ଘଟଣାରେ ବଡ଼ ଖୁଲାସା । ଗ୍ୟାଙ୍ଗଷ୍ଟରଙ୍କ ଟାର୍ଗେଟରେ ଥିଲେ ସଲମାନ, ଆମୀର ଓ ରଣବୀର । ଏହି ମାମଲାରେ ମୁମ୍ବାଇ ପୋଲିସ ହରିୟାଣାର ସୋନିପତ ଜିଲ୍ଲାରୁ ଆଉ ୩ ଜଣଙ୍କୁ ଗିରଫ କରିଛି । ମୋଟ ଗିରଫ ସଂଖ୍ୟା ୧୦ରେ ପହଞ୍ଚିଛି । ତେବେ ତଦନ୍ତରୁ ଜଣାପଡ଼ିଛି, ଅଭିଯୁକ୍ତମାନଙ୍କ ପ୍ରଥମ ଟାର୍ଗେଟ ନଥିଲେ ଟାଇଗର ଶ୍ରଫ। ତାଙ୍କ ପୂର୍ବରୁ ସଲମାନ ଖାନ, ଆମିର ଖାନ ଓ ରଣବୀର କପୁରଙ୍କ ଘର ଉପରେ ନଜର ରଖାଯାଇଥିବା ପୋଲିସ ତଦନ୍ତରୁ ସୂଚନା ମିଳିଛି । ନୂଆ ଗିରଫ ହୋଇଥିବା ସମୀର, ଜତିନ ଓ ଅଙ୍କିତ ଏହି ଆକ୍ରମଣର ଯୋଜନା ପ୍ରସ୍ତୁତ କରିବା ସହ ଅସ୍ତ୍ରଶସ୍ତ୍ର ଓ ଅନ୍ୟାନ୍ୟ ସହାୟତା ଯୋଗାଇଥିବା ଅଭିଯୋଗ ରହିଛି ।
ଅନ୍ୟପଟେ ରାଜସ୍ଥାନର କୋଟାରୁ ମୁମ୍ବାଇ ଅଣାଯାଇଥିବା ଫୁଲ ସିଂହ, ରେହାନ ଅନସାରୀ ଓ ହ୍ରିତିକ କୁମାର ଓରଫ ରୋଶନ ରାମୁ ମହତୋଙ୍କୁ ଅକ୍ଟୋବର ୩୧ ପର୍ଯ୍ୟନ୍ତ ପୋଲିସ ହେପାଜତକୁ ପଠାଯାଇଛି । ଏହି ଆକ୍ରମଣ ପଛରେ ଲରେନ୍ସ ବିଷ୍ଣୋଇ ଗ୍ୟାଙ୍ଗ ସହ ସମ୍ପୃକ୍ତ ଅନିଲ ପଣ୍ଡିତଙ୍କ ଭୂମିକା ରହିଛି । ଆମେରିକାରେ ରହୁଥିବା ଅନିଲଙ୍କ ନିର୍ଦ୍ଦେଶରେ ଗୁଳିମାଡ଼ କରାଯାଇଥିବା ତଦନ୍ତକାରୀ ଅଧିକାରୀମାନେ ସନ୍ଦେହ କରୁଛନ୍ତି। ଅସ୍ତ୍ର ଜବତ, ଆକ୍ରମଣର ଉଦ୍ଦେଶ୍ୟ ଜାଣିବା ଏବଂ କଲ୍ ରେକର୍ଡ ସମେତ ଡିଜିଟାଲ ପ୍ରମାଣ ସଂଗ୍ରହ ପାଇଁ ତଦନ୍ତ ଜାରି ରହିଛି । ତଦନ୍ତ ଅନୁସାରେ, ଅଭିଯୁକ୍ତମାନେ ପ୍ରଥମେ ସଲମାନ ଖାନଙ୍କ ବାନ୍ଦ୍ରାସ୍ଥିତ ବାସଭବନ, ଆମିର ଖାନଙ୍କ ଖାର୍ ସ୍ଥିତ ଘର ଓ ରଣବୀର କପୁରଙ୍କ ବାସଭବନ ନିକଟରେ ରେକି କରିଥିଲେ । କିନ୍ତୁ ଏହି ଅଭିନେତାମାନଙ୍କ ସୁରକ୍ଷା ବ୍ୟବସ୍ଥା କଡ଼ା ଥିବାରୁ ସେମାନଙ୍କୁ ଟାର୍ଗେଟ କରିବା କଷ୍ଟକର ହୋଇଥିଲା । ତୁଳନାତ୍ମକ ଭାବେ ଟାଇଗର ଶ୍ରଫଙ୍କ ସୁରକ୍ଷା କମ୍ ଥିବାରୁ ତାଙ୍କୁ ଟାର୍ଗେଟ କରାଯାଇଥିବା ପୋଲିସ ସନ୍ଦେହ କରୁଛି । ତଦନ୍ତରୁ ଆହୁରି ଜଣାପଡ଼ିଛି ଯେ, ଗୁଳିମାଡ଼ରେ ସମ୍ପୃକ୍ତ ଥିବା ସନ୍ଦେହ କରାଯାଉଥିବା ୧୮ ବର୍ଷୀୟ ଫୁଲ ସିଂହ ଓ ରେହାନ ଅନସାରୀ ଘଟଣା ପୂର୍ବରୁ ପ୍ରାୟ ମାସେ ଧରି ମୁମ୍ବାଇରେ ରହିଥିଲେ। ସେମାନେ ଦାଦର ଅଞ୍ଚଳର ବିଭିନ୍ନ ଲଜ୍ ରେ ରହିବା ସହ ଆକ୍ରମଣ ପାଇଁ ବ୍ୟବହୃତ ହୋଇଥିବା ସନ୍ଦିଗ୍ଧ ବଜାଜ ପଲ୍ସର ବାଇକ୍ ସମେତ ପ୍ରାୟ ୨ ଲକ୍ଷ ଟଙ୍କା ଖର୍ଚ୍ଚ କରିଥିଲେ। ଅନ୍ୟପଟେ ଦିଲ୍ଲୀ ପୋଲିସର ସ୍ପେଶାଲ ସେଲ୍ ମଧ୍ୟ ଅସ୍ତ୍ର ଯୋଗାଣ ଅଭିଯୋଗରେ କୁନାଲ ସଞ୍ଜୟ, ସୁମିତ ସୋରାଲିଆ, ରାଧା ବର୍ମା ଓ ବବିତା ରାଓଙ୍କୁ ଗିରଫ କରିଛି ।
ପୋଲିସ ଅନୁଯାୟୀ, ଅମୃତସରରୁ ପିସ୍ତଲ ଓ ୨୦ ରାଉଣ୍ଡ ଗୁଳି ସଂଗ୍ରହ କରାଯାଇଥିଲା। ପରେ ଦୁଇ ମହିଳାଙ୍କ ମାଧ୍ୟମରେ ଅସ୍ତ୍ର ମୁମ୍ବାଇ ପଠାଯାଇଥିଲା । ୧୭ ତାରିଖରେ ଦାଦର ରେଳ ଷ୍ଟେସନରେ ପହଞ୍ଚିବା ପରେ ଜଣେ ନାବାଳକ ଅସ୍ତ୍ର ଥିବା ବ୍ୟାଗ୍ ସଂଗ୍ରହ କରିଥିବା ଅଭିଯୋଗ ରହିଛି । ସେହିପରି ଜତିନ ଅସ୍ତ୍ର ସଂଗ୍ରହ, ଅଭିଯୁକ୍ତଙ୍କ ରହିବା ବ୍ୟବସ୍ଥା ଓ ଟଙ୍କା ପ୍ରଦାନରେ ସହଯୋଗ କରିଥିବା ବେଳେ ଅଙ୍କିତ ସ୍ଥାନୀୟ ବ୍ୟବସ୍ଥା ଏବଂ ସମୀର ଷଡ଼ଯନ୍ତ୍ରରେ ସମ୍ପୃକ୍ତ ଥିବା ପୋଲିସ ସନ୍ଦେହ କରୁଛି । ଅସ୍ତ୍ର ଯୋଗାଣ ପାଇଁ କୁନାଲଙ୍କୁ ପ୍ରାୟ ୭୦ରୁ ୮୦ ହଜାର ଟଙ୍କା ମିଳିଥିବା ମଧ୍ୟ ଅଭିଯୋଗ ହୋଇଛି । ଏବେ ଅଭିଯୁକ୍ତମାନଙ୍କ ମଧ୍ୟରେ ହୋଇଥିବା ଆର୍ଥିକ କାରବାର, ଫୋନ୍ କଲ୍ ଓ ଗ୍ୟାଙ୍ଗ ସହ ସମ୍ଭାବ୍ୟ ସମ୍ପର୍କର ତଦନ୍ତ ଚାଲିଛି । ସିସିଟିଭି ଫୁଟେଜ୍ ଓ ସନ୍ଦିଗ୍ଧ ବାଇକ୍ ର ଗତିବିଧି ଆଧାରରେ ତଦନ୍ତକୁ ଆଗକୁ ବଢ଼ାଯାଉଛି ।
