ରଣପୁର (ଭିଓଭି) : ନୟାଗଡ ଜିଲ୍ଲା ରଣପୁର ବ୍ଲକ ବୃନ୍ଦାବନପୁର ଗ୍ରାମପଞ୍ଚାୟତର ଗୋବର୍ଦ୍ଧନ ପୀଠରେ ମହାବୀର ସଙ୍କଟ ମୋଚନ ହନୁମାନ ଦେବଙ୍କ ପଞ୍ଚଦଶ ବାର୍ଷିକ ଉତ୍ସବ ଓ ବିଶ୍ଵଶାନ୍ତି ମହାଯଜ୍ଞ ମହାସମାରୋହରେ ଅନୁଷ୍ଠିତ ହୋଇ ଶୁକ୍ରବାର ଅପରାହ୍ନରେ ଗୋଧୂଳି ସମୟରେ ପୂର୍ଣ୍ଣାହୁତି କାର୍ଯ୍ୟ ସମ୍ପନ୍ନ ହୋଇ ଯାଇଛି | ଚଳିତ ମାସ ଶୁକ୍ଳ ପକ୍ଷ ଇଂରାଜୀ ତା ୧୮.୧୨.୨୦୨୩ ରିଖ ସୋମବାର ଠାରୁ ତା ୨୨.୧୨.୨୦୨୩ ରିଖ ଶୁକ୍ରବାର ପର୍ଯ୍ୟନ୍ତ ଏହି ତ୍ରିଦିବସୀୟ ବିଶ୍ଵଶାନ୍ତି ମହାଯଜ୍ଞ ସମାଜର ମଙ୍ଗଳକାମନା ଉଦ୍ଦେଶ୍ୟ କରାଯାଇଥିଲା । ଚଳିତ ମାସ ଗତ ୧୮ ତାରିଖ ସୋମବାର ଦିନ ଅଙ୍କୁରରୋପଣ, ୧୯ ତାରିଖ ମଙ୍ଗଳବାର ଦିନ ୧୦୮ କୁମ୍ଭ କଳସ ଯାତ୍ରା, ୨୦ ତାରିଖ ବୁଧବାର ଦିନ ଯଜ୍ଞାରମ୍ଭ, ୨୧ ତାରିଖ ଗୁରୁବାର ଦିନ ଯଜ୍ଞଆହୁତି ଏବଂ ୨୨ ତାରିଖ ଶୁକ୍ରବାର ଦିନ ଗୋଧୂଳି ସମୟରେ ପୂର୍ଣ୍ଣାହୁତି ସମ୍ପନ୍ନ ହେବା ସହିତ ପ୍ରସାଦସେବନ କାର୍ଯ୍ୟ ଅନୁଷ୍ଠିତ ହୋଇଥିଲା।
ମନ୍ଦିର ପରିଚାଳନା କମିଟି ସଭ୍ୟବୃନ୍ଦ ତଥା ବୃନ୍ଦାବନପୁର ଗ୍ରାମପଞ୍ଚାୟତର ସମସ୍ତ ଗ୍ରାମବାସୀବୃନ୍ଦ ଏଥିରେ ପୂର୍ଣ୍ଣ ସହଯୋଗ କରିଥିଲେ | ପ୍ରତ୍ୟେକ ଦିନ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା ଯାହାକୁ ଉପଭୋଗ କରିବା ପାଇଁ ଶହ ଶହ ଜନସାଧାରଣଙ୍କ ଭିଡ ଲାଗି ରହୁଥିଲା | ଏହି ଅବସରରେ ଏଠାରେ ମଧ୍ୟ ଦୋଳି ସହିତ ବିଭିନ୍ନ ଦୋକାନ ବଜାର ପଡିଥିଲା |ପୂର୍ଣ୍ଣାହୁତି ଦିନ ହଜାର ହଜାର ଭକ୍ତଙ୍କ ଲମ୍ବା ଧାଡି ଲାଗି ରହିଥିଲା।
